1 Corinto 14

1 ¹Habulin ninyo ang pag-ibig, at ²pakanasain ninyo nang masidhi ang mga espirituwal na kaloob, nguni’t lalo na ang kayo ay ³makapagpropesiya.

2 ¹Sapagka’ t ang nagsasalita sa wika ay hindi sa mga tao nagsasalita kundi sa Diyos; sapagka’t walang nakauunawa sa kanya, kundi sa espiritu siya ay nagsasalita ng mga hiwaga.

3 Datapuwa’t ang nagpopropesiya ay nagsasalita sa mga tao sa ¹ikatatayo, at sa ikapagpapalakas ng loob at sa ikaaaliw.

4 Itinatayo ng nagsasalita sa wika ang kanyang sarili, nguni’t ¹itinatayo ng nagpopropesiya ang ekklesia.

5 Ibig ko sanang kayong lahat ay mangagsalita sa mga wika, datapuwa’t lalo na ang kayo ay magsipagpropesiya; at lalong dakila ang nagpopropesiya kaysa nagsasalita sa mga wika, maliban na kung siya ay magpapaliwanag upang ang ekklesia ay makatanggap ng pagtatayo.

6 Ngayon nga, mga kapatid, kung ako ay pumariyan sa inyo na nagsasalita sa mga wika, anong pakinabang ang maibibigay ko sa inyo, malibang magsalita ako sa inyo sa pamamagitan ng pahayag o ng kaalaman o ng pagpopropesiya o ng aral?

7 Kahit ang mga bagay na walang buhay, na nagsisitunog, maging plauta o alpa, kung ¹walang pagkakaiba sa mga tunog na naibibigay, paanong malalaman kung ano ang tinutugtog sa plauta o sa alpa?

8 Sapagka’t kung ang trumpeta ay tumunog na walang katiyakan, sino ang maghahanda sa pakikibaka?

9 Gayundin naman kayo, malibang inyong ipangusap ng ¹dila ang mga salitang madaling maunawaan, paanong matatalos ang inyong sinasalita? Sapagka’t sa hangin kayo magsisipagsalita.

10 Maaaring maraming uri ng ¹tinig sa sanlibutan, at walang isang walang kahulugan.

11 Kung hindi ko nga nalalaman ang ¹kahulugan ng ²tinig, magiging ³barbaro ako sa nagsasalita, at ang nagsasalita ay magiging ³barbaro sa akin.

12 Gayundin naman kayo, na yamang kayo ay mapagsikap para sa mga ¹espiritu, pagsikapan ninyong kayo ay ²magsipangibabaw sa ³ikatatayo ng ekklesia.

13 Kaya’t ang nagsasalita sa wika ay manalangin na siya ay makapagpaliwanag.

14 Sapagka’t kung ako ay nananalangin sa wika, ang aking ¹espiritu ay nananalangin, datapuwa’t ang aking ¹kaisipan ay ²hindi namumunga.

15 Ano nga ito? Mananalangin ako na ginagamit ang espiritu, at mananalangin ¹din naman ako ²na ginagamit ang kaisipan; baawit ako na ginagamit ang espiritu, at aawit ¹din naman ako ²na ginagamit ang kaisipan.

16 Kung hindi, kapag ikaw ay nagpapala na ginagamit ang espiritu, paano makapagsasabi ng ¹Amen sa iyong pagpapasalamat ang nasa kalagayan ng ²di-marunong, yamang hindi niya nalalaman ang iyong sinasabi?

17 Sapagka’t sa katotohanan ay nagpapasalamat kang mabuti, datapuwa’t ang iba ay hindi ¹naitatayo.

18 Nagpapasalamat ako sa Diyos, na ako ay nagsasalita sa mga wika nang higit kaysa sa inyong lahat;

19 Nguni’t sa ekklesia ay iibigin ko pang magsalita ng ¹limang salita na ginagamit ²ang aking kaisipan upang ako naman ay makapagturo sa iba, kaysa magsalita ng ¹sampung libong salita sa wika.

