Efeso 6

1 Mga ¹anak, ²sa loob ng Panginoon ay magsitalima kayo sa inyong mga magulang, sapagka’t ito ay ³matuwid.

2 ¹Igalang mo ang iyong ama at ina, na siyang ²unang utos na may pangako,

3 Upang ¹maging mabuti para sa iyo, at ikaw ay ¹mabuhay nang malawig sa lupa.

4 At kayong mga ama, huwag ninyong ¹mungkahiin ang inyong mga anak sa galit, kundi inyong ²palakihin sila ayon sa disiplina at ³saway ng Panginoon.

5 Mga ¹alipin, ²magsitalima kayo sa mga yaong ayon sa laman ay inyong mga Panginoon, na may ³takot at panginginig, sa ⁴katapatan ng inyong puso, ⁵na gaya ng pagtalima kay Kristo;

6 Hindi nang may ¹paglilingkod-sa-paningin, na gaya ng mga nagbibigay-lugod sa mga tao, kundi bilang mga alipin ni Kristo, na gumagawa ng kalooban ng Diyos ²mula sa kaluluwa,

7 Naglilingkod bilang mga alipin nang may mabuting kalooban, na gaya ng paglilingkod ¹sa Panginoon at hindi sa mga tao,

8 Yamang napag-aalaman na anumang mabuting bagay na gawin ng bawa’t isa, ¹ito ang tatanggapin niya sa Panginoon, maging alipin o malaya.

9 At kayong mga panginoon, gayundin ang inyong gawin sa kanila, at ¹iwan ninyo ang mga pagbabanta, yamang napag-aalaman na ang Panginoon nila at ninyo ay nasa kalangitan, at sa Kanya ay walang pagtatangi ng mga tao.

10 ¹Sa katapus-tapusan, ²magpakalakas kayo sa loob ng ³Panginoon at sa kapangyarihan ng Kanyang kalakasan.

11 ¹Mangagbihis kayo ng ²buong kutamaya ng Diyos, upang kayo ay ³makatayo laban sa mga ⁴lalang ng Diyablo;

12 Sapagka’t ang ating pakikipagbuno ay hindi laban sa ¹dugo at laman, kundi laban sa mga ²pinuno, laban sa mga awtoridad, laban sa mga pinuno ng sanlibutan ng ³kadilimang ito, laban sa mga espirituwal na puwersa ng kasamaan sa ⁴sangkalangitan.

13 Dahil dito kunin ninyo ang ¹buong kutamaya ng Diyos, upang kayo ay ²makatagal sa ³araw na masama, at kung magawa na ang lahat, ay ⁴tumayo nga nang matibay.

14 Samakatuwid, tumayo kayo, ¹na ang inyong mga baywang ay ²nabibigkisan ng ³katotohanan, at ⁴suot ang baluti ng katuwiran,

15 At ang inyong mga paa ay ¹nasasapnan ng ²matibay na pundasyon ng ebanghelyo ng kapayapaan;

16 Bukod pa sa mga ito, ¹kinukuha ang kalasag ng ²pananampalataya, na siyang ipampapatay ninyo sa lahat ng ³nagliliyab na suligi ng masamang isa.

17 At ¹tanggapin ang ²turbante ng kaligtasan, at ang ³tabak ng Espiritu ⁴na siyang ⁵salita ng Diyos,

18 Sa pamamagitan ng lahat ng panalangin at daing, nananalangin sa bawa’t panahon sa ¹espiritu, at ²nangagpupuyat tungo dito sa ³buong katiyagaan at ⁴daing patungkol sa lahat ng mga banal;

19 At sa akin, upang ako ay pagkalooban ng ¹pananalita sa pagbuka ng aking bibig, upang ipakilala nang may katapangan ang ²hiwaga ng ebanghelyo,

20 Na dahil dito, ako ay isang ¹sugong ²natatanikalaan, upang sa ³ganito ako ay magsalita nang may katapangan, gaya ng nararapat sa aking salitain.

21 Datapuwa’t upang mangaalaman naman ninyo ang mga bagay na ukol sa akin, at ang ginagawa ko, si Tiquico na aking minamahal na kapatid at tapat na ¹lingkod sa Panginoon, ang siyang ²magbibigay-alam sa inyo ng lahat ng mga bagay;

22 Na siyang aking isinugo sa inyo sa bagay na ito, upang malaman ninyo ang aming kalagayan, at upang kanyang aliwin ang inyong mga puso.

23 ¹Kapayapaan nawa sa mga kapatid, at ²pag-ibig na may pananampalataya, ³mula sa Diyos Ama at mula sa Panginoong Hesu-Kristo.

24 Ang ¹biyaya nawa ay mapasa lahat ng mga ²nagsisiibig sa ating Panginoong Hesu-Kristo sa loob ng ³walang pagkasira.