Mateo 4

1 Pagkatapos ay inihatid si ¹Hesus ng Espiritu sa ilang upang ²tuksuhin ng ³diyablo.

2 At nang makapag-ayuno ng ¹apatnapung araw at apatnapung gabi, sa katagalan Siya ay nagutom.

3 At ang ¹manunukso ay dumating at nagsabi sa Kanya, Kung Ikaw ang ²Anak ng Diyos, magsalita Ka, upang ang ³mga batong ito ay maging mga tinapay.

4 Subali’t Siya ay sumagot at nagsabi, ¹nasusulat, ²“Ang tao ay hindi nabubuhay sa ³tinapay lamang, bagkus sa bawa’t ⁴salita na lumalabas sa ⁵bibig ng Diyos.”

5 Nang magkagayon ay dinala Siya ng diyablo tungo sa banal na lunsod at inilagay Siya sa ¹pakpak ng ²templo,

6 At sinabi sa Kanya, Kung Ikaw ang Anak ng Diyos, ¹magpatihulog Ka; sapagka’t ²nasusulat, “Siya ay mag-aatas sa Kanyang mga anghel hinggil sa Iyo, at bubuhatin Ka nila sa kanilang mga kamay, baka matisod Mo ang Iyong paa sa bato.”

7 Sinabi sa kanya ni Hesus, ¹Muli ay nasusulat, “Huwag mong ²tutuksuhin ang Panginoon mong Diyos.”

8 Muli, dinala Siya ng diyablo sa isang napakataas na bundok at ipinakita sa Kanya ang lahat ng ¹mga kaharian ng sanlibutan at ang kanilang kaluwalhatian;

9 At kanyang sinabi sa Kanya, ¹Ang lahat ng mga ito ay ibibigay ko sa Iyo kung Ikaw ay magpapatirapa at sasamba sa akin.

10 Sa gayon sinabi sa kanya ni Hesus, Lumayas ka, ¹Satanas! Sapagka’t nasusulat, Ikaw ay sasamba sa Panginoon mong Diyos, at Siya ²lamang ang iyong paglilingkuran.

11 Sa gayon ¹iniwan Siya ng diyablo; at narito, dumating ang ²mga anghel at naglingkod sa Kanya.

12 Ngayon nang marinig Niya na si Juan ay ¹ibinilanggo, Siya ay ²umalis patungong Galilea;

13 At pagkalisan sa Nazaret, Siya ay naparoon at nanirahan sa Capernaum, na nasa tabi ng dagat, sa mga hangganan ng Zabulon at Neftali;

14 Upang matupad ang sinalita sa pamamagitan ng propeta Isaias, na nagsasabi,

15 Lupain ng Zabulon at lupain ng Neftali, sa gawing dagat, sa kabilang ibayo ng Jordan, ¹Galilea ng mga Hentil:

16 Ang mga taong nakaupo sa kadiliman ay nakakita ng dakilang ¹ilaw, at sa mga nakaupo sa isang rehiyon at lilim ng kamatayan, sa kanila ang ilaw ay nagliwanag.

17 Mula noon ay nagsimulang mangaral si Hesus at magsabi, ¹Magsisi kayo sapagka’t ang kaharian ng mga kalangitan ay malapit na.

18 At sa paglalakad Niya sa tabi ng ¹dagat ng Galilea, Siya ay nakakita ng dalawang magkapatid, si Simon na tinawag na Pedro at si Andres na kanyang kapatid, na ²naghahagis ng ³lambat sa dagat, sapagka’t sila ay mga mangingisda.

19 At Kanyang sinabi sa kanila, Halikayo, sumunod kayo sa Akin, at gagawin Ko kayong mga mamamalakaya ng mga tao.

20 At kaagad, sa pag-iwan sa mga lambat, sila ay ¹sumunod sa Kanya.

21 At paglakad mula roon, nakita Niya ang dalawa pang magkapatid, si Santiago na anak ni Zebedeo, at si Juan na kanyang kapatid, na nasa daong kasama si Zebedeo na kanilang ama na ¹nagsisipaghayuma ng kanilang mga lambat, at Kanyang tinawag sila.

22 At kaagad, sa pag-iwan sa daong at sa kanilang ama, sila ay ¹sumunod sa Kanya.

23 At nilibot ni Hesus ang buong Galilea, na nagtuturo sa kanilang mga ¹sinagoga, at ipinangangaral ang ²ebanghelyo ng ³kaharian, at pinagagaling ang bawa’t karamdaman at bawa’t sakit na nasa mga tao.

24 At ang balita tungkol sa Kanya ay lumaganap sa buong Syria; at kanilang dinala sa Kanya ang lahat ng mga may karamdaman, na mga nagdurusa sa sari-saring karamdaman at mga sakit, ang mga inaalihan ng mga demonyo, at mga himatayin, at mga paralitiko, at sila ay Kanyang pinagaling.

25 At malalaking ¹kalipunan ang sumunod sa Kanya mula sa Galilea, at ²Decapolis, at Herusalem, at Judea, at sa kabilang ibayo ng Jordan.