Lucas 16

1 ¹At sinabi rin naman Niya sa mga disipulo, May isang mayaman na may isang ²katiwala, at isinumbong sa kanya na nilulustay nito ang kanyang mga ari-arian.

2 At kanyang tinawag siya at sa kanya ay sinabi, Ano itong nababalitaan ko tungkol sa iyo? Magbigay-sulit ka sa pagiging katiwala, sapagka’t hindi ka na maaaring maging katiwala pa.

3 At sinabi ng katiwala sa kanyang sarili, Anong gagawin ko, yamang inaalis sa akin ng panginoon ko ang pagiging katiwala? Wala akong sapat na lakas upang ¹magbungkal. Ako ay nahihiyang ²magpalimos.

4 Alam ko na ang gagawin ko, upang kung mapaalis ako sa pagiging katiwala, ako ay ¹matanggap nila sa kanilang mga tahanan.

5 At tinawag niya ang bawa’t isa sa mga may utang sa kanyang panginoon, at sinabi sa una, Gaano ang utang mo sa aking panginoon?

6 At sinabi niya, Isang daang ¹takal ng langis. At sinabi niya sa kanya, Abutin mo ang iyong kasulatan, at maupo kang madali at isulat mong limampu.

7 At sinabi naman niya sa isa, At ikaw, gaano ang utang mo? At sinabi niya, Isang daang ¹takal ng trigo. Sinabi niya sa kanya, Abutin mo ang iyong kasulatan, at isulat mong walumpu.

8 At pinuri ng panginoon ang likong katiwala sapagka’t siya ay gumawang may ¹maingat-na-katalinuhan. Sapagka’t ang mga ²anak ng ^bkapanahunang ito ay higit na may maingat-na-katalinuhan kaysa sa mga ³anak ng liwanag ⁴sa kanilang sariling henerasyon.

9 At sinasabi Ko sa inyo, ¹makipagkaibigan kayo sa pamamagitan ng mammon ng ²kalikuan, upang sa ³pagkawala ng kabuluhan nito, kanilang tanggapin kayo sa mga ⁴walang hanggang tabernakulo.

10 Ang tapat sa ¹pinakakaunti ay tapat din naman sa ¹marami; at ang di-matuwid sa pinakakaunti ay hindi rin naman matuwid sa marami.

11 Kung kayo nga ay hindi naging tapat sa di-matuwid na mammon, sino nga ang magtitiwala sa inyo ng mga ¹tunay na kayamanan?

12 At kung hindi kayo naging tapat sa kayamanan ng ¹iba, sino ang sa inyo ay magbibigay ng talagang para sa ²inyong sarili?

13 Walang alipin ang makapaglilingkod sa dalawang panginoon; sapagka’t kapopootan niya ang isa at ¹iibigin ang ikalawa, o di kaya ay ²kakapit sa isa at pawawalang halaga ang ikalawa. Hindi kayo makapaglilingkod nang sabay sa Diyos at sa mammon.

14 At napakinggan ng mga Fariseo, na pawang mangingibig ng salapi, ang lahat ng bagay na ito, at Siya ay ¹tinuya nila.

15 At sinabi Niya sa kanila, Kayo yaong mga nangag-aaring-matuwid sa inyong sarili sa paningin ng mga tao, datapuwa’t nakikilala ng Diyos ang inyong mga puso; sapagka’t ang dinadakila ng mga tao ay ¹kasuklam-suklam sa paningin ng Diyos.

16 Ang ¹kautusan at ang mga propeta ay ²hanggang kay Juan; mula noon, ang ³kaharian ng Diyos ay ipinahahayag bilang ⁴ebanghelyo at ang bawa’t isa ay ⁵nagpipilit na makapasok dito.

17 Subali’t higit na madali pa para sa langit at lupa ang mangawala kaysa sa ¹mahulog ang isang ²kudlit ng kautusan.

18 Ang bawa’t isa na ¹humihiwalay sa kanyang asawang babae at nag-aasawa sa iba ay nagkakasala ng pangangalunya; at ang mag-asawa sa babaeng hiniwalayan ng kanyang asawa ay nagkakasala ng pangangalunya.

19 Mayroon ngang ¹isang mayaman, at siya ay nagdaramit ng kulay ube at pinong lino, sa araw-araw ay marangyang nagsasaya.

20 At isang pulubing nagngangalang Lazaro ang itinapon sa kanyang pintuan, na lipos ng mga sugat,

21 At naghahangad na mabusog ng mga mumo na nangahuhulog mula sa dulang ng mayaman; at hindi lamang ito, ang mga aso ay dumating at hinimod ang kanyang mga sugat.

22 Ngayon ay nangyari nga na namatay ang pulubi, at siya ay dinala ng mga anghel sa ¹sinapupunan ni Abraham; at ang mayaman ay namatay rin at inilibing.

23 At sa gitna ng mga pagdurusa sa ¹Hades, tumingala siya at kanyang natanaw sa malayo si Abraham, at si Lazaro na nasa sinapupunan niya.

24 At siya ay tumawag at nagsabi, Amang Abraham, maawa ka sa akin, at suguin mo si Lazaro upang itubog niya sa tubig ang dulo ng kanyang daliri at palamigin ang aking ^bdila; sapagka’t naghihirap ako sa alab na ito.

25 Datapuwa’t sinabi ni Abraham, Anak, alalahanin mo na ikaw ay tumanggap ng iyong mabubuting bagay sa iyong pamumuhay, at si Lazaro sa gayon ding paraan ay masasamang bagay; datapuwa’t ngayon siya ay inaaliw rito, at ikaw ay nasa kahirapan.

26 At bukod sa lahat ng ito, sa pagitan natin ay may isang malaking ¹bangin na matibay na nakapirmi, upang ang mga gustong tumawid buhat dito hanggang sa inyo ay hindi makatatawid, at gayundin walang makatatawid mula diyan hanggang sa amin.

27 At sinabi niya, Ipinamamanhik ko nga sa iyo, Ama, na suguin mo siya sa bahay ng aking ama

28 Sapagka’t ako ay may limang kapatid na lalake upang siya ay tapat na magbabala sa kanila, baka pati sila ay mangaparito sa dakong ito ng pagdurusa.

29 Datapuwa’t sinabi ni Abraham, Nasa kanila si ¹Moises at ang mga Propeta; bayaan silang makinig sa kanila.

30 Subali’t sinabi niya, Hindi, Amang Abraham, nguni’t kung may isang mula sa mga patay ang pupunta sa kanila, sila ay magsisipagsisi.

31 Subali’t sinabi niya sa kanya, Kung hindi nila pinakikinggan si ¹Moises at ang mga Propeta, hindi rin sila mahihikayat kung may isang magbabangon mula sa mga patay.