Roma 6

1 Ano nga ang ating sasabihin? Magpapatuloy ba tayo sa pagkakasala upang ang biyaya ay makapanagana?

2 Tiyak na hindi! Tungo sa kasalanan tayo ay nangamatay na, paano pa tayo mabubuhay sa loob nito?

3 O hindi ba ninyo nalalamang tayong lahat na mga ¹nangabautismuhan tungo sa loob ni ²Kristo Hesus ay ¹nangabautismuhan tungo sa loob ng ³Kanyang kamatayan?

4 Tayo nga ay ¹nangalibing na kalakip Niya sa pamamagitan ng ²bautismo tungo sa loob ng kamatayan, na kung paanong si Kristo ay ibinangon mula sa mga patay sa pamamagitan ng kaluwalhatian ng Ama, gayundin naman tayo ay nararapat lumakad sa ³kabaguhan ng buhay.

5 Sapagka’t kung tayo nga ay ¹lumagong kaisa Niya sa ²wangis ng Kanyang kamatayan, tayo ay magiging gayundin sa ³wangis ng Kanyang pagkabuhay na muli,

6 ¹Nalalamang ganito, na ang ating ²lumang tao ay kalakip Niyang ³naipako sa krus upang ang ⁴katawan ng kasalanan ay ⁵mapawalang-bisa, upang huwag na nating paglingkuran pa ang kasalanan bilang mga alipin;

7 Sapagka’t ang namatay ay ¹napalaya na sa ²kasalanan.

8 Datapuwa’t kung tayo ay nangamatay na ¹kalakip ni Kristo, naniniwala tayo na mangabubuhay naman tayong ¹kalakip Niya,

9 Nalalamang si Kristo na naibangon na mula sa mga patay ay ¹hindi na mamamatay; ang kamatayan ay hindi na nagpapanginoon sa Kanya.

10 Sapagka’t ang kamatayang ikinamatay Niya, Kanyang ikinamatay na minsan sa kasalanan; datapuwa’t ang buhay na Kanyang ikinabubuhay, Kanyang ikinabubuhay sa Diyos.

11 Gayundin naman kayo, ¹ibilang ninyong kayo ay mga tunay na patay na sa kasalanan, nguni’t mga buháy sa Diyos kay Kristo Hesus.

12 ¹Huwag ngang maghari ang kasalanan sa inyong katawang may kamatayan upang kayo ay magsisunod sa mga pita nito.

13 At huwag din naman ninyong ihandog ang inyong mga sangkap sa kasalanan bilang mga sandata ng kalikuan, kundi ¹ihandog ninyo ang inyong mga sarili sa Diyos na tulad sa nangabuhay sa mga patay, at ang inyong mga sangkap bilang mga ²sandata ng katuwiran sa Diyos.

14 Sapagka’t ang kasalanan ay hindi ¹makapagpapanginoon sa inyo, ²sapagka’t ³wala kayo sa ilalim ng kautusan, kundi nasa ilalim ng biyaya.

15 Ano nga? Mangagkakasala ba tayo dahil sa tayo ay wala sa ilalim ng kautusan kundi nasa ilalim ng biyaya? Tiyak na hindi!

16 Hindi ba ninyo nalalaman na kung kanino ninyo inihahandog ang inyong mga sarili na pinakaalipin ¹tungo sa pagtalima, kayo ay mga alipin niyaong inyong tinatalima, maging ng kasalanan tungo sa kamatayan, o ng pagtalima tungo sa katuwiran?

17 Datapuwa’t salamat sa Diyos, na bagama’t kayo ay naging mga alipin ng kasalanan, noon, subali’t kayo ay naging mga matalimahin mula sa puso roon sa huwaran ng aral na ibinigay sa inyo.

18 At yamang ¹napalaya na kayo sa kasalanan ay naging mga alipin kayo ng katuwiran.

19 Nagsasalita ako ayon sa kaugalian ng mga tao dahil sa karupukan ng inyong laman. Sapagka’t kung paano ninyong inihandog ang inyong mga sangkap ng inyong katawan na pinakaalipin ng karumihan at ng lalu’t lalong katampalasanan, gayundin ihandog ninyo ngayon ang inyong mga sangkap na pinakaalipin ng katuwiran ¹sa ²ikababanal.

20 Sapagka’t noong kayo ay mga alipin ng kasalanan, kayo ay malaya hinggil sa katuwiran.

21 Ano nga ang ibinunga ninyo sa panahong yaon sa mga bagay na ngayon ay ikinahihiya ninyo? Sapagka’t ang wakas ng mga bagay na yaon ay kamatayan.

22 Datapuwa’t ngayong napalaya na kayo sa kasalanan at mga napaalipin sa Diyos, kayo ay may inyong ¹bunga sa ikababanal, at ang wakas ay ang ²buhay na walang hanggan.

23 Sapagka’t ang ¹kabayaran ng kasalanan ay ²kamatayan, datapuwa’t ang kaloob na walang bayad ng Diyos ay ³buhay na walang hanggan sa loob ni Kristo Hesus na Panginoon natin.