Mateo 16

1 At nagsilapit ang mga Fariseo at mga Saduceo, at sa pagtukso sa Kanya ay humiling sa Kanya na pakitaan sila ng isang ¹tanda mula sa langit.

2 Subali’t sumagot Siya at sinabi sa kanila, ¹Sa pagtatakip-silim ay sinasabi ninyo, Bubuti ang panahon, sapagka’t mapula ang langit;

3 At sa umaga, Babagyo ngayon, sapagka’t mapula at makulimlim ang langit. Marunong kayong kumilala ng ¹mukha ng langit, subali’t hindi ninyo ²makilala ang mga tanda ng mga panahon.

4 Humahanap ng isang tanda ang isang henerasyong masama at mapangalunya, at hindi ito bibigyan ng anumang tanda, maliban sa ¹tanda ni Jonas. At sila ay iniwan Niya at umalis.

5 At dumating sa kabilang ibayo ang mga disipulo at nakalimutang magdala ng ¹tinapay.

6 At sinabi sa kanila ni Hesus, Kayo ay mag-ingat at mabalaan sa lebadura ng mga Fariseo at mga Saduceo.

7 Subali’t sila ay nangatuwiranan sa isa’t isa, na nagsasabi, Ito ay dahil sa hindi tayo nakapagbaon ng tinapay.

8 At nang malaman ito ni Hesus ay Kanyang sinabi, Bakit kayo nangangatuwiran sa isa’t isa, kayong may maliit na pananampalataya, dahil ba sa wala kayong tinapay?

9 Hindi pa ba ninyo nauunawaan ni naaalaala ang limang tinapay ng limang libo at kung ilang ¹bakol ang inyong nailigpit?

10 Ni ang pitong tinapay ng apat na libo at kung ilang ¹bakol ang inyong nailigpit?

11 Papaano na hindi ninyo nauunawaan na hindi Ako nangusap sa inyo tungkol sa tinapay? Subali’t mag-ingat kayo sa lebadura ng mga Fariseo at mga Saduceo.

12 Noon nga ay naunawaan nila na hindi Niya sinabing mag-ingat sa lebadura ng tinapay, kundi sa ¹pagtuturo ng mga Fariseo at mga Saduceo.

13 Ngayon nang dumating si Hesus sa mga sakop ng ¹Cesarea ng Filipos, tinanong Niya ang Kanyang mga disipulo, na nagsasabi, Ano ba ang sabi ng mga tao kung sino ang Anak ng ²Tao?

14 At kanilang sinabi, ¹Sabi ng ilan, si Juan Bautista; at ang ilan, si Elias; at ang iba pa, si Jeremias, o isa sa mga propeta.

15 Sinasabi Niya sa kanila, Subali’t kayo, ano ang sabi ninyo sa kung sino Ako?

16 At sumagot si Simon Pedro at nagsabi, Ikaw ang ¹Kristo, ang ¹Anak ng ²Diyos na buháy.

17 At sumagot si Hesus at sinabi sa kanya, Pinagpala ka, Simon ¹Barjona, sapagka’t hindi ito ipinahayag sa iyo ng ²laman at dugo, kundi ng Aking ³Ama na nasa mga kalangitan.

18 At sinasabi Ko ¹rin sa iyo na ikaw ay ²Pedro, at sa ibabaw ng ³batong ito ay ⁴itatayo Ko ang ⁵Aking ekklesia, at ang ⁶mga pintuan ng Hades ay hindi makapananaig laban dito.

19 Ibibigay Ko sa iyo ang ¹mga susi ng ²kaharian ng mga kalangitan, at anuman ang iyong ³tinatalian sa lupa ay magiging ang ⁴natalian na sa mga kalangitan, at anuman ang ³kinakalagan mo sa lupa ay magiging ang ⁴nakalagan na sa mga kalangitan.

20 Noon nga ay pinagbilinan Niya ang mga disipulo na ¹huwag sabihin kanino man na Siya ang Kristo.

21 Mula noon ay nagsimulang ipaalam ni Hesus sa Kanyang mga disipulo na ¹kinakailangang magtungo Siya sa Herusalem at magbata ng maraming bagay mula sa mga matanda at mga pangulong saserdote at mga eskriba, at mapatay, at maibangon sa ikatlong araw.

22 At hinila Siya ni Pedro, at nagsimulang pagsabihan Siya, na nagsasabi, Kaawaan Ka nawa ng Diyos, Panginoon; ito ay ¹hinding-hindi mangyayari sa Iyo!

23 Subali’t lumingon Siya at sinabi kay Pedro, Lumagay ka sa likuran Ko, ¹Satanas! ²Ikaw ay isang katitisuran sa Akin; sapagka’t ³hindi mo inilalagak ang iyong kaisipan sa mga bagay ng Diyos, kundi sa mga bagay ng mga tao.

24 Noon nga ay sinabi ni Hesus sa Kanyang mga disipulo, Kung ang sinuman ay nagnanais na sumunod sa Akin, ¹itatwa niya ang ²kanyang sarili, at pasanin ang kanyang ³krus, at ⁴sumunod sa Akin.

25 Sapagka’t ang sinumang nagnanais na iligtas ang kanyang pangkaluluwang buhay ay ¹mawawalan nito; subali’t ang sinumang ²iwinawala ang kanyang pangkaluluwang buhay dahil sa Akin ay makasusumpong nito.

26 Sapagka’t ano ang pakikinabangin ng tao kung makamtam niya ang buong sanlibutan, subali’t mawawala naman ang kanyang ¹pangkaluluwang buhay? O ano ang ibibigay ng tao kapalit ng kanyang pangkaluluwang-buhay?

27 ¹Sapagka’ t ang Anak ng Tao ay pariritong nasa kaluwalhatian ng Kanyang Ama kasama ang Kanyang mga anghel, at sa panahong yaon ay ²gagantimpalaan Niya ang bawa’t tao alinsunod sa kanyang mga gawa.

28 Katotohanang sinasabi Ko sa inyo, May ilan sa mga nakatayo rito na hinding-hindi makatitikim ng kamatayan hanggang sa makita nila ang Anak ng Tao na ¹pumaparito sa Kanyang kaharian.