Filipos 1

1 Si Pablo at si Timoteo, mga alipin ni Kristo Hesus, sa lahat ng mga banal kay Kristo Hesus na nangasa ¹Filipos, ²kasama ang mga ³episkopo at ang mga ⁴diyakono:

2 Sumainyo nawa ang ¹biyaya at ²kapayapaang mula sa Diyos na ating Ama at sa Panginoong Hesu-Kristo.

3 Nagpapasalamat ako sa aking Diyos, sa tuwing kayo ay aking naaalaala,

4 Na parating sa bawa’t daing ko ay masayang nananaing ako patungkol sa inyong lahat,

5 Dahil sa inyong ¹pakikipagsalamuha tungo sa ikalalaganap ng ²ebanghelyo, mula nang unang araw hanggang ngayon,

6 Na ako ay may lubos na pagtitiwala sa mismong bagay na ito, na lulubusin ng Nagsimula sa inyo nito ang mabuting gawa hanggang sa araw ni Kristo Hesus;

7 Gaya ng matuwid na aking isiping gayon tungkol sa inyong lahat, sapagka’t ako ay nasa inyong puso, yamang kapwa sa aking mga tanikala at ¹pagsasanggalang at sa pagpapatunay naman sa ebanghelyo, kayong lahat ay ²aking mga ³kabahagi sa biyaya.

8 Sapagka’t saksi ko ang Diyos, kung gaano ang pananabik ko sa inyong lahat sa mga ¹panloob na bahagi ni Kristo Hesus.

9 At ito ay idinadalangin ko, na nawa ang inyong pag-ibig ay lalu’t lalo pang sumagana sa ¹lubos na kaalaman at sa lahat ng ²pagkakilala,

10 Upang inyong mapatunayan, sa pamamagitan ng pagsubok, ang mga bagay na ¹naiiba, upang kayo ay maging ²dalisay at ³walang pagsalansang hanggang sa araw ni Kristo,

11 Na nangapuspos ng ¹bunga ng katuwiran, na ito ay sa pamamagitan ni Hesu-Kristo, sa ikaluluwalhati at ikapupuri ng Diyos.

12 Ngayon, ibig ko na inyong maalaman, mga kapatid, na ang mga bagay na nangyari sa akin ay nangyari sa lalong ¹ikasusulong ng ebanghelyo,

13 Anupa’t ang aking mga tanikala kay Kristo ay nahayag sa lahat ng ¹pretoryo at sa iba pa;

14 At ang karamihan sa mga kapatid, palibhasa ay may pagtitiwala sa Panginoon sa aking mga tanikala, ay lalong nagkaroon ng tapang upang salitain nang walang takot ang salita ng Diyos.

15 Tunay na ipinapahayag ng ¹ilan si Kristo dahil sa pananaghili at sa ²pakikipagtalo, at ng ³ilan naman sa mabuting kalooban:

16 Tunay na ang mga ito ay gumagawa mula sa pag-ibig, palibhasa ay nalalaman na ako ay nalalagay sa pagsasanggalang ng ebanghelyo;

17 Datapuwa’t itinatanyag ng ilan si Kristo dahil sa ¹pakikipagtunggalian, hindi sa kadalisayan, na ang iniisip ay dalhan ako ng ²kapighatian sa aking mga tanikala.

18 Ano nga? Gayunpaman, sa lahat ng paraan, maging sa pagkukunwari o sa katotohanan, ay ipinapahayag si Kristo, at sa ganito ay ¹nagagalak ako, oo, at ako ay magagalak;

19 Sapagka’t nalalaman ko na ang kahihinatnan nito ay sa aking ¹ikaliligtas, sa pamamagitan ng ²inyong pananaing at ng ³masaganang panustos ng ⁴Espiritu ni Hesu-Kristo,

20 Ayon sa aking maningas na paghihintay at pag-asa na sa anuman ay hindi ako mapahiya, kundi sa buong katapangan, na gaya ng dati, gayundin naman ngayon, ay ¹dadakilain si Kristo sa aking katawan, maging sa pamamagitan ng buhay o sa pamamagitan ng kamatayan;

21 Sapagka’t sa ganang akin ang ¹mabuhay ay si Kristo, at ang mamatay ay ²pakinabang.

22 Nguni’t kung ang mabuhay sa laman, ito sa akin ay bunga ng pagpapagal, at kung ano ang aking pipiliin, hindi ko na nga masabi.

23 Sapagka’t ako ay nagigipit sa magkabila, may nasa akong ^aumalis at ¹suma kay Kristo, sapagka’t ito ay lalong mabuti;

24 Gayunman, ang manatili sa laman ay siyang lalong kinakailangan ¹dahil sa inyo.

25 At sa pagtitiwalang ito, aking nalalaman na ako ay mananatili at magpapatuloy na kasama ninyong lahat sa ¹ikasusulong ninyo at sa ikagagalak sa ²pananampalataya,

26 Upang managana ang inyong ¹pagmamapuri kay Kristo Hesus sa akin sa pamamagitan ng aking pagharap na muli sa inyo.

27 Ang inyo lamang pamumuhay ay maging karapat-dapat sa ebanghelyo ni Kristo, upang maging ako ay dumating at kayo ay makita, o wala man sa harap ninyo, ay mabalitaan ko ang inyong kalagayan, na kayo ay tumatayong matibay sa iisang espiritu, na kayo ay ¹nangagkakaisa sa kaluluwa na ²nagsisikap nang sama-sama sa ³pananampalataya ng ebanghelyo;

28 At sa anuman ay huwag kayong matakot ng mga kaaway, na ito sa kanila ay malinaw na tanda ng ¹kapahamakan, datapuwa’t tanda ng inyong ²pagkaligtas, at ito ay mula sa Diyos;

29 Sapagka’t sa inyo ay ipinagkaloob ito, alang-alang kay Kristo, hindi lamang upang manampalataya ¹sa Kanya, bagkus upang ²magdusa rin naman alang-alang sa Kanya,

30 Yamang taglay ninyo ang gayunding pakikipagbuno na inyong nakita rin sa ¹akin, at ngayon ay nababalitaan ninyong taglay ko.