Apocalipsis 1

1 Ang ¹pahayag ni Hesu-Kristo na ibinigay ng Diyos sa Kanya upang ipakita sa Kanyang mga alipin ang mga bagay na nararapat mangyaring madali; at Kanyang ipinaalam sa pamamagitan ng mga ²tanda, na Kanyang ipinadala sa pamamagitan ng Kanyang anghel sa Kanyang alipin na si Juan,

2 Na nagpatotoo ng salita ng Diyos at ng ¹patotoo ni Hesu-Kristo, ng lahat ng mga bagay na nakita niya.

3 Pinagpala ang bumabasa at ang nangakikinig ng mga salita ng ¹propesiya at tumutupad ng mga bagay na nasusulat sa loob nito sapagka’t ang panahon ay malapit na.

4 Si Juan sa ¹pitong ekklesia na nasa ²Asia: Sumainyo ang biyaya at kapayapaang mula roon sa ³Kanya na ngayon, at nang nakaraan, at ⁴yaong darating, at mula sa ⁵pitong Espiritu na nasa harapan ng Kanyang trono,

5 At mula kay Hesu-Kristo na tapat na Saksi, na Panganay sa mga patay, at Pangulo ng mga hari sa lupa. Sa Kanya na umiibig sa atin at ¹nagkalag sa atin mula sa ating mga kasalanan ²sa pamamagitan ng Kanyang dugo,

6 At ginawa tayong isang ¹kaharian, mga ²saserdote sa Kanyang Diyos at Ama, sumaKanya ang kaluwalhatian at ang paghahari ³magpakailan kailanman. Amen.

7 Tingnan ninyo, Siya ay ¹pumaparitong nasasa mga ²alapaap, at makikita Siya ng bawa’t mata, at ng nagsiulos sa Kanya, at ang lahat ng mga lipi sa ³lupa ay ⁴magsisitaghoy dahil sa Kanya. Oo, amen.

8 Ako ang ¹Alpha at ang Omega, sabi ng Panginoong Diyos, Siya na ngayon, at nang nakaraan, at yaong darating, ang Makapangyarihan sa lahat.

9 Akong si Juan, na inyong kapatid at inyong kasamang kabahagi sa kapighatian at kaharian at ¹pagtitiis na nasa loob ni ²Hesus, ay nasasa pulo na tinatawag na ³Patmos dahil sa salita ng Diyos at sa patotoo ni Hesus.

10 Ako ay ¹nasa ²espiritu nang ³araw ng Panginoon, at narinig ko sa aking likuran ang isang ⁴malakas na tinig na tulad sa isang trumpeta,

11 Na nagsasabi, Ang iyong nakikita ay isulat mo sa isang ¹aklat at iyong ipadala ²sa pitong ekklesia: sa Efeso, at sa Esmirna, at sa Pergamo, at sa Tiatira, at sa Sardis, at sa Filadelfia, at sa Laodicea.

12 At ako ay ¹lumingon upang makita ang tinig na nagsalita sa akin. At nang ako ay ¹lumingon ay nakita ko ang pitong ²gintong ³patungan-ng-ilawan,

13 At ¹sa agitna ng mga patungan-ng-ilawan ay may Isang katulad ng ²Anak ng Tao, na may suot na ³damit na umaabot hanggang sa mga paa, at may ⁴bigkis ang dibdib ng isang pamigkis na ginto;

14 At ang Kanyang ulo at ¹buhok ay mapuputing gaya ng puting ²lana, gaya ng ²niebe; at ang Kanyang mga ³mata ay gaya ng ningas ng ⁴apoy;

15 At ang Kanyang mga ¹paa ay katulad ng ¹tansong binuli, na gaya ng ²dinalisay sa isang pugon; at ang Kanyang tinig ay gaya ng ³lagaslas ng maraming tubig;

16 At ang Kanyang kanang kamay ay may pitong ¹bituin; at mula sa Kanyang ²bibig ay lumabas ang isang matalas na ²tabak na may dalawang talim; at ang Kanyang ³mukha ay gaya ng araw na sumisikat nang matindi.

17 At nang Siya ay aking makita, nalugmok akong waring patay sa Kanyang paanan; at ipinatong Niya sa akin ang Kanyang kanang kamay, na nagsasabi, Huwag kang matakot; Ako ay ang ¹Una at ang Huli,

18 At ang ¹nabubuhay na Isa, at namatay Ako noon, at tingnan mo, Ako ay nabubuhay magpakailanman, at nasa Akin ang mga ²susi ng kamatayan at ng Hades.

19 Kaya isulat mo ang mga bagay na iyong nakita, at ang mga bagay na ngayon, at ang mga bagay na malapit nang mangyari pagkaraan ng mga bagay na ito.

20 Ang ¹hiwaga ng pitong bituin na iyong nakita sa Aking kanang kamay, at ng pitong gintong patungan-ng-ilawan: ang pitong bituin ay ang mga ²sugo ng pitong ekklesia, at ang pitong patungan-ng-ilawan ay pitong ekklesia.