Apocalipsis 12

1 At isang dakilang tanda ang nakita sa langit: isang ¹babae na nararamtan ng araw, at ang buwan ay nasa ilalim ng kanyang mga paa, at sa kanyang ulo ay may isang putong na labindalawang bituin;

2 At sa pagdadalang-¹tao siya ay ²sumigaw, na ³nagdaramdam-sa-panganganak, at sa hirap upang manganak.

3 At isa pang tanda ang nakita sa langit: at narito, ang isang malaking pulang ¹dragon na may ²pitong ulo at sampung sungay, at sa kanyang mga ulo ay may ³pitong diadema.

4 At kinakaladkad ng kanyang buntot ang ikatlong bahagi ng mga ¹bituin sa langit, at kanyang inihagis sila sa lupa. At ²tumayo ang dragon sa harapan ng babaeng manganganak na, upang lamunin ang kanyang anak pagkapanganak niya.

5 At siya ay ¹nanganak ng isang anak na lalake, isang ²lalakeng-anak, na magpapastol sa lahat ng mga bansa na may panghampas na bakal; at ang kanyang anak ay ³inagaw paitaas sa Diyos at sa Kanyang trono.

6 At tumakas ang babae patungo sa ¹ilang kung saan ipinaghanda siya ng Diyos ng isang dako, upang doon siya ay kandilihin ng isang libo dalawang daan at animnapung araw.

7 At nagkaroon ng ¹digmaan sa langit: si ²Miguel at ang kanyang mga anghel ay nakipagbaka sa dragon. At ang dragon at ang ³kanyang mga anghel ay nakipagbaka;

8 At hindi sila nanalo, ni nasumpungan pa ang kanilang dako sa langit.

9 At ¹inihagis ang malaking dragon, ang ²antigong ahas, ang tinatawag na ³Diyablo at ⁴Satanas, ang dumaraya sa buong pinananahanang lupa; siya ay inihagis sa lupa, at ang kanyang mga anghel ay inihagis na kasama niya.

10 At narinig ko ang isang malakas na tinig sa langit, na nagsasabi, Ngayon ay dumating ang kaligtasan, at ang kapangyarihan, at ang ¹kaharian ng ating Diyos, at ang awtoridad ng Kanyang Kristo, sapagka’t inihagis na ang ²tagapag-akusa ng ating mga kapatid na siyang nag-aakusa sa kanila sa harapan ng ating Diyos araw at gabi.

11 At siya ay ¹kanilang dinaig dahil sa ²dugo ng Kordero, at dahil sa ³salita ng kanilang patotoo, at ⁴hindi nila inibig ang kanilang pangkaluluwang-buhay maging ⁵hanggang sa kamatayan.

12 Kaya’t mangagalak kayo, Oh mga langit at yaong mga ¹nagsisipanahan sa kanila. Sa aba ng lupa at ng dagat, sapagka’t ang Diyablo ay bumaba sa inyo na may ²malaking galit, sa pagkaalam na mayroon na lamang siyang ³maikling panahon.

13 At nang makita ng dragon na siya ay inihagis sa lupa, ¹inusig niya ang babaeng nagluwal ng lalakeng-anak.

14 At sa babae ay ibinigay ang dalawang pakpak ng malaking ¹agila upang siya ay makalipad tungo sa ilang mula sa harap ng ahas patungo sa kanyang dako, na pinagkandilihan sa kanya nang isang ²panahon, at mga panahon, at kalahati ng isang panahon.

15 At ang ahas ay nagbuga sa kanyang bibig ng ¹tubig na gaya ng isang ilog sa likuran ng babae, upang maipatangay siya sa agos nito.

16 At tinulungan ng lupa ang babae, at ¹binuka ng lupa ang bibig nito at nilulon ang ilog na ibinuga ng dragon mula sa kanyang bibig.

17 At nagalit ang dragon sa babae, at umalis upang makipagbaka sa ¹nalabi sa kanyang binhi, na pawang nagsisitupad ng mga utos ng Diyos, at mga may patotoo ni Hesus.

18 At ¹siya ay tumayo sa buhanginan ng ²dagat.