Colosas 1

1 ¹Si Pablo, isang apostol ni Kristo Hesus, sa pamamagitan ng ²kalooban ng Diyos, at ang kapatid na si Timoteo,

2 Sa mga ¹banal na nasa Colosas at mga tapat na kapatid kay Kristo: sumainyo nawa ang biyaya at kapayapaang mula sa Diyos na ating Ama.

3 Kami ay nagpapasalamat sa Diyos, na ¹Ama ng ating Panginoong Hesu-Kristo, nananalangin palagi para sa inyo,

4 Nang mabalitaan namin ang inyong ¹pananampalataya ²kay Kristo Hesus, at ang ¹pag-ibig ninyo sa lahat ng mga banal,

5 Dahil sa ¹pag-asang ²itinataan para sa inyo sa mga kalangitan, na nang una ay inyong narinig sa salita ng ³katotohanan ng ebanghelyo,

6 Na ito ay dumating sa inyo, kung paano sa buong sanlibutan ito ay namumunga at lumalago, gayundin naman sa inyo, mula nang araw na inyong marinig at lubos na malaman ang ¹biyaya ng Diyos sa ²katotohanan;

7 Ayon sa inyong natutuhan kay Epafras, na aming minamahal na kasamang alipin, na isang tapat na ¹ministro ni Kristo sa ganang inyo,

8 Na siya rin namang nagbalita sa amin ng inyong pag-ibig sa loob ng Espiritu.

9 Dahil dito, kami rin naman, mula nang araw na aming marinig ito, hindi kami nagsitigil ng pananalangin at ng paghingi patungkol sa inyo, na kayo ay mapuspusan ng lubos na pagkaalam sa Kanyang ¹kalooban, sa lahat ng ²espiritwal na karunungan at pang-unawa,

10 ¹Upang kayo ay magsilakad nang karapat-dapat sa Panginoon sa ²buong ikalulugod Niya, nagsisipamunga ³sa bawa’t gawang mabuti at nagsisilago sa pamamagitan ng lubos na ⁴kaalaman sa Diyos,

11 Na kayo ay ¹mabigyang-kapangyarihan ng buong kapangyarihan, ayon sa ²kalakasan ng Kanyang kaluwalhatian, sa buong pagtitiis at pagpapahinuhod na may galak,

12 Na nagpapasalamat sa Ama, na ¹nagpaging-dapat sa inyo upang makabahagi sa ²bahagi ng mga banal sa ³liwanag;

13 Na Siyang nagligtas sa atin sa awtoridad ng ²kadiliman, at naglipat sa atin tungo sa loob ng kaharian ng ³Anak ng Kanyang pag-ibig,

14 Na sa loob Niya tayo ay may ¹katubusan, ang ²kapatawaran ng mga kasalanan;

15 Na Siya ang ¹larawan ng Diyos na di-nakikita, ang ²Panganay ng lahat ng nilikha,

16 Sapagka’t ¹sa loob Niya nilikha ang lahat ng bagay, sa sangkalangitan at sa sangkalupaan, ang mga nakikita at ang mga di-nakikita, maging mga ²trono o mga ³pagkapanginoon o mga pinuno o mga awtoridad; ang lahat ng bagay ay nilikha ⁴sa pamamagitan Niya at ⁵ukol sa Kanya;

17 At Siya ang ¹una sa lahat ng bagay, at ang lahat ng bagay ay ²umiiral nang sama-sama nang may kaayusan sa Kanya;

18 At Siya ang Ulo ng Katawan, samakatuwid ay ang ekklesia; na Siyang pasimula, ang ¹Panganay mula sa mga patay, upang sa lahat ng bagay ay magkaroon Siya ng ²unang puwesto;

19 Sapagka’t sa loob Niya ¹ang buong ²kapuspusan ay nalugod na manahan,

20 At ¹sa pamamagitan Niya ay maipagkasundo ²ang lahat ng bagay sa<< 3>>Kanya, ⁴yamang nakipagpayapa sa pamamagitan ng dugo ng Kanyang krus << 1>>sa<< >>pamamagitan Niya, maging mga bagay sa sangkalupaan, o mga bagay sa ⁵sangkalangitan.

21 At kayo, noong nakaraang panahon ay nangahiwalay at mga ¹kaaway sa inyong ²kaisipan dahil sa mga gawang masama,

22 Gayunman ay ipinagkasundo ¹Niya ngayon sa loob ng katawan ng Kanyang laman sa pamamagitan ng kamatayan, upang kayo ay iharap na mga banal at walang dungis at walang kapintasan sa harapan ¹Niya,

23 Kung tunay kayong mananatili sa ¹pananampalataya, na matatatag at matitibay, at hindi mailalayo sa ²pag-asa ng ebanghelyo na inyong narinig, na ipinangaral sa lahat ng nilikha sa silong ng langit, na dito akong si Pablo ay naging isang ministro.

24 Ngayon ay nagagalak ako sa aking mga hirap dahil sa inyo, at aking ¹pinupunan ang kakulangan ng mga kapighatian ni Kristo sa aking laman para sa Kanyang Katawan, na siyang ekklesia;

25 Na ako ay ¹naging isang ²tagapaghain nito, ayon sa ³pagkakatiwala na mula sa Diyos, na ibinigay sa akin para sa inyo, upang ⁴kumpletuhin ang salita ng Diyos,

26 Maging ang ¹hiwaga na inilihim ²sa mga kapanahunan at sa mga henerasyon, datapuwa’t ngayon ay ipinahayag sa Kanyang mga banal;

27 Na sa kanila ay niloob ng Diyos na ipaalam kung ano ang mga ¹kayamanan ng kaluwalhatian ng hiwagang ito sa gitna ng mga Hentil, ²na ito ay si ³Kristong ⁴nasa loob ninyo, ang pag-asa ng ⁵kaluwalhatian:

28 Na Siya naming ipinahahayag, na pinaaalalahanan ang bawa’t tao at tinuturuan ang bawa’t tao sa buong karunungan, upang maiharap naming ¹lubos-nang-lumago ²sa loob ni Kristo ang bawa’t tao;

29 Na dahil dito ay nagpapagal din naman ako, ¹nagpupunyagi ayon sa Kanyang paggawa, na gumagawa nang may ²kapangyarihan sa loob ko.