Mateo 19

1 At nangyari, nang matapos ni Hesus ang mga salitang ito, umalis Siya sa Galilea at nagtungo sa mga hangganan ng Judea sa kabilang ibayo ng Jordan.

2 At sinundan Siya ng malaking kalipunan, at sila ay pinagaling Niya roon.

3 At nagsilapit sa Kanya ang mga Fariseo, ¹tinutukso Siya at nagsasabi, Naaayon ba sa kautusan para sa isang lalake na ²ihiwalay ang kanyang asawa sa bawa’t kadahilanan?

4 At sumagot Siya at nagsabi, Hindi ba ninyo nabasa na ¹Siya na lumikha sa kanila buhat sa pasimula ay ginawa silang lalake at babae,

5 At sinabi, Dahil dito ay iiwanan ng lalake ang kanyang ama at ina at pipisan sa kanyang asawa; at ang dalawa ay magiging isang laman

6 Kung kaya’t hindi na sila dalawa, kundi isang laman. Kaya’t ang pinamatok-na-magkasama ng Diyos ay huwag paghihiwalayin ng tao.

7 Kanilang sinabi sa Kanya, Bakit kung gayon ¹ipinag-utos ni Moises na bigyan siya ng isang kasulatan ng paghihiwalay at ihiwalay siya?

8 Sinasabi Niya sa kanila, Dahilan sa katigasan ng inyong puso ay pinahintulutan kayo ni Moises, na ihiwalay ang inyong mga asawa, subali’t buhat sa ¹pasimula ay hindi gayon.

9 Subali’t sinasabi Ko sa inyo na ang sinumang ihinihiwalay ang kanyang asawa, maliban sa ¹pakikiapid, at mag-asawa sa iba, ay nakagagawa ng ¹pangangalunya; ²at ang mag-asawa sa kanya na inihiwalay ay nakagagawa ng pangangalunya.

10 Sinasabi sa Kanya ng mga disipulo, Kung ¹ganyan ang kalagayan ng lalake sa kanyang asawa, mabuti pang huwag nang mag-asawa.

11 At sinabi Niya sa kanila, ¹Hindi lahat ng mga tao ay makatatanggap ng pananalitang ito, subali’t yaong mga pinagkalooban nito.

12 Sapagka’t may mga bating na ipinanganak na gayon mula sa sinapupunan ng kanilang mga ina, at may mga bating na ginawang bating ng mga tao, at may mga bating ¹na nagpakabating sa kanilang sarili dahil sa ²kaharian ng mga kalangitan. Siya na may kakayahang tumanggap nito, hayaan siyang tumanggap nito.

13 Noon nga ay dinala sa Kanya ang ilang maliliit na bata upang maipatong Niya ang Kanyang mga kamay sa kanila at maipanalangin, at pinagsabihan sila ng mga disipulo.

14 Subali’t sinabi ni Hesus, Pabayaan ninyo ang maliliit na bata at huwag ninyong hadlangan silang makalapit sa Akin, sapagka’t sa mga ¹gayon ang kaharian ng mga kalangitan.

15 At ipinatong Niya ang Kanyang mga kamay sa kanila, at umalis doon.

16 At narito, nilapitan Siya ng isa at nagsabi, Guro, anong mabuting bagay ang dapat kong gawin upang ako ay ¹magkaroon ng buhay na walang hanggan?

17 At sinabi Niya sa kanya, Bakit mo Ako tinatanong kung ano ang mabuti? ¹Iisa ang ²mabuti. Subali’t kung nais mong ³pumasok tungo sa buhay, ⁴sundin mo ang mga utos.

18 Sinasabi niya sa Kanya, Alin-alin? At sinabi ni Hesus, Huwag kang papatay; huwag kang mangangalunya; huwag kang magnanakaw; huwag kang sasaksi sa hindi katotohanan;

19 Igalang mo ang iyong ama at ina; at mahalin mo ang iyong kapwa nang tulad sa iyong sarili.

20 Sinasabi sa Kanya ng binata, Ang lahat ng mga bagay na ito ay nasunod ko na; ano pa ang kulang ko?

21 Sinabi sa kanya ni Hesus, Kung nais mong maging ¹sakdal, humayo ka, ipagbili mo ang iyong ari-arian at ibigay sa mga dukha, at magkakaroon ka ng kayamanan sa langit, at pumarito ka, at ²sumunod sa Akin.

22 Subali’t nang marinig ng binata ang pananalitang ito, umalis siyang ¹namamanglaw, sapagka’t marami siyang ari-arian.

23 At sinabi ni Hesus sa Kanyang mga disipulo, Katotohanang sinasabi Ko sa inyo, mahirap makapasok sa kaharian ng mga kalangitan ang isang mayaman.

24 At muling sinasabi Ko sa inyo, ¹Higit na madali sa isang kamelyo ang dumaan sa butas ng karayom kaysa sa pumasok sa kaharian ng ²Diyos ang isang mayaman.

25 At nang marinig ito ng mga disipulo, sila ay lubhang nagtaka at nagsabi, Sino kung sa gayon ang ¹maliligtas?

26 At tumingin sa kanila si Hesus at sinabi sa kanila, Sa mga tao ito ay ¹imposible, subali’t sa Diyos ang lahat ng mga bagay ay ¹posible.

27 Noon nga ay sumagot si Pedro at sinabi sa Kanya, Narito, iniwanan namin ang lahat at sumunod sa Iyo. Ano naman ang para sa amin?

28 At sinabi sa kanila ni Hesus, Katotohanang sinasabi Ko sa inyo na kayong nagsisunod sa Akin, sa ¹pagpapanumbalik, kapag ang Anak ng Tao ay luluklok sa trono ng Kanyang kaluwalhatian, kayo rin ay luluklok sa labindalawang trono, ²hahatulan ang labindalawang lipi ng Israel.

29 At ang bawa’t mag-iwan ng mga bahay o mga kapatid na lalake o mga kapatid na babae o ama o ina o mga anak, o mga lupa dahil sa Aking pangalan ay ¹tatanggap ng ²makasandaan at ³magmamana ng buhay na walang hanggan.

30 Subali’t maraming ¹nauuna na magiging huli, at mga nahuhuli na magiging una.