1 Corinto 15

1 Ngayon ay ipinatatalastas ko sa inyo, mga kapatid, ang ¹ebanghelyo na sa inyo ay aking ipinahayag, na inyo namang tinanggap, na siya naman ninyong ²kinatatayuan,

2 Sa pamamagitan naman nito ay ¹naliligtas kayo, kung matiyaga ninyong iniingatan ang salitang ipinahayag ko sa inyo bilang ebanghelyo, maliban na kung kayo ay nagsipanampalataya nang walang kabuluhan.

3 Sapagka’t ibinigay ko sa inyo na kabilang sa mga unang bagay, yaong akin namang tinanggap, na si ¹Kristo ay namatay para sa ating mga kasalanan ayon sa mga ²Kasulatan;

4 At Siya ay inilibing, at Siya ay ibinangon nang ikatlong araw ayon sa mga Kasulatan;

5 At Siya ay ¹nakita ni Cefas, at saka ng labindalawa;

6 Pagkatapos ay napakita sa mahigit na limang daang kapatid nang minsan na ang karamihan sa mga ito ay nangabubuhay hanggang ngayon, datapuwa’t ang mga iba ay nangatulog na;

7 Saka napakita kay Santiago, at saka sa lahat ng mga apostol;

8 At sa kahuli-hulihan, napakita rin Siya sa akin tulad sa isang ipinanganak sa di-kapanahunan.

9 Sapagka’t ako nga ang pinakamaliit sa mga apostol, at hindi ako karapat-dapat na tawaging apostol, sapagka’t pinag-usig ko ang ekklesia ng Diyos.

10 Datapuwa’t sa pamamagitan ng ¹biyaya ng Diyos, ako nga ay ako; at ang Kanyang biyaya na ibinigay sa akin ay hindi nawawalan ng kabuluhan, bagkus ako ay malabis na nagpagal kaysa sa kanilang lahat, bagama’t ²hindi ako, kundi ang biyaya ng Diyos na sumasaakin.

11 Maging ako nga o sila, gayon ang aming ipinahahayag, at gayon ang inyong sinasampalatayanan.

12 Kung si Kristo nga ay ipinahahayag na Siya ay ibinangon mula sa mga patay, paano nasasabi ng ilan sa inyo na ¹walang pagkabuhay na muli ng mga patay?

13 Datapuwa’t kung walang pagkabuhay na muli ng mga patay, hindi rin nga ibinangon si Kristo;

14 At kung si Kristo ay hindi ibinangon, ¹wala ngang kabuluhan ang aming pagpapahayag; wala rin namang ¹kabuluhan ang inyong pananampalataya.

15 At kami ay nasusumpungang mga saksing bulaan tungkol sa Diyos, sapagka’t kami ay sumasaksi tungkol sa Diyos na Kanyang ¹ibinangon si Kristo, na hindi Niya ibinangon kung tunay nga ang mga patay ay hindi ibinabangon.

16 Sapagka’t kung hindi ibinabangon ang mga patay, hindi rin nga ibinangon si Kristo;

17 At kung si Kristo ay hindi ibinangon, ang inyong pananampalataya ay ¹walang kabuluhan; kayo ay nasa inyong mga kasalanan ²pa rin.

18 Kung gayon nga, ang mga ¹nangatulog din naman kay Kristo ay pawang ²nangapahamak.

19 Kung sa buhay na ito ¹lamang tayo nagsisiasa kay Kristo, tayo sa lahat ng mga tao ang lalong kahabag-habag.

20 ¹Datapuwa’ t si Kristo nga ay ibinangon mula sa mga patay, ang ²unang bunga ng nangatutulog.

21 Sapagka’t yamang sa pamamagitan ng ¹tao ay dumating ang kamatayan, sa pamamagitan din naman ng ²tao ay dumating ang pagkabuhay na muli ng mga patay.

22 Sapagka’t kung paanong sa loob ni Adam ang lahat ay ¹nangamamatay, gayundin naman sa loob ni Kristo ang lahat ay ²bubuhayin.

23 Datapuwa’t ang bawat isa ay sa kanyang sariling katayuan: si Kristo ang ¹unang bunga; pagkatapos ay ²ang mga kay Kristo sa Kanyang pagparito;

24 Kung magkagayon ay darating ang ¹wakas, ²kapag ³ibibigay na Niya ang kaharian sa Diyos, samakatuwid ay sa Ama; ²kapag lilipulin Niya ang lahat ng paghahari at lahat ng awtoridad at kapangyarihan.

25 Sapagka’t kinakailangang Siya ay ¹maghari hanggang mailagay Niya sa ilalim ng Kanyang mga paa ang lahat ng Kanyang mga kaaway.

26 Ang kahuli-hulihang kaaway na ¹lilipulin ay ang kamatayan.

27 Sapagka’t ¹Kanyang pinasuko ang lahat ng bagay sa ilalim ng ²Kanyang mga paa. Datapuwa’t kung ¹Kanyang ³sinasabi na ang lahat ng mga bagay ay pinasuko, maliwanag na itinangi ¹Siya na nagpasuko ng lahat ng mga bagay sa ²Kanya.

28 At kung ang lahat ng mga bagay ay napasuko na ¹sa Kanya, kung magkagayon ang ²Anak din Mismo ay paiilalim naman sa ³Kanya na nagpasuko ng lahat ng bagay sa ¹Kanya, upang ang Diyos ay maging lahat sa lahat.

