Galacia 1

1 ¹Si Pablo, isang apostol, ²hindi mula sa mga tao ni sa pamamagitan man ng tao, kundi sa pamamagitan ni Hesu-Kristo at ng Diyos Ama, na sa Kanya ay ³nagbangon mula sa mga patay,

2 At ang lahat ng mga ¹kapatid na kasama ko, sa ²mga ekklesia ng Galacia:

3 Sumainyo nawa ang ¹biyaya at ²kapayapaang mula sa Diyos na ating Ama at sa ating Panginoong Hesu-Kristo,

4 Na Siyang nagbigay ng Kanyang Sarili para sa ating mga kasalanan, upang tayo ay ¹mailigtas Niya palabas sa kasalukuyang masamang ²kapanahunan, ayon sa kalooban ng ating Diyos at Ama,

5 Na suma Kanya ang kaluwalhatian ¹magpakailanman. Amen.

6 Ako ay namangha na kay dali ninyong ¹nagsilipat buhat sa tumawag sa inyo ²sa loob ng ³biyaya ni Kristo tungo sa ⁴ibang ebanghelyo,

7 Na ito ay ¹hindi ibang ebanghelyo; kundi may ²ilang nanliligalig sa inyo, at nangag-iibig na ³ibahin ang ebanghelyo ni Kristo.

8 Datapuwa’t maging kami o isang anghel man mula sa langit ang mangaral sa inyo ng isang ebanghelyo na iba sa aming ipinangangaral sa inyo, ¹pakasumpain siya.

9 Ayon sa aming sinabi noong ¹una, ngayon ay muli kong sinasabi, Kung ang sinuman ay mangangaral sa inyo ng isang ebanghelyo na iba sa tinanggap na ninyo, ²pakasumpain siya.

10 Sapagka’t ¹hinihikayat ko ba ngayon ang mga tao o ang Diyos? O ako ba ay nagsisikap na magbigay-lugod sa mga tao? Kung ako ay nagbibigay-lugod pa sa mga tao, hindi ako magiging alipin ni Kristo.

11 Sapagka’t aking ipinatatalastas sa inyo, mga kapatid, ang tungkol sa ebanghelyo na aking ipinahayag, na ito ay hindi ayon sa tao.

12 Sapagka’t ¹hindi ko tinanggap ito mula sa tao, ni itinuro man sa akin, kundi aking tinanggap sa pamamagitan ng ²pahayag ni Hesu-Kristo.

13 Sapagka’t inyong nabalitaan ang aking pamumuhay noong nakaraang panahon sa ¹Hudaismo, na aking inusig ang ekklesia ng Diyos nang labis at pinuksa ito;

14 At ako ay sumulong sa Hudaismo nang higit kaysa sa marami sa aking mga kasinggulang sa aking mga kalahi, palibhasa ay lubhang higit na ¹masikap ako sa mga ²tradisyon ng aking mga magulang.

15 Nguni’t nang ¹ikinalugod ito ng Diyos, na Siyang sa akin ay ²nagbukod ³buhat pa sa sinapupunan ng aking ina, at ako ay ⁴tawagin sa pamamagitan ng Kanyang ⁵biyaya,

16 Na ¹ihayag ang Kanyang ²Anak ³sa loob ko, upang ⁴Siya ay aking maipangaral sa mga ⁵Hentil, kapagdaka ay ⁶hindi ako sumangguni sa laman at sa dugo,

17 Ni hindi ako umakyat sa Herusalem sa yaong mga apostol na nangauna sa akin, sa halip ay naparoon ako sa ¹Arabia, at muling nagbalik sa Damasco.

18 Nang makaraan nga ang tatlong taon ay umakyat ako sa Herusalem upang ¹dalawin si Cefas, at tumira akong kasama niya ng labinlimang araw.

19 Nguni’t wala akong nakitang ibang mga apostol ¹maliban kay Santiago na kapatid ng Panginoon.

20 Tungkol nga sa mga bagay na isinusulat ko sa inyo, narito, sa harapan ng Diyos, hindi ako nagsisinungaling.

21 Pagkatapos ay naparoon ako sa mga rehiyon ng ¹Siria at Cilicia.

22 At ¹hindi pa ako nakikilala sa mukha ng mga ekklesia ng Judea na pawang kay Kristo;

23 Kundi kanila ¹lamang narinig na yaong umusig sa atin noong una, ngayon ay nangangaral ng ²pananampalataya na noong nakaraang panahon ay kanyang pinuksa.

24 At kanilang niluwalhati ang Diyos sa akin.