Mateo 22

1 At sumagot si Hesus at muling nagsalita sa kanila sa mga talinghaga, na nagsasabi,

2 Ang ¹kaharian ng mga kalangitan ay katulad ng isang ²hari, na naghanda ng ³piging ng kasalan para sa kanyang ²anak na lalake.

3 At isinugo niya ang kanyang ¹mga alipin upang tawagin ang mga inanyayahan sa piging ng kasalan, at ayaw nilang magsidalo.

4 Muli siyang nagsugo ng ¹iba pang mga alipin, na nagsasabi, Sabihin ninyo sa mga inanyayahan, Narito, naihanda ko na ang aking ²piging; napatay na ang aking ³mga baka at ang ³mga pinatabang hayop, at handa na ang lahat ng bagay; halina kayo sa piging ng kasalan.

5 Subali’t hindi sila namansin at nagsilisan, ang isa patungo sa kanyang sariling bukid at ang isa ay patungo sa kanyang pangangalakal,

6 At sinunggaban ng iba pa ang kanyang mga alipin, hinamak at pinatay.

7 At nagalit ang hari; at isinugo niya ang kanyang ¹mga hukbo at nilipol yaong mga mamamatay-tao at sinunog ang kanilang lunsod.

8 Pagkatapos sinasabihan niya ang kanyang mga alipin, Handa na ang piging ng kasalan subali’t ¹hindi karapat-dapat ang mga inanyayahan.

9 Kaya’t magtungo kayo sa ¹mga likuang daan, at anyayahan ninyo sa piging ng kasalan ang lahat ng inyong masumpungan.

10 At yaong mga alipin ay nagsilabas sa mga lansangan at tinipon ang lahat ng kanilang nasumpungan, kapwa masasama at mabubuti; at napuno ang piging ng kasalan ng mga nakadulang.

11 Subali’t nang pumasok ang hari upang tingnan ang mga nakadulang, nakakita siya roon ng isang taong hindi ¹nakadamit pangkasalan;

12 At sinasabi niya sa kanya, Kaibigan, papaano ka nakapasok dito nang hindi nakadamit pangkasalan? At siya ay naumid.

13 Noon nga ay sinabi ng hari sa ¹mga naglilingkod, Gapusin ninyo ang kanyang mga paa at mga kamay, at ²itapon ninyo siya sa kadiliman sa labas; doroon ang ³pagtangis at ang pagngangalit ng mga ngipin.

14 Sapagka’t marami ang ¹tinawag, subali’t kakaunti ang mga ¹nahirang.

15 Noon nga ay nagsialis ang ¹mga Fariseo at nangagsanggunian kung papaanong Siya ay kanilang mahuhuli ²sa Kanyang pananalita.

16 At isinugo nila sa Kanya ang kanilang mga disipulo kasama ang ¹mga Herodiano, na nagsisipagsabi, Guro, nalalaman namin na Ikaw ay tapat, at itinuturo Mo ang daan ng Diyos sa katotohanan at hindi Ka nangingimi kanino man, sapagka’t hindi ka ²nagtatangi ng tao.

17 Sabihin mo nga sa amin, Ano sa palagay mo? ¹Marapat bang magbigay ng buwis kay Cesar, o hindi?

18 Subali’t napagkikilala ni Hesus ang kanilang kasamaan, at nagsabi, Bakit ninyo Ako tinutukso, mga ¹mapagkunwari?

19 ¹Ipakita ninyo sa Akin ang salaping pambuwis. At dinala nila sa Kanya ang isang denario.

20 At sinasabi Niya sa kanila, Kaninong larawan at inskripsiyon ito?

21 Kanilang sinasabi, Kay Cesar. Pagkatapos sinasabi Niya sa kanila, Kung gayon ay ibayad ninyo kay Cesar ¹ang kay Cesar, at sa Diyos ²ang sa Diyos.

22 At nang ito ay marinig nila, sila ay nanggilalas, at Siya ay iniwanan nila at nagsialis.

23 Nang araw na yaon ay nilapitan Siya ng mga ¹Saduceo, na nagsasabing walang pagkabuhay na muli, at nagsipagtanong sa Kanya,

24 Na nagsasabi, Guro, sinabi ni Moises, Kung ang sinuman ay mamatay nang walang mga anak, pakakasalan ng kanyang kapatid na lalake ang kanyang asawa at magbabangon ng binhi sa kanyang kapatid na lalake.

25 Noon ay may pitong magkakapatid na lalake na kasama namin, at ang una ay nag-asawa at namatay; at dahil sa hindi nagkabinhi, iniwan niya ang kanyang asawa sa kanyang kapatid na lalake;

26 Gayundin naman ang ikalawa at ikatlo hanggang sa ikapito.

27 At sa kahuli-hulihan ay namatay ang babae.

28 Kaya’t sa pagkabuhay na muli, sino sa pito ang kanyang magiging asawa? Sapagka’t siya ay napangasawa nilang lahat.

29 Subali’t sumagot si Hesus at sinabi sa kanila, Kayo ay nangagkakamali, sa hindi ¹pagkaalam ng mga Kasulatan ni ng kapangyarihan ng Diyos.

30 Sapagka’t sa pagkabuhay na muli ay hindi na sila mag-aasawa ni pag-aasawahin kundi tulad na ng mga anghel sa langit.

31 Subali’t hinggil sa pagkabuhay na muli ng mga patay, hindi ba ninyo nabasa ang sinalita sa inyo ng Diyos, na nagsasabing,

32 Ako ang Diyos ni Abraham, at ang Diyos ni Isaac, at ang Diyos ni Jacob? Siya ay hindi ang Diyos ng mga patay, kundi ng mga ¹buhay.

33 At nang marinig ito ng mga kalipunan, sila ay lubhang namangha sa Kanyang pagtuturo.

34 Subali’t nang marinig ng mga Fariseo na napatahimik Niya ang mga Saduceo, sila ay nagtipun-tipon,

35 At isa sa kanila, isang ¹tagapagtanggol ng kautusan, ang nagtanong sa Kanya ng isang katanungan, na tinutukso Siya:

36 Guro, aling utos ang pinakadakila sa kautusan?

37 At sinabi Niya sa kanya, Iyong mamahalin ang Panginoon mong Diyos nang ¹buong puso mo, at nang buong kaluluwa mo, at nang buong kaisipan mo.

38 Ito ang pinakadakila at pinakaunang utos.

39 At ang pangalawa ay katulad nito: Mahalin mo ang iyong kapwa tulad sa iyong sarili.

40 Sa ¹dalawang utos na ito nakasalig ang lahat ng kautusan at ang mga propeta.

41 Ngayon samantalang nagkakatipon ang mga Fariseo, tinanong sila ni Hesus,

42 Na nagsasabi, Ano ang palagay ninyo hinggil sa ¹Kristo? Kanino Siyang Anak? Sinabi nila sa Kanya, Kay David.

43 Sinasabi Niya sa kanila, Papaano ngang sa ¹espiritu ay tinatawag Siya ni David na Panginoon, na sinasabi,

44 Sinabi ng Panginoon sa Aking Panginoon, Maupo Ka sa Aking kanan hanggang sa ilagay Ko ang Iyong mga kaaway sa ilalim ng Iyong mga paa?

45 Kaya’t kung tinatawag Siyang ¹Panginoon ni David, papaanong Siya ay kanyang ¹Anak?

46 At ¹walang sinumang nakasagot sa Kanya ng isang salita, ni nangahas man ang sinuman na Siya ay tanungin pa mula sa araw na yaon.