29 ¹Kung hindi, ano ang gagawin ng mga ²binabautismuhan dahil sa mga patay? Kung ang mga patay ay tunay na hindi ibinabangon, bakit nga sila ay binabautismuhan dahil sa kanila?

30 Bakit ba naman tayo ay nanganganib bawat oras?

31 Mga kapatid, ipinahahayag ko alang-alang sa inyo, na taglay ko ¹kay Kristo Hesus na Panginoon natin ang ²pagmamapuri na araw-araw ay namamatay ako.

32 Kung ako ay nakipagbaka sa Efeso laban sa mga ¹ganid ayon sa ²kaugalian ng tao, ano ang pakinabang ang maibibigay nito sa akin? Kung ang mga patay ay hindi ibinabangon, ³magsikain at magsiinom tayo yamang bukas tayo ay mangamamatay.

33 Huwag kayong padaya: Ang ¹masasamang ²kasama ay sumisira ng magagandang moral.

34 ¹Maging matitino kayo nang ayon sa katuwiran, at huwag mangagkasala; sapagka’t may mga ibang ²walang pagkakilala sa Diyos. Sinasabi ko ito sa inyong ikahihiya.

35 Datapuwa’t sasabihin ng iba, Paanong ibinabangon ang mga patay? At anong uri ng katawan ang iparirito nila?

36 Ikaw na mangmang, ¹ang iyong inihahasik ay hindi binubuhay maliban na kung mamatay;

37 At ang iyong inihahasik, hindi mo inihahasik ang katawang lilitaw, kundi ang butil lamang, na marahil ay trigo, o ibang bagay.

38 Datapuwa’t ang Diyos ay nagbibigay ng ¹katawan dito ayon sa Kanyang minagaling, at sa bawat binhi ay ang sarili nitong ¹katawan.

39 ¹Hindi lahat ng laman ay magkatulad na laman, kundi may laman na sa mga tao, at ibang laman sa mga hayop, at ibang laman sa mga ibon, at ibang laman sa mga isda.

40 Mayroon namang mga katawang ukol sa langit, at mga katawang ukol sa lupa; datapuwa’t iba ang kaluwalhatian ng ukol sa langit, at iba ang ukol sa lupa.

41 Iba ang kaluwalhatian ng araw, at iba ang kaluwalhatian ng buwan, at iba ang kaluwalhatian ng mga bituin; sapagka’t ang isang bituin ay naiiba sa ibang bituin sa kaluwalhatian.

42 Gayundin naman ang pagkabuhay na muli ng mga patay. Itinanim sa kasiraan, ibinangon sa walang kasiraan;

43 Itinanim sa di-kapurihan, ibinangon sa kaluwalhatian; itinanim sa kahinaan, ibinangon sa kapangyarihan;

44 Itinanim na isang ¹pangkaluluwang katawan, ibinangon na ¹espirituwal na katawan. Kung may pangkaluluwang katawan ay mayroon ding espirituwal na katawan.

45 Gayundin naman ay nasusulat, Ang unang taong si Adam ay naging ¹kaluluwang buhay. Ang huling Adam ay naging ¹Espiritung nagbibigay-buhay.

46 Bagaman ¹ang espirituwal ay hindi siyang una, kundi ²ang pangkaluluwa; pagkatapos ay ang sa espirituwal.

47 Ang unang tao ay ¹mula sa lupa, makalupa; ang ²ikalawang Tao ay ³mula sa langit.

48 Kung ano ¹ang makalupa, gayundin naman ²silang mga makalupa; at kung ano ang ³makalangit, gayundin naman ⁴silang mga makalangit.

49 At kung paanong ¹tinaglay natin ang ²larawan ng makalupa, ¹tataglayin din naman natin ang ²larawan ng makalangit.

50 Sinasabi ko nga ito, mga kapatid, na ang ¹laman at ang dugo ay hindi makapagmamana ng kaharian ng Diyos, ni ang kasiraan ay magmamana ng walang kasiraan.

51 Narito, isinasaysay ko sa inyo ang isang ¹hiwaga: hindi lahat sa atin ay ²mangatutulog, ngunit tayong lahat ay ³babaguhin,

52 Sa isang sandali, sa isang kisap-mata, sa ¹huling pagtunog ng trumpeta; sapagka’t tutunog ang trumpeta, at ²ang mga patay ay ibabangon nang walang kasiraan, at ³tayo ay babaguhin.

53 Sapagka’t kinakailangan na ¹itong may kasiraan ay magbihis ng walang kasiraan, at ¹itong may kamatayan ay magbihis ng walang kamatayan.

54 At ¹kapag itong may kasiraan ay magbihis ng walang kasiraan, at itong may kamatayan ay magbihis ng walang kamatayan, kung magkakagayon ay mangyayari ang salitang nasusulat, Ang kamatayan ay nalulon ²sa ³tagumpay.

55 ¹Saan naroroon, O kamatayan, ang iyong tagumpay? Saan naroroon, O kamatayan, ang iyong tibo?

56 Ang ¹tibo ng kamatayan ay ang kasalanan, at ang ²kapangyarihan ng kasalanan ay ang kautusan;

57 Datapuwa’t salamat sa Diyos na nagbibigay sa atin ng ¹pagtatagumpay sa pamamagitan ng ating Panginoong Hesu-Kristo.

58 Kaya nga, mga kapatid kong minamahal, kayo ay maging ¹matatag, hindi natitinag, na laging ²sumasagana sa gawain ng Panginoon, yamang nalalaman ninyo na ang inyong ³pagpapagal sa Panginoon ay hindi walang kabuluhan.