1 Tesalonica 1

1 Si Pablo, at si Silvano, at si Timoteo, sa ¹ekklesia ng mga taga-²Tesalonica na nasa ³Diyos Ama at Panginoong Hesu-Kristo: Sumainyo nawa ang biyaya at kapayapaan.

2 Nagpapasalamat kaming lagi sa Diyos hinggil sa inyong lahat, na aming binabanggit kayo sa aming mga panalangin,

3 Na aming inaalaalang walang patid sa harapan ng ating Diyos at Ama, ang inyong ¹gawa ng ²pananampalataya, at ³pagpapagal ng pag-ibig, at ⁴pagtitiis ng pag-asa sa ating Panginoong Hesu-Kristo;

4 Nalalaman namin, mga kapatid na minamahal ng Diyos, ang ¹pagkapili sa inyo;

5 Sapagkat ang aming ebanghelyo ay hindi dumating sa inyo sa salita lamang, bagkus sa kapangyarihan din naman, at sa Espiritu Santo, at sa lubos na katiyakan, na gaya ng inyong nalalaman ¹kung anong pagka-tao namin ang aming ipinakita sa inyo alang-alang sa inyo.

6 At kayo ay naging mga ¹tagatulad namin at ng Panginoon, nang inyong tanggapin ang ²salita sa malaking kapighatian, na may kagalakan ng Espiritu Santo,

7 Anupa’t kayo ay naging ¹tularan ng lahat ng mga nananampalatayang nangasa Macedonia at nangasa Acaya.

8 Sapagkat mula sa inyo ay nabansag ang salita ng Panginoon, hindi lamang sa Macedonia at Acaya, bagkus sa bawa’t dako ay natanyag ang inyong ¹pananampalataya sa Diyos, anupa’t kami ay hindi na kailangang magsabi ng anupaman.

9 Sapagkat sila mismo ang nangagbalita ng tungkol sa amin kung paanong nangakapasok kami sa inyo, at kung paanong ¹nangagbalik kayo sa Diyos mula sa mga diyos-diyosan upang ²mangaglingkod sa Diyos na ³buháy at tunay,

10 At upang ¹hintayin ang Kanyang Anak mula sa mga kalangitan, na Kanyang ibinangon sa mga patay, si Hesus nga na nagliligtas sa atin mula sa ²kapootang darating.