Mga Gawa 1

1 Ang ¹unang kasaysayan na ginawa ko, O ²Teofilo, tungkol sa lahat ng mga ³bagay na kapwa sinimulang gawin at ituro ni Hesus,

2 Hanggang sa araw na kinuha Siyang paitaas, pagkatapos makapagbigay ng utos sa pamamagitan ng ¹Espiritu Santo sa mga apostol na Kanyang hinirang;

3 Na sa kanila ay Kanyang ¹ipinakita ang Kanyang Sarili na buhay pagkatapos ng Kanyang paghihirap sa pamamagitan ng maraming kapani-paniwalang katunayan, sa loob ng ²apatnapung araw, ³nagpapakita sa kanila at nagpapahayag ng mga bagay tungkol sa ⁴kaharian ng Diyos.

4 At ¹nakikipagpulong sa kanila, inatasan Niya sila na huwag magsialis sa Herusalem, kundi maghintay sa ²pangako ng Ama, na, sinabi Niya, Inyong narinig mula sa Akin;

5 Sapagka’t si Juan ay tunay na nagbautismo sa ¹tubig, datapuwa’t hindi na magtatagal at kayo ay ²babautismuhan sa Espiritu Santo.

6 Kaya nang sila ay nangagkatipun-tipon, kanilang tinanong Siya, na nangagsasabi, Panginoon, itatatag Mo bang muli sa panahong ito ang ¹kaharian sa Israel?

7 Datapuwa’t sinabi Niya sa kanila, Hindi para sa inyo ang malaman ang mga panahon o mga bahagi ng panahon, na inilagay ng Ama sa Kanyang Sariling awtoridad.

8 Datapuwa’t inyong ¹tatanggapin ang kapangyarihan kapag ang Espiritu Santo ay ²dumapo sa inyo, at kayo ay magiging mga ³saksi Ko sa Herusalem, at sa buong Judea at Samaria, at ⁴hanggang sa kadulu-duluhang hangganan ng lupa.

9 At pagkasabi Niya ng mga bagay na ito, habang sila ay nakatingin, Siya ay itinaas, at kinuha Siya ng isang alapaap paitaas mula sa kanilang paningin.

10 At samantalang kanilang tinititigan ang langit habang Siya ay papalayo, narito, dalawang lalake na may puting damit ang nakatayo sa tabi nila,

11 Na nangagsabi rin, Kayong mga ginoong taga-Galilea, bakit kayo nangakatayong tumitingin sa langit? Itong Hesus na kinuha mula sa inyo patungo sa ¹langit, ay ²pariritong ³gaya rin ng inyong ⁴nakitang pagparoon Niya sa langit.

12 Nang magkagayon sila ay nangagsibalik sa ¹Herusalem buhat sa tinatawag na bundok ng Olivo, na malapit sa Herusalem, isang araw ng ²Sabbath na lakbayin.

13 At nang sila ay magsipasok, nagsiakyat sila sa silid sa itaas kung saan sila naninirahan, sina Pedro at Juan at Santiago at Andres, sina Felipe at Tomas, sina Bartolome at Mateo, si Santiago na anak ni Alfeo, at si Simon na ¹Masikap, at si Judas na ²anak ni Santiago.

14 Lahat sila ay ¹nagtitiyaga na may isang puso’t kaisipan sa ²pananalangin, kasama ang mga babae, at si ³Maria na ina ni Hesus, at ang Kanyang mga kapatid na lalake.

15 At sa mga araw na yaon, si Pedro ay tumayo sa gitna ng mga kapatid, (at doon ay nangagkatipon ang kalipunan ng mga ¹tao, na may isang daan at dalawampu) at ²nagsabi,

16 ¹Mga ginoo, mga kapatid, ang Kasulatan ay kinakailangang matupad, na sinalita nang una ng Espiritu Santo sa pamamagitan ng bibig ni David tungkol kay Judas, na siyang naging isang gabay sa mga nagsihuli kay Hesus.

17 Sapagka’t siya ay ibinilang sa atin, at siya ay binahaginan ng kanyang bahagi sa ¹ministeryong ito.

18 (Ngayon ang taong ito ay nagkamit ng isang pirasong lupa ¹na may kabayaran ng di-pagiging makatuwiran; at sa pagpapatihulog nang patiwarik, pumutok siya sa gitna, at ang lahat ng kanyang bituka ay sumambulat.

19 At ito ay nahayag sa lahat ng mga naninirahan sa Herusalem, sa gayon ang piraso ng lupang yaon ay tinawag sa kanilang sariling diyalekto na, ¹Akeldama, yaon ay, ang Parang ng ²Dugo.)

20 Sapagka’t nasusulat sa aklat ng Mga Awit, Hayaang maging liblib ang kanyang tahanan, at huwag hayaang manahan doon ang sinuman; at, Hayaang kunin ng iba ang kanyang katungkulan bilang ¹episkopo.

21 Kinakailangan kung gayon na sa mga taong nangakisama sa atin sa buong panahon nang ang Panginoong Hesus ay pumasok at lumabas ¹sa gitna natin,

22 Magmula sa pagbautismo ni Juan hanggang sa araw nang Siya ay kinuhang paitaas mula sa atin, isa sa mga ito ay nararapat maging isang saksi ng Kanyang ¹pagkabuhay na muli kasama natin.

23 At sila ay nagmungkahi ng dalawa, si Jose na tinatawag na Barsabas na may apelyidong Justo, at si Matias.

24 At sila ay nagsipanalangin, at nagsipagsabi, Ikaw Panginoon, Siyang nakatatalos sa mga puso ng lahat, ipakita Mo kung sino sa dalawang ito ang hinirang

25 Upang halinhan ang ministeryong ito at pagka-apostol na binalewala ni Judas upang makaparoon sa kanyang sariling kinalalagyan.

26 At sila ay nagbigay ng ¹palabunutan para sa kanila, at pinalad si Matias; at siya ay ibinilang kasama ng labing-isang apostol.