Apocalipsis 4

1 Pagkatapos ng mga bagay na ito ay nakita ko, at narito, isang pinto ang ¹nabuksan sa langit, at ang unang ²tinig na aking narinig ay gaya ng sa isang trumpeta na nakikipag-usap sa akin, na nagsasabi, Umakyat ka rito, at ipakikita ko sa iyo ang mga bagay na dapat mangyari pagkaraan ng mga bagay na ito.

2 Kapagdaka ako ¹ay napasa ²espiritu; at narito, may isang ³tronong nalalagay sa langit, at sa ibabaw ng trono ay may Isang nakaupo,

3 At ang nakaupo ay tulad sa anyo ng isang batong ¹jaspe at isang ²sardio, at sa trono ay nakapalibot ang isang ³bahaghari na tulad sa anyo ng isang ⁴esmeralda.

4 At sa palibot ng trono ay may ¹dalawampu’t apat na trono, at sa mga trono ay nangakaupo ang ¹dalawampu’ t apat na ²matanda, na nadaramtan ng mga ³puting damit, at sa kanilang mga ulo ay may mga putong na ginto.

5 At mula sa trono ay may lumalabas na mga kidlat at mga tinig at mga kulog; at may ¹pitong ilawang apoy na nagliliyab sa harapan ng trono, na siyang ²pitong Espiritu ng Diyos;

6 At sa harapan ng trono ay waring may isang ¹malasalaming dagat na gaya ng kristal; at sa gitna ng trono at sa palibot ng trono ay may ²apat na nilalang na buhay na ³punô ng mga mata sa harapan at sa likuran.

7 At ang unang nilalang na buhay ay ¹katulad ng isang leon, at ang ikalawang nilalang na buháy ay katulad ng isang guyang baka, at ang ikatlong nilalang na buhay ay may mukhang katulad ng sa isang tao, at ang ikaapat na nilalang na buháy ay katulad ng isang agilang lumilipad.

8 At ang apat na nilalang na buhay, na may anim na pakpak bawa’t isa sa kanila, ay punô ng mga mata sa palibot at sa loob; at sila ay walang pahinga araw at gabi, na nagsasabi, ¹Banal, banal, banal, ang Panginoong Diyos, ang Makapangyarihan sa lahat, na Siyang ²nakaraan, at Siyang ngayon, at Siyang darating.

9 At kapag ang mga nilalang na buhay ay mangagbibigay ng ¹kaluwalhatian at karangalan at pasasalamat sa Kanya na nakaupo sa trono, sa Kanya na nabubuhay magpakailan kailanman,

10 Ang dalawampu’t apat na matanda ay mangagpapatirapa sa harapan Niyaong nakaupo sa trono, at mangagsisisamba sa Yaong nabubuhay magpakailan kailanman, at ¹maglalagay ng kanilang mga putong sa harapan ng trono na nangagsasabi,

11 Karapat-dapat Ka, aming Panginoon at Diyos, na tumanggap ng ¹kaluwalhatian at ng karangalan at ng kapangyarihan, sapagka’t nilikha Mo ang lahat ng bagay, at dahil sa Iyong ²kalooban ay nagsiiral at nalikha sila.