Galacia 2

1 Nang ¹makaraan nga ang labing-apat na taon ay umakyat akong muli sa Herusalem kasama si Bernabe, at isinama ko rin naman si Tito.

2 At ako ay umakyat ayon sa ¹pahayag, at isinaysay ko sa harapan nila ang ebanghelyo na aking ipinahahayag sa gitna ng mga Hentil, datapuwa’t sa harapan ng mga may dangal ay sa lihim, baka sa anumang paraan ako ay tumatakbo o tumakbo nang walang kabuluhan.

3 Datapuwa’t maging si Tito man, na kasama ko, gayong isang Griyego, ay ¹hindi napilit ²patuli.

4 At yaon ay dahil sa mga ¹huwad na kapatid, na ipinasok nang lihim, na panakaw na pumasok upang tiktikan ang aming ²kalayaan na taglay namin sa loob ni Kristo Hesus, upang kami ay madala nila sa ³pagkaalipin;

5 Sa mga yaon ay hindi kami napahinuhod na kami ay masupil kahit isang oras, upang ang katotohanan ng ¹ebanghelyo ay manatili sa inyo.

6 Datapuwa’t ang mga kinilalang may dangal (maging anuman sila, ay walang halaga sa akin; ang Diyos ay ¹hindi nagtatangi ng sinuman), silang may dangal, sinasabi ko, ay hindi nagbahagi sa akin ng anuman;

7 Kundi bagkus, nang makita nila na sa akin ay ipinagkatiwala ang ebanghelyo ng di-pagtutuli, gaya rin naman ng pagkakatiwala kay Pedro ng ebanghelyo ng pagtutuli,

8 (Sapagka’t Siyang gumawa kay Pedro sa pagkaapostol ng pagtutuli ay gumawa rin naman sa akin sa pagkaapostol sa mga Hentil),

9 ¹At nang malaman nila ang biyayang sa akin ay ipinagkaloob, sina ²Santiago at Cefas at Juan, na mga inaaring haligi, ang siyang nagbigay sa akin at kay Bernabe ng kanang kamay ng ipakikipagsalamuha, upang kami ay magsiparoon sa mga Hentil, at sila sa mga pagtutuli;

10 Ang kanila lamang hinihiling ay aming alalahanin ang mga dukha, na ang bagay na ito ay akin na ring pinagsikapang gawin.

11 Nguni’t nang dumating si Cefas sa Antioquia, sinalungat ko siya nang mukhaan, sapagka’t siya ay nararapat hatulan.

12 Sapagka’t bago nagsidating ang ilan ¹mula kay Santiago ay ²nakisalo siya sa mga Hentil; nguni’t nang sila ay nagsidating, siya ay ³umurong at humiwalay sa mga Hentil, palibhasa ay ³natatakot sa mga yaong sa pagtutuli.

13 At ang ¹ibang mga Hudyo ay ²nangagpakunwari rin namang kasama niya, anupa’t si ³Bernabe ay nadala sa kanilang pagkukunwari.

14 Nguni’t nang aking makita na hindi sila nagsilakad nang ¹matuwid ayon sa katotohanan ng ebanghelyo, sinabi ko kay Cefas sa harapan nilang lahat: Kung ikaw, gayong isang Hudyo, ay ²namumuhay gaya ng mga Hentil, at hindi gaya ng mga Hudyo, bakit mo pinipilit ang mga Hentil na ³mamuhay na gaya ng mga Hudyo?

15 Tayo ay mga Hudyo sa katutubo at hindi mga makasalanang Hentil,

16 Bagama’t naaalaman na ang isang tao ay hindi inaaring-matuwid sa pamamagitan ng mga gawa ng kautusan, kundi sa pamamagitan ng pananampalataya ¹kay Kristo Hesus; tayo rin ay nagsisampalataya ²kay Kristo Hesus upang tayo ay ariing-matuwid ³sa pamamagitan ng pananampalataya ¹kay Kristo at hindi ³sa pamamagitan ng mga gawa ng sa kautusan, sapagka’t ³sa pamamagitan ng mga gawa ng kautusan ay walang ⁴laman ang aariing-matuwid.

17 Nguni’t kung, samantalang ating pinagsisikapang maaring-matuwid sa loob ni Kristo, tayo rin naman ay nangasusumpungang mga makasalanan, si Kristo ba ay ¹ministro ng kasalanan? Tiyak na hindi!

18 Sapagka’t kung akin ngang ¹muling itatayo ang mga ²bagay na aking ³sinira, ako na rin ang nagpapatunay na ako ay isang manlalabag.

19 Sapagka’t ako ¹sa pamamagitan ng kautusan ay ²namatay sa kautusan upang ako ay ³mabuhay sa Diyos.

20 ¹Naipako na ako sa krus kalakip ni Kristo, at ²hindi na ako ang nabubuhay, kundi si ³Kristo ang nabubuhay sa akin; at ang ⁴buhay na ikinabubuhay ko ngayon sa laman ay ikinabubuhay ko sa ⁵pananampalataya, ang pananampalataya ⁶ng ⁷Anak ng Diyos, na ⁸umibig sa akin at nagbigay ng Kanyang Sarili para sa akin.

21 Hindi ko winawalang halaga ang ¹biyaya ng Diyos; sapagka’t kung ang ²katuwiran ay sa pamamagitan ng kautusan, kung gayon si Kristo ay namatay ³nang walang kabuluhan.