Juan 2

1 At nang ¹ikatlong araw ay nagkaroon ng isang ²kasalan sa ³Cana ng ⁴Galilea, at naroon ang ina ni Hesus.

2 At inanyayahan din naman si Hesus, at ang Kanyang mga disipulo, sa kasalan.

3 At nang maubos ang ¹alak, ang ²ina ni Hesus ay nagsabi sa Kanya, Wala silang alak.

4 At sinabi sa kanya ni Hesus, ¹Babae, ²ano sa Akin at sa iyo? Ang Aking oras ay hindi pa dumarating.

5 Sinabi ng Kanyang ina sa mga ¹alila, Gawin ninyo ang anumang sabihin Niya sa inyo.

6 Mayroon nga roong ¹anim na tapayang bato na nalalagay alinsunod sa ²kaugaliang paglilinis ng mga Hudyo, na naglalaman ng ³dalawa o tatlong sukat ang bawa’t isa.

7 Sinabi sa kanila ni Hesus, Punuin ninyo ng ¹tubig ang mga tapayan. At kanilang pinuno ang mga yaon hanggang sa labi.

8 At sinabi Niya sa kanila, Kunin ninyo ngayon, at inyong dalhin sa pangulo ng kapistahan. At kanilang dinala.

9 At nang matikman ng pangulo ng kapistahan ang ¹tubig na naging alak, na hindi niya nalalaman kung saan buhat, datapuwa’t nalalaman ng mga alila na nagsikuha ng tubig, tinawag ng pangulo ng kapistahan ang kasintahang lalake,

10 At sinabi sa kanya, Ang bawa’t tao ay unang naghahain ng mabuting alak, at kapag nangakainom na nang mabuti ang mga tao, saka naghahain ng higit na mababa ang uri; iyong itinira ang mabuting alak hanggang ngayon.

11 Ang ¹pasimulang ito ng ²mga tanda ay ginawa ni Hesus sa Cana ng Galilea, at ³naghayag ng Kanyang kaluwalhatian, at nagsisampalataya ⁴sa Kanya ang Kanyang mga disipulo.

12 Pagkatapos nito ay bumaba Siya sa Capernaum, Siya at ang Kanyang ina, at ang Kanyang mga kapatid na lalake, at ang Kanyang mga disipulo; at sila ay ¹nangatira roon nang ilang araw.

13 At malapit na ang Paskua ng mga Hudyo, at umakyat si Hesus sa Herusalem.

14 At Kanyang nasumpungan sa ¹templo yaong nangagbibili ng mga baka at mga tupa at mga kalapati, at ang mga mamamalit ng salapi na nangakaupo.

15 At ¹pagkagawa Niya ng isang panghampas na yari sa ²mga lubid, Kanyang itinaboy ang lahat, kapwa ang mga tupa at ang mga baka, palabas ng templo, at isinabog Niya ang salapi ng mga mamamalit at itinaob ang kanilang mga dulang;

16 At sa nangagbibili ng mga kalapati ay sinabi Niya, Alisin ninyo rito ang mga bagay na ito; huwag ninyong gawing bahay-kalakal ang bahay ng Aking Ama.

17 Napag-alaala ng Kanyang mga disipulo na nasusulat, ¹Lalamunin Ako ng sikap ng Iyong bahay.

18 Ang mga Hudyo nga ay sumagot at nagsabi sa Kanya, Anong tanda ang ipakikita Mo sa amin, yamang ginawa Mo ang mga bagay na ito?

19 Sumagot si Hesus at sa kanila ay sinabi, Gibain ninyo ang ¹templong ito, at Aking itatayo ito ²sa loob ng tatlong araw.

20 Sinabi nga ng mga Hudyo, Apatnapu’t anim na taong itinayo ang templong ito, at itatayo Mo ito sa loob ng tatlong araw?

21 Datapuwa’t sinalita Niya ang tungkol sa templo ng Kanyang katawan.

22 Nang magbangon nga Siya mula sa mga patay, naalaala ng Kanyang mga disipulo na sinalita Niya ito, at nagsisampalataya sila sa Kasulatan at sa salitang sinabi ni Hesus.

23 Nang Siya nga ay nasa Herusalem nang Paskua, sa loob ng panahon ng kapistahan, marami ang mga nagsisampalataya ¹sa Kanyang pangalan, pagkakita nila sa mga tandang Kanyang ginawa.

24 Datapuwa’t sa Kanyang Sarili, hindi rin ipinagkatiwala ni Hesus ang Kanyang Sarili sa kanila, sapagka’t nakikilala Niya ang lahat ng mga tao,

25 Sapagka’t hindi Niya kinakailangan ang sinuman na magpatotoo tungkol sa tao; sapagka’t nalalaman Niya Mismo ang nasasaloob ng tao.