Apocalipsis 13

1 At nakita ko ang isang ¹halimaw na umaahon sa ²dagat na may ³sampung sungay at pitong ulo, at sa kanyang mga sungay ay may sampung diadema, at sa kanyang mga ulo ay may mga pangalan ng ⁴kalapastanganan.

2 At ang halimaw na aking nakita ay katulad ng isang ¹leopardo, at ang kanyang mga paa ay gaya ng sa boso, at ang kanyang bibig ay gaya ng bibig ng leon. At ibinigay sa kanya ng dragon ang kanyang ²kapangyarihan, at ang kanyang trono, at dakilang awtoridad.

3 At ang ¹isa sa kanyang mga ulo ay waring sinugatan ng ikamamatay, at ang kanyang ikamamatay na sugat ay gumaling. At ang buong lupa ay nanggilalas sa halimaw.

4 At sila ay nagsisamba sa dragon, sapagka’t siya ang nagbigay ng awtoridad sa halimaw; at sila ay nagsisamba sa halimaw, na nagsasabi, Sino ang kagaya ng halimaw? At sino ang makababaka sa kanya?

5 At binigyan siya ng isang bibig na nagsasalita ng mga dakilang bagay at mga kalapastanganan, at binigyan siya ng awtoridad upang gumawa nang ¹apatnapu’ t dalawang buwan.

6 At ibinuka niya ang kanyang bibig sa mga paglalapastangan laban sa Diyos, upang lapastanganin ang Kanyang pangalan, at ang Kanyang tabernakulo, at yaong mga nagtatabernakulo sa langit.

7 At ipinagkaloob sa kanya na makipagdigma sa mga ¹banal, at pagtagumpayan sila; at binigyan siya ng awtoridad sa bawa’t lipi at bayan at wika at bansa.

8 At yaong lahat ng mga nananahan sa lupa ay magsisisamba sa kanya, bawa’t isa na ang pangalan ay hindi nakasulat sa ¹aklat ng buhay ng Kordero na pinatay ²buhat nang itatag ang sanlibutan.

9 Kung ang sinuman ay may pakinig, ay makinig.

10 Kung ang sinuman ay para sa pagkabihag, ay sa pagkabihag siya paroroon; kung ang sinuman ay papatay sa pamamagitan ng tabak, ay dapat siyang mamatay sa pamamagitan ng tabak. Narito ang pagtitiis at ang pananampalataya ng mga ¹banal.

11 At nakita ko ang ¹isa pang halimaw na umaahon buhat sa ²lupa, at siya ay may dalawang sungay na ³katulad ng sa isang kordero, at siya ay nagsasalitang gaya ng isang dragon.

12 At kanyang isinasagawa ang buong awtoridad ng unang halimaw sa kanyang paningin, at sinasanhi niya ang lupa at yaong nangananahan dito na sumamba sa unang halimaw, na ang ikamamatay na sugat ay gumaling.

13 At siya ay gumagawa ng mga dakilang ¹tanda, na kahit na apoy ay napabababa niya mula sa langit hanggang sa lupa, sa paningin ng mga tao.

14 At nadadaya niya yaong mga nananahan sa lupa dahil sa mga tandang ipinagkaloob sa kanya na gawin sa harapan ng halimaw, na nagsasabi sa mga nananahan sa lupa na gumawa ng isang larawan sa halimaw, na may sugat ng tabak at nabuhay.

15 At siya ay pinagkaloobang magbigay ng ¹hininga sa larawan ng halimaw, upang ang larawan ng halimaw ay ²makapagsalita, at sanhiin ang sinumang ayaw sumamba sa larawan ng halimaw na maipapatay.

16 At sinasanhi niya ang lahat, ang maliliit at ang malalaki, at ang mayayaman at ang mga dukha, at ang mga laya at ang mga alipin, na mabigyan ng isang ¹marka sa kanilang kanang kamay, o sa kanilang noo;

17 At hindi makabili o makapagbenta ang sinuman, maliban sa may marka, samakatuwid ay, ang pangalan ng halimaw o ang bilang ng kanyang pangalan.

18 Kailangan dito ang karunungan. Siyang may ¹pagkaunawa ay bilangin ang ²bilang ng halimaw, sapagka’t ito ay ang bilang ng isang tao; at ang kanyang bilang ay anim na raan at animnapu’t anim.