Mga Gawa 2

1 At nang ang araw ng ¹Pentecostes ay ginaganap na, silang lahat ay magkakasama sa isang lugar.

2 At biglang dumating ang isang ugong mula sa langit katulad ng isang humahagibis na malakas na ¹hangin, at ²pinuno nito ang buong bahay kung saan sila ay nangakaupo.

3 At sa kanila ay may nagpakitang mga ¹dilang tulad ng ²apoy na nagkabaha-bahagi at ³dumapo sa bawa’t isa sa kanila;

4 At silang ¹lahat ay ²nangapuspos ng Espiritu Santo, at sila ay nangagsimulang magsalita ng iba’t ibang ³wika, maging ayon sa ipinagkaloob ng Espiritu na kanilang ⁴salitain.

5 May mga ¹Hudyo ngang naninirahan sa Herusalem, mga lalakeng masipag sa kabanalan buhat sa bawa’t bansa sa ilalim ng langit.

6 At nang mangyari ang ugong na ito, ang maraming lipon ng mga tao ay nangagkatipon at nangamangha, sapagka’t narinig sila ng bawa’t isa na nagsasalita ng kanyang sariling diyalekto.

7 At silang lahat ay nagtaka at nanggilalas, na nagsasabi, Tingnan ninyo, hindi ba mga Galileo lahat ang mga nagsisipagsalitang ito?

8 At papaano ngang sila ay naririnig ng bawa’t isa sa atin sa ating sariling diyalektong kinamulatan natin.

9 Tayong mga Parto, at mga Medo, at mga Elamita, at mga nangananahan sa Mesopotamia, sa Judea at sa Capadocia, sa Ponto at sa Asia,

10 Kapwa sa Frigia at Pamfilia, sa Ehipto at sa mga bahagi ng Libya na karatig ng Cirene, at mga nakikipanirahang galing sa Roma, kapwa Hudyo at mga ¹kumbertido,

11 Mga Cretense at mga Arabe nangaririnig nating nagsisipagsalita sila sa ating mga ¹wika ng mga dakilang bagay ng Diyos?

12 At silang lahat ay nangagtaka at nangalito, na nagsasabi sa isa’t isa, Ano ang kahulugan nito?

13 Datapuwa’t ang mga iba ay nangaglilibak na nangagsabi, Sila ay puno ng ¹matamis na alak!

14 Datapuwa’t si Pedro, nakatayong kasama ng ¹labing-isa, ay nagtaas ng kanyang tinig at sa kanila ay nagsaysay na nagsasabing: Mga ginoo, mga Hudyo, at yaong lahat na nananahan sa Herusalem, hayaang malaman ninyo ito, at inyong pakinggan ang aking mga salita,

15 Sapagka’t ang mga taong ito ay hindi mga lasing katulad ng inyong inaakala, dahil ngayon ay ¹ikatlong oras lamang ng araw;

16 Datapuwa’t ito ay yaong sinalita na sa pamamagitan ng propeta Joel:

17 At mangyayari sa mga ¹huling araw, sabi ng Diyos, na ²ibubuhos Ko ³ang Aking Espiritu ⁴sa ⁵lahat ng laman, at ang inyong mga anak na lalake at babae ay ⁶mangagpopropesiya, at ang inyong mga binata ay mangakakakita ng mga pangitain, at ang inyong matatandang lalake ay magsisipanaginip ng mga panaginip;

18 At sa Aking mga lingkod, kapwa lalake at babae, Aking ibubuhos ang Aking Espiritu sa mga araw na yaon, at sila ay mangagpopropesiya.

19 At Ako ay ¹magpapakita ng mga kababalaghan sa langit sa itaas, at mga tanda sa lupa sa ibaba dugo at apoy at singaw ng usok.

20 Ang araw ay magiging kadiliman, at ang buwan ay magiging dugo, bago dumating ang ¹kaarawan ng Panginoon, ang dakila at natatanging araw.

21 At mangyayari na ang bawa’t isa, sinumang ¹tumatawag sa ²pangalan ng Panginoon, ay ³maliligtas.

22 Mga ginoo, mga Israelita, pakinggan ninyo ang mga salitang ito: si Hesus na Nazareno, isang ¹Taong ²pinatunayan ng Diyos sa inyo sa pamamagitan ng mga gawang makapangyarihan at mga kababalaghan at mga tanda, na ginawa ng Diyos sa pamamagitan Niya sa inyong gitna, gaya rin naman ng nalalaman ninyo—

23 Ang Taong ito, na ibinigay sa ¹takdang pasiya at ²paunang-kaalaman ng Diyos, kayo, sa pamamagitan ng mga kamay ng mga ³tampalasan, ay inyong ipinako sa ⁴krus at pinatay;

24 Ang Siyang ¹ibinangon ng Diyos, pinalaya sa mga hirap ng kamatayan, yamang ²hindi Siya maaaring mapigilan nito.

25 Sapagka’t sinasabi ni David tungkol sa Kanya, Nakita ¹kong lagi ang ²Panginoon sa aking harapan, sapagka’t ³Siya ay nasa aking kanan, upang ako ay huwag mauga.

