Mateo 14

1 Nang panahong yaon ay narinig ni Herodes na tetrarka ang balita hinggil kay Hesus,

2 At sinabi sa kanyang mga lingkod, Ito ay si Juan Bautista; siya ay ibinangon mula sa mga patay, at sa gayon ¹kumikilos sa kanya ang mga gawa ng kapangyarihang ito.

3 Sapagka’t hinuli ni Herodes si Juan at tinalian siya at inilagay sa bilangguan dahil kay Herodias, ang asawa ng kanyang kapatid na si Felipe.

4 Sapagka’t sinasabi sa kanya ni Juan, Hindi naaayon-sa-kautusan ang ariin mo siya.

5 At nang ibig niyang ipapatay siya, natakot siya sa mga tao sapagka’t siya ay itinuturing nilang isang propeta.

6 Subali’t nang sumapit ang kaarawan ni Herodes, sumayaw sa gitna ang babaeng anak ni Herodias at kinalugdan ni Herodes,

7 Kaya’t nangako siyang may sumpa na ibibigay sa kanya ang anumang hilingin niya.

8 At siya, na natagubilinan ng kanyang ina, ay nagsabi, Ibigay mo sa akin dito na nasa isang pinggan ang ulo ni Juan Bautista.

9 At namanglaw ang hari, subali’t dahil sa kanyang mga sumpa at sa mga nakadulang na kasalo niya, ipinag-utos niyang ibigay yaon;

10 At siya ay nagsugo at ¹pinapugutan ng ulo si Juan sa bilangguan.

11 At dinala ang kanyang ulo na nasa isang pinggan at ibinigay sa dalaga, at kanyang dinala ito sa kanyang ina.

12 At nagsiparoon ang kanyang mga disipulo at kinuha ang bangkay at inilibing ito, at sila ay pumaroon at ipinagbigay-alam kay Hesus.

13 Ngayon nang marinig ito ni Hesus, ¹umalis Siya mula roon na sakay ng isang daong nang bukod patungo sa isang ilang na dako; at nang mabalitaan ito ng mga kalipunan, ²sumunod sila sa Kanya nang naglalakad mula sa mga lunsod.

14 At paglabas Niya, nakakita Siya ng lubhang maraming tao, at nahabag Siya sa kanila at pinagaling ang kanilang mga may sakit.

15 Ngayon nang magtakip-silim na, lumapit sa Kanya ang Kanyang mga disipulo, na nagsasabi, Ang dakong ito ay isang ilang, at lipas na ang oras; kaya’t paalisin Mo na ang mga kalipunan upang makaparoon sila sa mga nayon at makabili sila ng pagkain para sa kanilang mga sarili.

16 Subali’t sinabi sa kanila ni Hesus, Hindi nila kailangang umalis; ¹bigyan ninyo sila ng ²makakain.

17 At sinabi nila sa Kanya, Wala tayo rito maliban sa limang ¹tinapay at dalawang ¹isda.

18 At Kanyang sinabi, ¹Dalhin ninyo sa Akin.

19 At nang mapag-utusan ang mga kalipunan na ¹magsiupo sa damuhan, kinuha Niya ang limang tinapay at ang dalawang isda, at ²pagtingala sa langit, Kanyang pinagpala, at ³pinag-pira-piraso at ⁴ibinigay ang mga tinapay sa mga disipulo, at ibinigay ng mga disipulo sa mga kalipunan.

20 At kumain silang lahat at nangabusog; at kanilang pinulot ang lumabis sa mga pira-piraso, ¹labindalawang bakol na punô.

21 At ang mga nakakain ay may ¹mga limang libong lalake, bukod pa ang mga babae at mga bata.

22 At kaagad na ¹pinilit Niya ang mga disipulo na lumulan sa daong at mauna sa Kanya sa kabilang ibayo, samantalang pinayayaon Niya ang mga kalipunan.

23 At nang mapayaon na Niya ang mga kalipunan, umakyat Siyang bukod sa bundok upang ¹manalangin. At nang sumapit ang ²gabi, Siya ay nag-iisa roon.

24 Ngayon ang daong ay ¹nasa gitna ng dagat, na hinahampas ng mga alon, sapagka’t pasalungat ang hangin.

25 At sa ¹ikaapat na pagbabantay sa gabi ay naparoon Siya sa kanila, ²naglalakad sa ibabaw ng dagat.

26 At nang makita Siya ng mga disipulo na naglalakad sa ibabaw ng dagat, sila ay nabahala, na nagsasabi, Ito ay isang multo! At sila ay nagsisigaw dahil sa takot.

27 Subali’t kaagad na nagsalita sa kanila si Hesus, na nagsasabi, Lakasan ninyo ang inyong loob, ¹Ako ito; Huwag kayong matakot.

28 At sinagot Siya ni Pedro at nagsabi, Panginoon, kung Ikaw iyan, utusan Mo akong pumariyan sa Iyo sa ibabaw ng tubig.

29 At sinabi Niya, Halika. At si Pedro, nang makababa mula sa daong, ay lumakad sa ibabaw ng tubig at lumapit kay Hesus.

30 Subali’t nang ¹makita niya ang malakas na hangin, siya ay natakot; at nang magsimula siyang lumubog, sumigaw siya, na nagsasabi, Panginoon, iligtas Mo ako!

31 At kaagad na iniunat ni Hesus ang Kanyang kamay at hinawakan siya at sinabi sa kanya, Ikaw na may maliit na pananampalataya, bakit ka ¹nag-alinlangan?

32 At nang makalulan sila sa daong, ang ¹hangin ay tumigil.

33 At ang mga nasa daong ay sumamba sa Kanya, na nagsasabi, Tunay na Ikaw ay ang ¹Anak ng Diyos.

34 At nang sila ay makatawid, narating nila ang lupa, sa Genesaret.

35 At nang makilala Siya ng mga tao sa lugar na yaon, nagsugo sila sa lahat ng mga karatig-lupain niyaon, at dinala sa Kanya ang lahat ng mga may sakit;

36 At ipinamanhik nila sa Kanya na mahipo man lamang nila ang ¹laylayan ng Kanyang damit; at ang lahat ng nagsihipo ay ²nagsigaling.