Apocalipsis 14

1 At nakita ko, at narito, ang Kordero ay nakatayo sa ¹bundok Sion, at ang kasama Niya ay ²isang daan at apatnapu’t apat na libong may pangalan ³Niya at pangalan ng Kanyang Ama, na nakasulat sa kanilang mga noo.

2 At narinig ko ang isang tinig mula sa langit na gaya ng lagaslas ng ¹maraming tubig, at gaya ng dagundong ng ²malakas na kulog; at ang tinig na aking narinig ay gaya ng sa mga ³mang-aawit-ng-alpa na tumutugtog sa kanilang mga alpa.

3 At sila ay nag-aawitan ng isang bagong awit sa harapan ng trono at sa harapan ng apat na buhay na nilalang at ng mga matanda; at ¹walang sinumang matuto ng awit maliban sa isang daan at apatnapu’t apat na libo lamang, na mga binili ²mula sa lupa.

4 Ang mga ito ay ang mga hindi nangahawa sa mga babae, sapagka’t sila ay mga ¹birhen. Ang mga ito ay ang mga nagsisunod sa Kordero saanman Siya pumaroon. Ang mga ito ay binili sa gitna ng mga tao bilang ²unang bunga sa Diyos at sa Kordero;

5 At sa kanilang bibig ay ¹walang nasumpungang kasinungalingan, sapagka’t sila ay mga ²walang dungis.

6 At nakita ko ang isa pang anghel na lumilipad sa gitna ng langit, na may ¹walang hanggang ebanghelyo upang ibalita sa mga ²nananahan sa lupa, at sa bawa’t bansa at lipi at wika at bayan,

7 At sinasabi niya ng may malakas na tinig, ¹Matakot kayo sa Diyos, at magbigay ng kaluwalhatian sa Kanya, sapagka’t dumating na ang oras ng Kanyang ²paghahatol; at ³magsisamba kayo sa Kanya na gumawa ng langit at ng lupa at ng dagat at ng mga bukal ng mga tubig.

8 At ang isa pa, ang pangalawang anghel, ay sumunod na nagsasabi, Bumagsak na, bumagsak na ang dakilang ¹Babilonia, na siyang nagpainom sa lahat ng mga bansa ng ²alak ng matinding galit ng kanyang pakikiapid!

9 At ang isa pa, ang pangatlong anghel, ay sumunod sa kanila, na nagsasabi ng may malakas na tinig, Kung ang sinuman ay sumasamba sa halimaw at sa kanyang larawan, at tumatanggap ng marka sa kanyang noo, o sa kanyang kamay,

10 Ay iinom din naman siya ng alak ng matinding galit ng Diyos, na hinalong walang banto sa saro ng Kanyang kapootan; at siya ay pahihirapan sa ¹apoy at asupre sa harapan ng mga banal na anghel, at sa harapan ng Kordero.

11 At ang usok ng pahirap sa kanila ay papailanlang magpakailanman; at sila ay walang kapahingahan araw at gabi, silang mga nagsisisamba sa halimaw at sa kanyang larawan, at sinumang tumatanggap ng marka ng kanyang pangalan.

12 Dito ay ang ¹pagtitiis ng mga ²banal, ng mga nagsisitupad ng mga utos ng Diyos, at ng pananampalataya ni Hesus.

13 At narinig ko ang isang tinig mula sa langit na nagsasabi, Isulat mo, Pinagpala ang mga ¹patay na nangamamatay sa Panginoon mula ngayon. Oo, sinasabi ng ²Espiritu, upang sila ay mangagpahinga sa kanilang mga pagpapagal; sapagka’t ang kanilang mga gawa ay sumusunod sa kanila.

14 At nakita ko, at narito, ang isang puting alapaap, at nakaupo ¹sa ibabaw ng alapaap ang Isang katulad ng ²Anak ng Tao, na may isang ³gintong putong sa Kanyang ulo, at may isang ⁴matalas na karit sa Kanyang kamay.

15 At lumabas ang isa pang anghel sa templo, na sumisigaw nang may malakas na tinig sa Kanya na nakaupo sa alapaap, Ihulog Mo ang Iyong karit at gumapas Ka; sapagka’t dumating na ang oras ng paggapas, sapagka’t ang ¹aanihin sa lupa ay ²hinog na.

16 At Siya na nakaupo sa alapaap ay naghagis ng Kanyang ¹karit sa lupa, at ang lupa ay ²nagapasan.

17 At lumabas ang isa pang anghel sa templong nasa langit, siya rin ay may karit na matalas.

18 At lumabas ang isa pang anghel sa dambana, na siyang may awtoridad sa apoy, at sinigawan nang may malakas na tinig ¹yaong may karit na matalas, na nagsasabi, Ihulog mo ang iyong karit na matalas, at putihin mo ang mga buwig ng ²punong-ubas sa lupa, sapagka’t ang kanyang mga ubas ay hinog na.

19 At inihagis ng anghel ang kanyang karit sa lupa at pinuti ang mga ubas sa lupa, at inihagis sa malaking ¹pisaan-ng-ubas ng matinding galit ng Diyos.

20 At nayurakan ang pisaan-ng-ubas sa labas ng ¹lunsod, at lumabas sa pisaan-ng-ubas ang dugo, na umapaw hanggang sa mga preno ng mga ²kabayo, sa layo na ³isang libo at anim na raang ⁴estadio.