Roma 5

1 Yaman ngang mga naaring-matuwid ¹sa pamamagitan ng pananampalataya, mayroon tayong kapayapaan ²sa Diyos sa pamamagitan ng ating Panginoong Hesu-Kristo,

2 Sa pamamagitan din naman Niya ay nangagkaroon tayo ng ating pagpasok sa pamamagitan ng ¹pananampalataya tungo sa ²biyayang ito na ating ³kinatatayuan, at ⁴nagmamapuri sa ⁵pag-asa ng kaluwalhatian ng Diyos.

3 At hindi lamang gayon, kundi nagmamapuri rin naman tayo sa ating mga ¹kapighatian, na nalalamang ang kapighatian ay gumagawa ng ²katiyagaan;

4 At ang katiyagaan, ng ¹pagiging aprubado; at ang pagiging aprubado, ng pag-asa:

5 At ang pag-asa ay hindi nanghihiya, sapagka’t ang ¹pag-ibig ng Diyos ay ibinuhos na sa ating mga puso sa pamamagitan ng Espiritu Santong ibinigay sa atin.

6 Sapagka’t nang tayo ay ¹mahihina pa ay namatay si Kristo sa takdang kapanahunan para sa mga di-makadiyos.

7 Sapagka’t bihira para kaninuman ang mamatay para sa isang taong matuwid; bagama’t maaaring may mangahas na mamatay para sa isang taong mabuti.

8 Datapuwa’t ipinagtatagubilin ng Diyos ang Kanyang pag-ibig sa atin, na nang tayo ay mga makasalanan pa, si Kristo ay namatay para sa atin.

9 Ngayon, yamang tayo ay naaring-matuwid na dahil sa Kanyang dugo, ay higit pa nga tayong mangaliligtas mula sa poot ng Diyos sa pamamagitan Niya.

10 Sapagka’t kung noong tayo ay mga kaaway pa ay ¹pinakipagkasundo tayo sa Diyos sa pamamagitan ng kamatayan ng Kanyang Anak, ²higit pa, ngayong naipakasundo na, ay ³mangaliligtas tayo ⁴sa loob ng Kanyang ⁵buhay.

11 At hindi lamang gayon, bagkus ¹ipinagmamapuri naman natin ang Diyos sa pamamagitan ng ating Panginoong Hesu-Kristo, na sa pamamagitan Niya ay tinamo natin ngayon ang pagkakasundo.

12 Kaya, kung paanong sa pamamagitan ng ¹isang tao ay pumasok ang ²kasalanan sa ³sanlibutan, at ang ⁴kamatayan ay sa pamamagitan ng kasalanan; at sa ganito ang ⁴kamatayan ay napasalahat ng mga tao, sapagka’t ang lahat ay nangagkasala;

13 Sapagka’t ang kasalanan ay nasa sanlibutan na hindi pa man dumarating ang kautusan, nguni’t ¹hindi ibinibilang ang kasalanan nang wala pa ang kautusan.

14 Bagaman ang ¹kamatayan ay naghari mula kay ²Adam hanggang kay Moises, kahit doon sa hindi ³nangagkasala man ng tulad sa ³pagsalansang ni Adam, na siyang ⁴anyo Niyaong darating.

15 Datapuwa’t gayundin ang kaloob na walang bayad ay hindi gaya ng pagsuway. Sapagka’t kung sa pagsuway ng isa ay nangamatay ang marami, ¹lubha pa ang biyaya ng Diyos at ang kaloob sa biyaya ng Isang ²Taong si Hesu-Kristo ay sumagana sa marami.

16 At ang pagkakasala ng isa ay hindi gaya ng ¹kaloob; sapagka’t ang kahatulan ay mula sa isang pagsuway ²sa ikakokondena, datapuwa’t ang kaloob na walang bayad ay mula sa maraming pagsuway ²sa ikaaaring-matuwid.

17 Sapagka’t kung sa pagsuway ng isa ay naghari ang kamatayan sa pamamagitan ng isa, higit pang ¹magsisipaghari sa ²buhay ang mga nagsisitanggap ng ³kasaganaan ng biyaya at ng kaloob ng ⁴katuwiran sa pamamagitan ng Isa, samakatuwid ay si Hesu-Kristo.

18 Kaya kung paanong sa pamamagitan ng isang pagsuway ay dumating ang hatol sa lahat ng tao ¹sa ikakokondena, gayundin naman sa pamamagitan ng isang ²gawa ng katuwiran, ang kaloob na walang bayad ay dumating sa lahat ng tao ³sa ikaaaring-matuwid ng ⁴buhay.

19 Sapagka’t kung paanong sa pamamagitan ng pagsuway ng isang tao ang marami ay ¹nabuuang mga makasalanan, gayundin sa pamamagitan ng ²pagtalima ng Isa ang marami ay mabubuuang matutuwid.

20 At bukod pa rito ay pumasok ang kautusan upang ang pagsuway ay ¹makapanagana; datapuwa’t kung saan ¹nanagana ang kasalanan ay nanaganang lubha ang biyaya,

21 Upang kung paanong ang ¹kasalanan ay naghari sa kamatayan, gayundin naman ang biyaya ay makapaghahari sa pamamagitan ng ²katuwiran tungo sa buhay na walang hanggan sa pamamagitan ni Hesu-Kristong Panginoon natin.