20 Mga kapatid, huwag kayong ¹mangagpakabata sa ²pang-unawa, datapuwa’t sa kahalayan ay mangagpakasanggol kayo, at sa ²pang-unawa kayo ay maging ³lubusan-nang-lumago.

21 Sa ¹kautusan ay nasusulat, ²Sa pamamagitan ng mga taong may ibang wika, at sa pamamagitan ng mga labi ng mga dayuhan ay magsasalita Ako sa bayang ito; gayunman ay hindi nila Ako pakikinggan, sabi ng Panginoon.

22 Kaya nga ang mga wika ay pinaka ¹tanda, hindi sa mga nagsisisampalataya, kundi sa mga hindi nagsisisampalataya; nguni’t ang propesiya ay hindi sa mga hindi nagsisisampalataya, kundi sa mga nagsisisampalataya.

23 Kung ang buong ekklesia nga ay nagkakatipon sa isang dako, at ¹lahat ay nangagsasalita sa mga wika, at ang mga hindi marurunong o hindi mga nagsisisampalataya ay mangagsisipasok, hindi ba nila sasabihing kayo ay mga ²nasisiraan ng bait?

24 Datapuwa’t kung ang ¹lahat ay nagsisipagpropesiya, at may pumasok na isang hindi sumasampalataya o hindi marunong, ²mahihikayat siya ng lahat, ²masisiyasat siya ng lahat;

25 Ang mga lihim ng kanyang puso ay mahahayag; at sa gayon ay magpapatirapa siya at sasamba sa ¹Diyos, na sasabihing tunay ngang ang ¹Diyos ay nasa gitna ninyo.

26 Ano nga ito, mga kapatid? Kapag kayo ay nangag-kakatipon, ang bawa’t isa ay ¹may isang salmo, may isang aral, may isang pahayag, may isang wika, may isang pagpapa-liwanag. Gawin ninyo ang lahat ng mga bagay sa ²ikatatayo.

27 Kung nagsasalita ang sinuman sa wika, mabuti na ang dalawa, o sa pinakamarami ay tatlo, at hali-halili, at hayaan ang isa na magpaliwanag;

28 Datapuwa’t kung walang tagapagpaliwanag ay tumahimik siya sa ¹ekklesia, at siya ay magsalita sa kanyang sarili at sa Diyos.

29 At ang dalawa o tatlong propeta ay magsipagsalita, at ang iba ay ¹mangagsiyasat.

30 Datapuwa’t kung may ipinahayag na anuman sa isang nauupo, tumahimik ang nauuna.

31 Sapagka’t ¹kayong lahat ay makapagpopropesiyang isa-isa, upang ang lahat ay mangatuto, at ang lahat ay ²mahikayat.

32 At ang mga ¹espiritu ng mga propeta ay napasasakop sa mga propeta;

33 Sapagka’t ang Diyos ay hindi isang Diyos ng kaguluhan, kundi ng ¹kapayapaan.

34 Ang mga babae ay magsitahimik ¹sa mga ekklesia, sapagka’t sila ay hindi pinahihintulutang ²mangagsalita; kundi sila ay pasakop, gaya naman ng sinasabi ng ³kautusan.

35 At kung ibig nilang makaalam ng anumang bagay, magtanong sila sa kanilang asawa sa bahay; sapagka’t kahiyahiya para sa isang babae ang magsalita sa ekklesia.

36 Ano, lumabas ba mula sa inyo ang salita ng Diyos, o ¹dumating lamang sa inyo?

37 Kung iniisip ninuman na siya ay isang ¹propeta o espirituwal, kilalanin niya nang malinaw ang mga bagay na sa inyo ay isinusulat ko, na pawang ²utos ng Panginoon.

38 Datapuwa’t kung ang sinuman ay mangmang, manatili siyang mangmang.

39 Kaya nga, mga kapatid ko, ¹masidhi ninyong pakanasaing makapagpropesiya at ¹huwag ninyong ipagbawal ang pagsasalita sa mga wika.

40 Datapuwa’t gawin ninyo ang lahat ng mga bagay ¹nang nababagay at ¹nang may kaayusan.