2 Corinto 2

1 Datapuwa’t ito ay ¹ipinasiya ko sa aking sarili, na hindi na ako muling paririyan sa inyo na may kalumbayan.

2 Sapagka’t kung kayo ay papaglumbayin ko, sino nga ang sa akin ay magpapagalak, kundi yaong pinalulumbay ko?

3 At aking ¹isinulat ang bagay ring ito, upang pagdating ko ay huwag akong magkaroon ng kalumbayan mula roon sa mga nararapat kong ikagalak; sa pagkakaroon ng tiwala sa inyong lahat, na ang kagalakan ko ay kagalakan ninyong lahat.

4 Sapagka’t mula sa malaking kapighatian at hapis ng puso ay sinulatan ko kayo na may maraming luha, hindi upang kayo ay palumbayin, kundi upang inyong makilala ang pag-ibig kong napakasagana sa inyo.

5 Datapuwa’t kung ang sinuman ay nakapagpalumbay, hindi ako ang pinalumbay niya, kundi sa isang paraan (upang hindi ako ¹makapagsalita nang lubhang mabigat) ay kayong lahat.

6 Sapat na sa gayon ang kaparusahang ito na ipinarusa ng marami,

7 Nang sa gayon sa halip ay inyong ¹patawarin siya at palakasin ang loob niya, baka sa anumang paraan ay malulon ang isang gayon ng kanyang labis na kalumbayan.

8 Dahil dito ay ipinamamanhik ko sa inyo na ¹papagtibayin ninyo ang inyong pag-ibig sa kanya.

9 Sapagka’t dahil din sa bagay na ito ay sumulat ako, upang aking ¹makilala ang ²pagiging aprubado ninyo, kung kayo ay mga matalimahin sa lahat ng bagay.

10 Datapuwa’t ang inyong ¹pinatatawad ng anuman ay ¹pinatatawad ko na rin naman; sapagka’t kung ano ang aking ²pinatawad naman, kung ako nga ay ²nakapagpatawad ng anuman, ito ay dahil sa inyo sa ³katauhan ni Kristo;

11 Upang huwag kaming malamangan ni ¹Satanas, sapagka’t kami ay hindi walang kabatiran sa kanyang mga ²lalang.

12 ¹Higit pa roon, nang ako ay dumating sa Troas dahil sa ebanghelyo ni Kristo, nang mabuksan din sa akin ang isang pinto ²sa Panginoon,

13 Hindi ako nagkaroon ng katiwasayan sa aking ¹espiritu, sapagka’t hindi ko nasumpungan si Tito na kapatid ko; datapuwa’t pagkapaalam ko sa kanila, ako ay napasa ²Macedonia.

14 Datapuwa’t salamat sa Diyos, na Siyang laging ¹nangunguna sa ²atin sa tagumpay sa loob ³ng Kristo, at sa pamamagitan ⁴natin ay ipinahahayag ang ⁵samyo ng pagkakilala sa Kanya sa bawa’t dako;

15 Sapagka’t tayo ¹ay mabangong samyo ni Kristo sa Diyos sa mga inililigtas at sa mga napapahamak:

16 Sa isa ay samyo mula sa kamatayan sa ¹ikamamatay, sa iba ay samyong mula sa buhay sa ¹ikabubuhay. At sino ang ²makasasapat sa mga bagay na ito?

17 Sapagka’t hindi kami gaya ng karamihan na ¹kinakalakal ang salita ng Diyos; kundi sa ²katapatan, at gaya ng mula sa Diyos, sa harapan ng Diyos ay ³nagsasalita kami sa loob ni Kristo.