26 Dahil dito ang aking puso ay nagalak at ang aking ¹dila ay natuwa; pati naman ang aking laman ay ²nahihimlay sa pag-asa,

27 Sapagka’t hindi Mo iiwan ang aking kaluluwa sa ¹Hades, ni ²papayagan Mo ang iyong ³Banal na Isa na makita ang ⁴kabulukan.

28 Ipinaalam Mo sa akin ang mga ¹daan ng buhay; gagawin Mo akong puspos ng kagalakan sa Iyong ²presensiya.

29 Mga ginoo, mga kapatid na lalake, hayaan ninyong magsalita ako sa inyo ng tungkol sa patriarkang si David, na siya ay kapwa namatay at inilibing, at ang kanyang puntod ay nasa atin hanggang sa araw na ito.

30 Kaya nga, palibhasa ay isang propeta at nakaaalam na ang Diyos ay may isinumpang panunumpa sa kanya na sa ¹bunga ng kanyang baywang ay iluluklok Niya ang Isa sa kanyang ²trono,

31 Siya, palibhasa ay nakikita na niya ito bago pa man, ay nagsalita tungkol sa pagkabuhay na muli ni Kristo, na Siya ay hindi pinabayaan sa Hades, ni nakita ng Kanyang laman ang kabulukan.

32 Ang Hesus na ito ay ¹ibinangon ng Diyos, at tungkol ²dito ay mga saksi kaming lahat.

33 Palibhasa ay naparangalan sa kanan ng Diyos, at natanggap ang ¹pangako ng Espiritu Santo mula sa Ama, ibinuhos Niya ito na inyong kapwa nakikita at naririnig.

34 Sapagka’t ¹hindi umakyat si David sa mga kalangitan, datapuwa’t siya rin mismo ang nagsasabi, Sinabi ng ²Panginoon sa aking Panginoon, Maupo Ka sa ³kanan Ko,

35 Hanggang sa ¹gawin Ko ang mga kaaway Mo na tuntungan ng Iyong mga paa.

36 Kaya hayaan ang buong sambahayan ni Israel na malaman nang may katiyakan na ginawa Siya ng Diyos na kapwa ¹Panginoon at Kristo—itong si Hesus na ²inyong ipinako sa krus.

37 At nang marinig nila ito, sila ay ¹tinablan sa puso, at sinabi kay Pedro at sa iba pang mga apostol, Ano ang gagawin namin, mga ginoo, mga kapatid na lalake?

38 At sinabi sa kanila ni Pedro, ¹Magsisi at ²magpabautismo, ang bawa’t isa sa inyo, ³sa ⁴pangalan ni Hesu-Kristo para sa ⁵ikapagpapatawad ng inyong mga kasalanan, at inyong matatanggap ang ⁶kaloob ng ⁷Espiritu Santo.

39 Sapagka’t sa ¹inyo ang ²pangako at sa inyong mga anak, at sa lahat noong ³nangasa malayo, ⁴maging ilan man ang tawagin ng Panginoon na ating Diyos sa Kanyang Sarili.

40 At sa iba pang maraming salita siya ay matapat na ¹nagpatotoo at namanhik sa kanila na nagsasabi, ²Magpaligtas kayo mula sa likong ³henerasyong ito!

41 Yaon ngang nagsitanggap ng kanyang salita ay ¹nangabautismuhan, at naidagdag nang araw na yaon ang may tatlong libong ²kaluluwa.

42 At sila ay nagsipanatiling matibay sa ¹pagtuturo at pagsasalamuha ng mga apostol, sa pagpipira-piraso ng tinapay at sa mga pananalangin.

43 At ang takot ay dumating sa bawa’t kaluluwa; at maraming ¹kababalaghan at mga tanda ang napangyayari sa pamamagitan ng mga apostol.

44 At yaong lahat ng mga nagsisampalataya ay nangagkatipon at lahat ng mga bagay na kanilang pag-aari ay ¹para sa lahat;

45 At ¹ipinagbili nila ang kanilang mga pag-aari at mga ari-arian at ipinamahagi sa kanilang lahat ayon sa pangangailangan ng bawa’t isa.

46 At araw-araw, nagsisipanatili silang matibay ng may isang puso’t kaisipan sa ¹templo, at sa ²pagpipira-piraso ng tinapay sa ³bahay-bahay, kanilang kinakain ang kanilang pagkain na may galak at ⁴katapatan ng puso,

47 Nagpupuri sa Diyos at ¹nagtatamo ng pagtangkilik ng buong bayan. At idinagdag nang ²magkasama sa kanila ng Panginoon yaong mga naliligtas araw-araw.