Marcos 16

1 ¹At nang makaraan ang Sabbath, si Maria Magdalena, at si ²Mariang ina ni Santiago, at si ³Salome ay nagsibili ng mga espesiya, upang sila ay magsiparoon at Siya ay ⁴pahiran.

2 At maagang-maaga ng unang araw ng sanlinggo, nagsiparoon sila sa libingan nang makasikat na ang araw.

3 At sila ay nagusap-usap, Sino kaya ang ating mapapakiusapang magpagulong ng bato mula sa pintuan ng libingan?

4 At pagkatanaw ay nakita nilang naigulong na ang bato, sapagka’t yaon ay totoong malaki.

5 At pagkapasok sa libingan, kanilang nakita ang isang binatang nakaupo sa dakong kanan, nararamtan ng isang puting damit, at sila ay nangagitla.

6 At sinasabi niya sa kanila, Huwag kayong mangagitla; hinahanap ninyo si Hesus, ang Nazareno, na ipinako sa krus. Siya ay ¹ibinangon! Wala Siya rito! Tingnan ninyo ang dakong pinaglagyan nila sa Kanya.

7 Datapuwa’t magsiyaon kayo, sabihin ninyo sa Kanyang mga disipulo at kay ¹Pedro na Siya ay mauuna sa inyo sa Galilea; doon ninyo Siya makikita, ayon sa sinabi Niya sa inyo.

8 At sila ay nagsilabas at nagsitakas mula sa libingan, sapagka’t sila ay ¹nasunggaban ng pagkatakot at pagkagitla; at hindi sila nagsabi ng anuman sa kanino man, sapagka’t sila ay nangatakot.

9 ¹At nang Siya nga ay magbangon nang maaga ng unang araw ng sanlinggo, nagpakita muna Siya kay Maria Magdalena, na kung kanino ay pitong demonyo ang ²pinalayas Niya.

10 Yumaon siya at ibinalita sa mga yaon na naging kasamahan Niya, samantalang sila ay nangahahapis at nagsisitangis.

11 At sila, nang kanilang mabalitaan na Siya ay nabubuhay at nakita niya, ay hindi nagsipaniwala.

12 At pagkatapos ng mga bagay na ito, nagpakita Siya sa ibang anyo sa dalawa sa kanila nang sila ay nangaglalakad patungo sa bukid.

13 At nagsiyaon sila at ibinalita ito sa iba; subali’t sila ay hindi rin nila pinaniwalaan.

14 At pagkatapos, Siya ay nagpakita sa labing-isa samantalang sila ay nangakahilig sa dulang; at Kanyang pinagwikaan sila sa kawalan nila ng pananampalataya at katigasan ng puso, sapagka’t hindi sila nagsipaniwala sa nangakakita sa Kanya pagkatapos na Siya ay magbangon mula sa mga patay.

15 At sinabi Niya sa kanila, Magsiyaon kayo sa buong sanlibutan at inyong ¹ipahayag ang ebanghelyo sa lahat ng ²nilikha.

16 Ang ¹sumasampalataya at mabautismuhan ay maliligtas, datapuwa’t ang ²hindi sumasampalataya ay makokondena.

17 At sasamahan ng mga tandang ito ang mga nagsisisampalataya: sa Aking pangalan ay magpapalayas sila ng mga demonyo; ¹mangagsasalita sila ng mga bagong wika;

18 Sila ay magsisipagdampot ng mga ahas; at kung makainom sila ng bagay na nakamamatay, sa anumang paraan ay hindi makasásamâ sa kanila; ipapatong nila ang kanilang mga kamay sa mga maysakit at sila ay magsisigaling.

19 Ang Panginoong Hesus nga, pagkatapos na makausap sila, ay ¹kinuhang paakyat tungo sa langit at lumuklok sa kanan ng Diyos.

20 Datapuwa’t nagsialis sila at ¹nagsipagpahayag sa lahat ng dako, gumagawang kasama nila ang Panginoon at pinatototohanan ang salita sa pamamagitan ng mga tandang kalakip.