Roma 12

1 ¹Kaya nga, mga kapatid, ipinamamanhik ko sa inyo, sa pamamagitan ng mga ²kahabagan ng Diyos, na inyong ³ihandog ang inyong mga katawan na isang haing ⁴buháy, banal, kalugud-lugod sa Diyos, na siya ninyong ⁵katampatang ⁶paglilingkod.

2 ¹At huwag kayong ²magsiayon sa ³kapanahunang ito, kundi ⁴matransporma kayo sa pamamagitan ng ⁵pagpapabago ng inyong kaisipan, upang ⁶mapatunayan ninyo sa pamamagitan ng pagsubok kung ano ang mabuti at kalugud-lugod at sakdal na ⁷kalooban ng Diyos.

3 Sapagkat sinasabi ko, sa pamamagitan ng biyaya na sa akin ay ibinigay, sa bawat isa sa inyo, na huwag ¹mag-isip sa kanyang sarili ng totoong matayog kaysa nararapat niyang isipin, kundi mag-isip nang may kahinahunan, ayon sa sukat ng pananampalatayang ibinahagi ng Diyos sa bawat isa.

4 Sapagkat kung paanong sa iisang katawan ay mayroon tayong maraming sangkap, at ang lahat ng sangkap ay hindi magkakatulad ang ¹gawain,

5 Gayundin tayo, na marami, ay iisang katawan ¹kay Kristo, at isa’t isa ay mga ²sangkap ng iba.

6 At yamang may mga ¹kaloob na nagkakaiba-iba ayon sa biyayang ibinigay sa atin, kung ²propesiya, mangagpropesiya tayo, ayon sa ³kasukatan ng pananampalataya;

7 O kung ¹paglilingkod, maging tapat sa paglilingkod; o ang nagtuturo, maging tapat sa pagtuturo;

8 O ang nanghihikayat, maging tapat sa panghihikayat; ang ¹namimigay, magbigay sa loob ng kapayakan; ang ²namumuno, sa pagsisikap; ang ³naaawa, sa kagalakan.

9 ¹Maging walang pagpapaimbabaw ang inyong pag-ibig. Kapootan ninyo ang masama; makisama kayo sa mabuti.

10 Mangagmahalan kayo nang mainit, sa loob ng pag-ibig na ukol sa mga kapatid, sa kapurihan ay ipagpauna ng isa’t isa ang iba,

11 Hindi tamad sa pagsusumikap, nagniningas sa ¹espiritu, ²naglilingkod sa Panginoon,

12 Nagagalak sa pag-asa, nagtitiis sa kapighatian, nagtitiyaga sa panalangin,

13 ¹Dumaramay sa mga pangangailangan ng mga banal, naghahabol ng pagkakataon na makapagpatulóy.

14 ¹Pagpalain ninyo ang mga umuusig sa inyo; pagpalain ninyo at huwag ninyong sumpain.

15 ¹Makigalak kayo sa mga nagagalak, at makitangis sa mga nagsisitangis.

16 Mangagkaisa kayo ng kaisipan. Huwag ninyong ilagak ang inyong kaisipan sa mga bagay na kapalaluan, kundi makiayon kayo sa mga bagay na may kapakumbabaan. Huwag kayong maging mga pantas sa mga sarili ninyong haka.

17 Huwag kayong mangagbayad sa kaninuman ng masama sa masama. ¹Isipin ninyo ang mga bagay na kapuri-puri sa harapan ng lahat ng tao.

18 Kung maaari, ayon sa inyong makakaya, magkaroon kayo ng kapayapaan sa lahat ng tao,

19 Mga minamahal, huwag ninyong ¹ipaghiganti ang inyong mga sarili, kundi bigyan ninyo ng daan ang poot ng Diyos, sapagkat nasusulat, Akin ang paghihiganti, Ako ang gaganti, sinasabi ng Panginoon.

20 Kaya’t kung ang iyong kaaway ay nagugutom, pakainin mo; kung siya ay nauuhaw, painumin mo; sapagkat sa paggawa mo ng gayon, mga baga ng apoy ang ibubunton mo sa kanyang ulo.

21 Huwag kang padaig sa masama, kundi daigin mo ng mabuti ang masama.