Hebreo 13

1 Hayaang magpatuloy ang ¹pag-ibig sa mga kapatid.

2 Huwag ninyong kaligtaan ang pagpapatuloy sa mga bisitang-manlalakbay, sapagka’t sa pamamagitan nito ang iba ay nakapag-asikaso ng mga anghel nang hindi nalalaman ito.

3 ¹Alalahanin ninyo ang mga bilanggo, gaya ng kayo ay nagagapos na kasama nila, at ang mga pinagmamalupitan na gaya ng kayo naman ay pinagmamalupitan sa katawan.

4 Maging marangal nawa ¹sa lahat ang ²pag-aasawa, at huwag nawang magkadungis ang higaan; sapagka’t ang mga mapakiapid at ang mga mapangalunya ay pawang ³hahatulan ng Diyos.

5 Nawa ang inyong paraan ng pamumuhay ay walang ¹pag-ibig sa salapi, na nasisiyahan kayo sa inyong mga kalagayan; sapagka’t sinabi Niya, Sa anumang paraan ay hindi kita iiwanan, ni sa anumang paraan kita ay Aking pababayaan;

6 Kaya’t, ating masasabi nang buong tapang, Ang Panginoon ang aking Katulong; hindi ako matatakot. Ano ang magagawa sa akin ng tao?

7 ¹Alalahanin ninyo ang mga nangunguna sa inyo na siyang nangagsalita sa inyo ng salita ng Diyos, at sa pagsasaalang-alang sa kinalabasan ng kanilang pamumuhay, ay inyong tularan ang kanilang pananampalataya.

8 Si ¹Hesu-Kristo ay Siya ring kahapon, at ngayon, at magpakailanman.

9 Huwag kayong patangay sa mga ¹sari-sari at mga kakaibang pagtuturo, sapagka’t mabuti para sa puso ang ²mapagtibay ng biyaya, hindi ng mga ³pagkain, na di-pinakikinabangan ng mga ⁴nag-abala sa mga ito.

10 Tayo ay may isang ¹dambana kung saan walang karapatang kumain ang mga nagsisipaglingkod sa tabernakulo.

11 Sapagka’t ang mga ¹katawan ng mga hayop, na ang mga dugo ay dinadala ng mataas na saserdote tungo sa Dakong Kabanal-banalan na handog na patungkol sa kasalanan, ay sinusunog sa labas ng kampamento.

12 Kaya naman si Hesus, upang ¹mapaging-banal ang bayan sa pamamagitan ng Kanyang Sariling ²dugo, ay nagbata sa ²labas ng ³pintuang-bayan.

13 Atin ngang labasin Siya sa ¹labas ng ²kampamento na dinadala ang Kanyang pagkadusta.

14 Sapagka’t dito ay wala tayong ¹namamalaging lunsod, nguni’t ²hinahanap natin ang lunsod na darating.

15 ¹Sa pamamagitan nga Niya ay maghandog tayong palagi ng hain ng papuri sa Diyos, yaon ay, ang bunga ng mga labi na nagpapahayag ng Kanyang pangalan.

16 Datapuwa’t ang ¹paggawa ng mabuti at ang ²pagbabahagi sa iba ay huwag ninyong kalimutan, sapagka’t sa mga gayong hain ang Diyos ay totoong nalulugod.

17 ¹Magsitalima kayo sa mga nangunguna sa inyo at pasakop kayo sa kanila, sapagka’t pawang nangagpupuyat sila dahil sa inyong mga kaluluwa, bilang yaong mga magbibigay-sulit, upang ito ay gawin nilang may kagalakan, at hindi ng may hapis, sapagka’t ito ay magiging di-kapaki-pakinabang sa inyo.

18 ¹Ipanalangin ninyo kami, sapagka’t kami ay naniniwalang kami ay may mabuting budhi, nagnanasang sa lahat ng mga bagay ay igawi namin nang naaangkop ang aming mga sarili.

19 At lalong ipinamamanhik ko sa inyo na gawin ito, upang ako ay maibalik nang lalong madali sa inyo.

20 Ngayon ang Diyos ng kapayapaan na nag-akyat mula sa mga patay sa ating Panginoong Hesus, ang dakilang Pastol ng mga ¹tupa, ²sa pamamagitan ng dugo ng ³walang hanggang tipan,

21 Ay ¹sangkapan kayo sa bawa’t mabuting gawa para sa pagsasagawa ng Kanyang kalooban, na ²gumagawa sa loob natin ng lubhang nakalulugod sa Kanyang paningin sa pamamagitan ni Hesu-Kristo, na mapasa Kanya nawa ang kaluwalhatian magpakailanman, Amen.

22 Datapuwa’t ipinamamanhik ko sa inyo, mga kapatid, na inyong ¹pagtiisan ang salita ng pangaral, sapagka’t tunay ngang kayo ay sinulatan ko sa iilang salita.

23 Inyong talastasin na ang ating kapatid na si ¹Timoteo ay pinalaya na, na kung makararating siya nang madali, kayo ay makikita kong kasama siya.

24 ¹Batiin ninyo ang lahat ng mga nangunguna sa inyo, at ang lahat ng mga banal. Kayo ay binabati ng mga nagmula sa Italya.

25 Sumainyo nawang lahat ang ¹biyaya. Amen.