Efeso 5

1 Kayo nga ay ¹magsitulad sa Diyos, yamang kayo ay mga anak na minamahal;

2 At magsilakad kayo sa loob ng ¹pag-ibig, gaya rin naman ng pagkakaibig ni ²Kristo sa inyo, at ibinigay ang Kanyang Sarili para sa ³atin, na isang ⁴handog at isang ⁴hain sa Diyos upang maging isang ⁵masarap na samyo.

3 Nguni’t ang ¹pakikiapid at ang lahat ng karumihan, o di-mapigilang masakim na pita, ay huwag man lamang mabanggit sa inyong usapan, gaya ng nararapat sa mga ²banal;

4 At ang kahalayan man, at mga mangmang na pagsasalita, o magagaspang na pagbibiro, na di-nangararapat, kundi ang ¹pagpapasalamat.

5 Sapagka’t ¹talastas ninyo ito, ²nalalaman na ang bawa’t taong mapakiapid, o mahalay, o may di-mapigilang masakim na pita, na isang mapagsamba sa mga diyus-diyusan, ay walang anumang mamanahin sa ³kaharian ni Kristo at ng Diyos.

6 Huwag kayong padaya kaninuman sa pamamagitan ng mga salitang walang kabuluhan, sapagka’t dahil sa mga bagay na ito ay dumarating ang poot ng Diyos sa mga anak ng pagsuway.

7 Samakatuwid, huwag kayong maging mga kabahagi kasama nila;

8 Sapagka’t noon kayo ay ¹kadiliman, datapuwa’t ngayon sa loob ng Panginoon kayo ay ¹liwanag; ²magsilakad kayong gaya ng mga ³anak ng liwanag

9 (Sapagka’t ang bunga ng liwanag ay nasa lahat ng ¹kabutihan at katuwiran at katotohanan),

10 Na inyong pinatunayan kung ano ang kinalulugdan ng Panginoon;

11 At huwag kayong makibahagi sa mga ¹walang-bungang gawa ng kadiliman, manapa ay inyong ²ihantad;

12 Sapagka’t ang mga bagay na ginawa nila sa lihim ay nakahihiya kahit banggitin man lamang.

13 Datapuwa’t ang lahat ng mga bagay na inihantad ay inihahayag ng liwanag; sapagka’t ang lahat ng mga bagay na nakapaghahayag ay liwanag.

14 Kaya sinasabi Niya, Gumising ka, ikaw na natutulog, at bumangon ka sa gitna ng mga ¹patay, at liliwanagan ka ni ²Kristo.

15 ¹Mag-ingat nga kayo kung paano kayo lumakad, hindi gaya ng mga mangmang, kundi gaya ng marurunong;

16 Na inyong ¹tubusin ang panahon, sapagka’t ang mga ²araw ay masasama.

17 Kaya, huwag kayong maging mga mangmang, kundi ¹unawain ninyo kung ano ang kalooban ng Panginoon.

18 At huwag kayong ¹mangagsipaglasing sa alak na kinaroroonan ng kaguluhan, kundi kayo ay ¹mangapuspos sa espiritu,

19 Na kayo ay ¹mangagsalitaan sa isa’t isa ng ²mga salmo at mga himno at mga espirituwal na awitin, nag-aawitan at nagsasalmuhan sa inyong mga puso sa Panginoon,

20 Na kayo ay magpasalamat ¹sa lahat ng panahon para sa lahat ng mga bagay ²sa pangalan ng ating Panginoong Hesu-Kristo sa Diyos at Ama;

21 ¹Magpasakop kayo sa ²isa’ t isa sa ³takot kay Kristo.

22 ¹Mga asawang babae, ²pasakop kayo sa ³inyu-inyung sariling asawa, na gaya ng sa Panginoon,

23 Sapagka’t ang lalake ay ¹ulo ng kanyang asawa, gaya naman nang si Kristo ay Ulo ng ekklesia, na Siya mismo ang ²Tagapagligtas ng Katawan.

24 ¹Datapuwa’ t kung paanong ang ekklesia ay nagpapasakop kay Kristo, gayundin naman pasakop ang mga babae sa kani-kanilang asawa sa ²lahat ng mga bagay.

25 Mga asawang lalake, ¹ibigin ninyo ang inyu-inyung asawa, ²gaya naman ni Kristo na umibig sa ekklesia, at nagbigay ng Kanyang Sarili dahil sa kanya,

26 Upang Kanyang ¹pakabanalin siya, na nilinis sa pamamagitan ng ²paghuhugas ng ³tubig na nasa ⁴salita,

27 Upang Kanyang ¹maiharap ang ²ekklesia sa Kanyang Sarili na ³maluwalhati, na walang ⁴dungis o kulubot o anumang mga gayong bagay, kundi siya ay nararapat maging ⁵banal at walang kapintasan.

28 Gayundin naman, nararapat ibigin ng mga lalake ang kani-kanilang sariling asawa tulad ng sarili nilang katawan. Ang umiibig sa kanyang sariling asawa ay umiibig sa kanyang sarili;

29 Sapagka’t walang sinumang napoot kailanman sa kanyang sariling laman, kundi ¹kinakandili at minamahal ito, gaya naman ni Kristo sa ekklesia;

30 Sapagka’t tayo ay mga sangkap ng Kanyang Katawan.

31 Dahil dito ay ¹iiwan ng lalake ang kanyang ama at ina at makikisama sa kanyang asawa, at ang dalawa ay magiging isang laman.

32 Ang hiwagang ito ay dakila, datapuwa’t sinasalita ko ang tungkol kay ¹Kristo at sa ekklesia.

33 Gayunpaman, ibigin naman ang bawa’t isa sa inyo ang kani-kanilang sariling asawang babae gaya ng sa kanyang sarili, at dapat ¹igalang ng babae ang kanyang asawa.