Tito 1

1 Si Pablo, isang alipin ng Diyos, at apostol ni Hesu-Kristo, ayon sa ¹pananampalataya ng mga ²hinirang ng Diyos, at sa ³lubos na pagkaalam sa katotohanan na ⁴ayon sa pagkamakadiyos,

2 Sa ¹pag-asa sa ²buhay na walang hanggan, na ³ipinangako ng Diyos na di-makapagsisinungaling, buhat pa noong mga panahong walang hanggan,

3 Ngunit sa mga ¹panahon nito ay ipinahayag ang ²Kanyang salita sa pangangaral na sa akin ay ipinagkatiwala ayon sa ³utos ng ating Tagapagligtas na Diyos;

4 Kay Tito na aking tunay na anak ayon sa ¹pangkalahatang pananampalataya: biyaya at kapayapaan nawang mula sa Diyos Ama at kay Kristo Hesus na Tagapagligtas natin.

5 Dahil dito ay iniwan kita sa Creta, upang ayusin mo ang mga bagay na kulang, at magtalaga ng mga matanda ¹sa bawat lunsod, na gaya ng dipinagbilin ko sa iyo;

6 Kung ang sinuman ay walang kapintasan, ¹asawa ng isang babae lamang, may mga anak na nagsisisampalataya, hindi pinararatangan ng panliligalig o panggugulo.

7 Sapagkat ang ¹episkopo ay dapat na walang kapintasan, palibhasa siya ay katiwala ng Diyos, hindi mapagsariling-kalooban, ²hindi magagalitin, ³hindi manginginom, ⁴hindi mapagbuhat-ng-kamay sa iba, ⁵hindi sakim sa mahalay na kapakinabangan;

8 Kundi ¹bukas ang tahanan sa mga panauhin, mangingibig ng kabutihan, ²mahinahon ang kaisipan, matuwid, ³banal, mapagpigil;

9 Na ¹nananangan sa ²tapat na salita na ayon sa ³pagtuturo, upang mahikayat niya sa pamamagitan ng ⁴malusog na pagtuturo, at ⁵mapaamin sa sariling kasalanan ⁶ang mga nagsisisalansang.

10 Sapagkat maraming magugulo, mga mapagsalita ng walang kabuluhan at mga mandaraya, lalung-lalo na ¹yaong mga sa pagtutuli,

11 Na ang kanilang mga bibig ay nararapat ¹matikom, mga taong nagsisipanggulo sa mga buong sambahayan, nagtuturo ng mga bagay na di-nararapat ²dahil sa mahalay na kapakinabangan.

12 Sinabi ng isa sa ¹kanila, ng isang ²propetang mula sa kanila mismo, Ang mga taga-Creta kailanman ay mga sinungaling, masasamang hayop, matatakaw na tamad.

13 Ang patotoong ito ay tunay; dahil dito ay ¹sawayin mo sila nang ²may kabagsikan, upang ³sila ay maging ³malulusog sa ⁴pananampalataya,

14 Na huwag makinig sa mga ¹katha-katha ng mga Hudyo, at sa mga ²utos ng mga ³tao na lumalayo sa ⁴katotohanan.

15 ¹Sa mga dalisay, ang lahat ng mga bagay ay dalisay; datapuwa’t sa mga ²narungisan at di-nagsisisampalataya ay walang anumang dalisay, kundi maging ang kanilang ³kaisipan at kanilang budhi ay pawang ²narungisan.

16 Sila ay ¹nagpapanggap na nakikilala nila ang Diyos, nguni’t ikinakaila nila sa pamamagitan ng kanilang mga gawa, palibhasa ay mga kasuklam-suklam, at mga suwail at mga ²disaprobado sa bawat gawang mabuti.