2 Corinto 1

1 ¹Si Pablo, isang apostol ni Kristo Hesus sa pamamagitan ng ¹kalooban ng Diyos, at si Timoteo na kapatid, sa ²ekklesia ng Diyos na ³nasa Corinto, ⁴kasama ang lahat ng mga banal na nasa buong ⁵Acaya:

2 Sumainyo nawa ang biyaya at kapayapaang mula sa Diyos na ating Ama at sa Panginoong Hesu-Kristo.

3 Purihin nawa ang Diyos at Ama ng ating Panginoong Hesu-Kristo, ang Ama ng mga ¹kahabagan at Diyos ng lahat ng ²pagpapalakas-loob;

4 Na Siyang nagpapalakas-loob sa atin sa lahat ng kapighatian, upang ¹mapalakas natin ang loob ng mga yaong nangasa anumang kapighatian, sa pamamagitan ng pagpapalakas-loob na ipinagpalakas-loob din sa atin ng Diyos.

5 Sapagka’t kung paanong sumasagana sa atin ang mga ¹pagdurusa ²ng Kristo, gayundin naman ang pagpapalakas namin ng loob ay sumasagana sa pamamagitan ²ng Kristo.

6 Datapuwa’t maging kami man ay namimighati, ito ay para sa ikalalakas ng inyong loob at ikaliligtas; o maging kami man ay napalalakas ang loob, ito ay para sa inyong pagpapalakas-loob, na siyang gumagawa na may pagtitiis ng mga gayunding pagdurusa na amin din namang binabatá.

7 At ang aming pag-asa para sa inyo ay matibay, yamang nalalaman na kung paanong kayo ay mga kabahagi sa mga pagdurusa, gayundin naman kayo sa pagpapalakas ng loob.

8 Sapagka’t hindi namin ibig na kayo ay di-makaalam, mga kapatid, ng tungkol sa mga kapighatiang dumating sa amin sa Asia, na kami ay totoong ¹nabigatan, nang higit sa aming kaya, anupa’t kami ay ²nawalan na ng pag-asang mabuhay pa;

9 Datapuwa’t kami ay nagkaroon sa ¹aming sarili ng ²hatol sa kamatayan, upang huwag kaming magkaroon ng tiwala sa amin ding sarili, kundi sa ³Diyos, na nagbabangon sa mga patay;

10 Na Siyang sa amin ay nagligtas sa gayong lubhang malaking kamatayan, at ¹magliligtas; na Siya naming inaasahan na Siya namang magliligtas pa sa amin;

11 Kayo rin naman na ¹nagsisitulong nang sama-sama sa pamamagitan ng daing patungkol sa amin, na dahil sa ²kaloob sa amin sa pamamagitan ng marami, ay makapagpasalamat ang maraming ³tao dahil sa amin.

12 Sapagka’t ang aming pagmamapuri ay ito, ang patotoo ng aming ¹budhi, ayon sa ²kapayakan at ³katapatan ng Diyos, hindi ayon sa ⁴karunungan ng laman, kundi sa ⁵biyaya ng Diyos, na kami ay gumawi nang gayon sa sanlibutan, at lalong sagana pa nga sa inyo.

13 Sapagka’t hindi namin kayo sinusulatan ng ibang mga bagay, maliban na sa inyong binabasa, o lubusang kinikilala, at umaasa ako na inyong kikilalanin nang lubos hanggang sa katapusan,

14 Gaya naman ng inyong lubos na pagkilala sa amin sa isang paraan, na kami ay inyong kapurihan, gayon din naman kayo ay sa amin sa ¹kaarawan ng Panginoong Hesus.

15 At sa pagtitiwalang ito ay nilayon kong pumariyan muna sa inyo, upang kayo ay mangagkaroon ng ¹pangalawang biyaya,

16 At magdaan sa inyo patungong ¹Macedonia, at muli buhat sa Macedonia ay magbalik sa inyo, at nang maihatid ninyo ako sa paglalakbay ko sa Judea.

17 Sa pagkalayon nga ng ganito, ako ba kaya ay nagpabagu-bago? O ang mga bagay na nilayon ko, mga nilayon ko ba ayon sa laman, upang magkaroon sa akin ng oo, oo at ng hindi, hindi?

18 ¹Nguni’t ang Diyos ay tapat, na ang aming ²salita sa inyo ay hindi oo at hindi;

19 ¹Sapagka’t ang Anak ng Diyos, si Kristo Hesus, na ipinangaral namin sa inyo, sa pamamagitan ko at nina ²Silvano at Timoteo, ay hindi naging oo at hindi, kundi sa Kanya ay oo.

20 ¹Sapagka’t maging gaano man ang mga pangako ng Diyos, sa loob ²Niya ay ang ³Oo; kaya nga naman sa pamamagitan ²Niya ay ⁴ang Amen sa Diyos, ⁵para sa ikaluluwalhati ng Diyos sa pamamagitan ⁶namin.

21 ¹Datapuwa’t Siya na ²matibay na nag-uugpong ³sa amin na kasama ninyo kay ⁴Kristo at ⁵nagpahid sa atin ay ang Diyos,

22 Na Siyang ¹nagtatak naman sa atin at nagbigay ng ²prenda ng Espiritu sa ating mga ³puso.

23 Datapuwa’t ang Diyos ang tinatawagan ko bilang saksi ¹laban sa aking kaluluwa, na upang ²huwag kayong papagdamdamin ay hindi muna ako napariyan sa Corinto.

24 Hindi sa kami ay may pagkapanginoon sa inyong ¹pananampalataya, kundi kami ay mga kamanggagawa ninyo sa inyong kagalakan; sapagka’t sa ¹pananampalataya kayo ay nangagsisitatag.