Apocalipsis 19

1 Pagkatapos ng mga bagay na ito ay narinig ko ang gaya ng isang malakas na tinig ng isang malaking kalipunan sa langit, na nagsasabi, ¹Aleluya! Kaligtasan, at kaluwalhatian, at kapangyarihan, ay nauukol sa ating Diyos:

2 Sapagka’t tunay at matuwid ang Kanyang mga paghatol; sapagka’t hinatulan Niya ang malaking patutot, na siyang nagpasama sa lupa ng kanyang pakikiapid, at iginanti Niya ang dugo ng Kanyang mga alipin sa kanyang kamay.

3 At sila ay muling nangagsabi, Aleluya! At ang usok niya ay pumapailanlang magpakailanman.

4 At nangagpatirapa ang dalawampu’ t apat na matanda at ang apat na nilalang na buháy, at nangagsisamba sa Diyos na nakaupo sa trono, na nangagsasabi, ¹Amen, Aleluya!

5 At lumabas ang isang ¹tinig mula sa trono, na nagsasabi, Purihin ninyo ang ating Diyos, ninyong lahat na mga alipin Niya, at ninyong lahat na mga natatakot sa Kanya, maliliit at malalaki.

6 At narinig ko ang ¹gaya ng tinig ng isang malaking kalipunan, at ¹gaya ng lagaslas ng maraming tubig, at gaya ng ugong ng malalakas na kulog na nangagsasabi, Aleluya! Sapagka’t naghahari ang Panginoon nating Diyos na Makapangyarihan sa lahat.

7 Tayo ay mangagalak at mangagsayang mainam, at ibigay natin sa Kanya ang kaluwalhatian, sapagka’t dumating ang ¹kasal ng Kordero, at ginawa ng Kanyang ²asawa ang kanyang sarili na handa.

8 At sa kanya ay ipinagkaloob na maramtan siya ng pinong lino, makintab at ¹dalisay; sapagka’t ang pinong lino ay siyang ²mga matuwid na gawa ng mga banal.

9 At sinabi niya sa akin, Isulat mo, Pinagpala ang mga inanyayahan sa ¹pangkasalang ²hapunan ng Kordero. At sinabi niya sa akin, Ang mga ito ay ang mga tunay na salita ng Diyos.

10 At ako ay nagpatirapa sa kanyang paanan upang siya ay aking sambahin. At sinabi niya sa akin, ¹Huwag mong gawin iyan! Ako ay kapwa alipin mo at ng iyong mga kapatid na may patotoo ni Hesus. Sumamba ka sa Diyos! Sapagka’t ang patotoo ni Hesus ay siyang ²espiritu ng propesiya.

11 At nakita kong nabuksan ang langit, at narito, ang isang puting kabayo, at ¹Siya na nakasakay rito ay tinatawag na ²Tapat at Totoo, at sa ³katuwiran Siya ay humahatol at nakikipagdigma.

12 At ang Kanyang mga ¹mata ay ningas ng apoy, at sa Kanyang ulo ay ²maraming diadema; at Siya ay may isang pangalang nakasulat, na walang sinuman ang nakaaalam ³kundi Siya Mismo.

13 At Siya ay nararamtan ng kasuotang ¹itinubog sa dugo; at ang Kanyang pangalan ay tinatawag na Ang ²Salita ng Diyos.

14 At ang mga ¹hukbong nasa langit ay sumusunod sa Kanya na mga nakasakay sa mga puting kabayo, at ²nangararamtan ng pinong linong maputi at ³dalisay.

15 At mula sa Kanyang bibig ay lumalabas ang isang ¹tabak na matalas, upang sa pamamagitan nito ay sugatan Niya ang mga bansa; at Kanyang ²papastulin sila ng tungkod na bakal; at tinatapakan Niya ang ³pisaan ng ubas ng alak ng matinding galit ng kapootan ng Diyos na Makapangyarihan sa lahat.

16 At Siya ay may isang pangalang nakasulat sa Kanyang ¹damit at sa Kanyang hita, Hari ng mga hari at Panginoon ng mga panginoon.

17 At nakita kong nakatayo ang isang anghel sa araw, at siya ay sumigaw nang may malakas na tinig, na nagsasabi sa lahat ng mga ibong lumilipad sa gitna ng himpapawid, Halikayo at mangagkatipon sa ¹malaking hapunan ng Diyos,

18 Upang kayo ay makakain ng laman ng mga hari, at ng laman ng mga ¹kapitan, at ng laman ng mga taong makapangyarihan, at ng laman ng mga kabayo at ng mga nakasakay rito, at ng laman ng lahat ng mga tao, kapwa malaya at alipin, at maliliit at malalaki.

19 At nakita ko ang halimaw at ang mga ¹hari sa lupa at ang kanilang mga ²hukbo na nangagkakatipon upang ³makipagdigma laban sa Kanya na nakasakay sa kabayo at laban sa Kanyang hukbo.

20 At binihag ang halimaw, at kasama niya ang bulaang propeta na gumawa ng mga tanda sa harapan niya, na siyang ipinandaya sa mga nagsitanggap ng marka ng halimaw at sa mga sumamba sa larawan nito. Ang dalawang ito ay ¹inihagis nang buháy sa dagat-dagatang apoy na nagliliyab sa asupre.

21 At ang natitira ay pinatay sa tabak na lumalabas sa bibig Niyaong nakasakay sa kabayo, at ang lahat ng mga ibon ay nangabundat sa mga laman nila.