Roma 16

1 ¹Itinatagubilin ko sa inyo si Febe na ating kapatid na babae, na isang diyakonesa sa ²ekklesia na nasa Cencrea,

2 Upang tanggapin ninyo siya sa Panginoon, ayon sa ¹nararapat sa mga banal at tulungan ninyo siya sa anumang bagay na magiging kailangan niya sa inyo; sapagka’t siya naman ay naging ²katulong ng marami at ng aking sarili rin naman.

3 Batiin ninyo sina Prisca at Aquila na aking mga kamanggagawa kay Kristo Hesus,

4 Na ¹nagpain ng kanilang mga leeg dahil sa aking ²buhay, na sa kanila ay hindi lamang ako ang nagpapasalamat, bagkus naman maging ang lahat ng ³mga ekklesia ng mga Hentil;

5 At batiin ninyo ang ¹ekklesiang nasa kanilang ²bahay. Batiin ninyo si Epeneto na minamahal ko, na siyang unang bunga ng Asia kay Kristo.

6 Batiin ninyo si Maria, na lubhang nagpagal para sa inyo.

7 Batiin ninyo sina Andronico at Junia na aking mga kamag-anak at mga kasama ko sa bilangguan, na mga bantog sa mga apostol, na sila naman ay nauna sa akin kay Kristo.

8 Batiin ninyo si Ampliato na aking minamahal sa Panginoon.

9 Batiin ninyo si Urbano na aming kamanggagawa kay Kristo, at si Estaquis na minamahal ko.

10 Batiin ninyo si Apeles na aprubado kay Kristo. Batiin ninyo yaong mga ¹nabibilang kay Aristobulo.

11 Batiin ninyo si Herodion na aking kamag-anak. Batiin ninyo yaong mga ¹nabibilang kay Narciso, yaong nangasa Panginoon.

12 Batiin ninyo sina Trifena at Trifosa, na nangagpapagal sa Panginoon. Batiin ninyo si Persida na minamahal, na lubhang nagpagal sa Panginoon.

13 Batiin ninyo si Rufo na hinirang sa Panginoon, at ang kanyang ina at ¹akin.

14 Batiin ninyo sina Asincrito, Flegonte, Hermes, Patrobas, Hermas, at ang mga kapatid na kasama nila.

15 Batiin ninyo sina Filologo, at Julia, sina Nereo at ang kanyang kapatid na babae, at si Olimpas, at ang lahat ng mga banal na kasama nila.

16 Mangagbatian kayo ng banal na halik. Binabati kayo ng lahat ng ¹mga ekklesia ni Kristo.

17 Ngayon ay ipinamamanhik ko sa inyo, mga kapatid, na maingat ninyong bantayan ang mga yaong gumagawa ng pagkakabaha-bahagi at ng mga ¹katitisurang laban sa pagtuturo na inyong nangapag-aralan, at kayo ay ²magsilayo sa kanila.

18 Sapagka’t ang mga gayong tao ay hindi ¹nagsisipaglingkod sa ating Panginoong Kristo, kundi sa kanilang mga sariling ²tiyan; at sa pamamagitan ng mahuhusay at maiinam na pananalumpati ay dinadaya ang mga puso ng mga ³walang malay.

19 Sapagka’t ang inyong pagtalima ay naging bantog sa lahat ng mga tao; kaya’t nagagalak ako tungkol sa inyo, datapuwa’t ibig ko na kayo ay maging marunong sa kabutihan at ¹musmos sa kasamaan.

20 At si Satanas ay ¹dudurugin ng Diyos ng kapayapaan sa lalong madaling panahon sa ilalim ng inyong mga paa. Ang ²biyaya ng ating Panginoong Hesus ay sumainyo.

21 Binabati kayo ni Timoteo na aking kamanggagawa, at ni Lucio at ni Jason at ni Sosipatro, na aking mga kamag-anak.

22 Akong si Tercio na sumusulat ng liham na ito ay bumabati sa inyo sa Panginoon.

23 Binabati kayo ni Gayo na tinutuluyan ko, at ng buong ekklesia. Binabati kayo ni Erasto na ingat-yaman ng lunsod, at ng kapatid na si Cuarto.

24 ¹Ang biyaya ng ating Panginoong Hesu-Kristo ay sumainyong lahat. Amen.

25 ¹Ngayon sa Kanya na makapangyarihang sa inyo ay ²makapagpapatibay ayon sa ³aking ebanghelyo at sa pagpapahayag ng tungkol kay Hesu-Kristo, ayon sa pahayag ng ⁴hiwaga, na natago sa katahimikan noong mga ⁵panahong walang hanggan,

26 Datapuwa’t nahayag na ngayon, at sa pamamagitan ng mga kasulatan ng mga propeta, ayon sa ipinag-utos ng ¹walang hanggang Diyos, ay ipinakilala sa lahat ng mga bansa upang magsitalima sa pananampalataya,

27 Sa iisang Diyos na ¹marunong, sa pamamagitan ni Hesu-Kristo, suma Kanya nawa ang kaluwalhatian magpakailanman. Amen.