Apocalipsis 15

1 At nakita ko ang isa pang tanda sa langit, dakila at kagila-gilalas, pitong anghel na may ¹pitong salot, na siyang mga panghuli; sapagka’t sa mga yaon ay natatapos ang matinding galit ng Diyos.

2 At nakita ko ang gaya ng isang ¹malasalaming dagat na may halong apoy, at ²yaong mga nagtagumpay sa halimaw, at sa kanyang larawan, at sa bilang ng kanyang pangalan, na ³nangakatayo sa ibabaw ng malasalaming dagat, na may mga alpa ng Diyos.

3 At inaawit nila ang ¹awit ni Moises na alipin ng Diyos, at ang ²awit ng Kordero, na sinasabi, Dakila at kagila-gilalas ang Iyong mga ³gawa, Oh Panginoong Diyos na Makapangyarihan-sa-lahat; matuwid at tunay ang Iyong mga ³daan, Oh Hari ng mga ⁴bansa.

4 Sino ang hindi matatakot, Oh Panginoon, at luluwalhati sa Iyong pangalan? Sapagka’t Ikaw lamang ang ¹banal; sapagka’t ang lahat ng mga bansa ay darating at magsisisamba sa harapan Mo, sapagka’t ang Iyong mga matuwid na gawa ay nangahayag.

5 At pagkatapos ng mga bagay na ito ay nakita ko, at ang ¹templo ng tabernakulo ng ²patotoo sa langit ay nabuksan,

6 At nagsilabas mula sa templo ang pitong anghel na may pitong salot, na ¹nararamtan ng dalisay na makintab na lino, at nangabibigkisan ng gintong pamigkis sa kanilang mga dibdib.

7 At isa sa apat na nilalang na buháy ay nagbigay sa pitong anghel ng pitong gintong mangkok na punô ng matinding galit ng Diyos, na Siyang nabubuhay magpakailanman.

8 At napuno ng usok ang templo mula sa kaluwalhatian ng Diyos, at mula sa Kanyang kapangyarihan, at ¹walang sinumang makapasok sa templo hanggang sa matapos ang pitong salot ng pitong anghel.