Marcos 3

1 ¹At Siya ay muling pumasok sa isang sinagoga; at doon ay may isang lalakeng may tuyong kamay.

2 At Siya ay inaabangan nila nang mabuti kung siya ay pagagalingin Niya sa araw ng Sabbath, upang Siya ay maparatangan nila.

3 At sinasabi Niya sa lalakeng tuyo ang kamay, Tumindig ka at pumagitna.

4 At sinasabi Niya sa kanila, Marapat bang gumawa ng mabuti sa araw ng Sabbath o gumawa ng masama, ¹magligtas ng ²buhay o pumatay? Subali’t sila ay nanahimik.

5 At nilibot Niya sila ng tingin na may ¹galit, palibhasa ay lubha Niyang ikinalumbay ang katigasan ng kanilang puso, sinasabi Niya sa lalake, Iunat mo ang iyong kamay! At iniunat niya, at ²nanumbalik ang kanyang kamay.

6 At nagsilabas ang ¹mga Fariseo at kaagad na nakipagsanggunian sa mga Herodiano laban sa Kanya, kung paanong Siya ay mapupuksa nila.

7 At lumayo si Hesus kasama ang Kanyang mga disipulo patungo sa dagat, at nagsisunod ang lubhang maraming tao mula sa Galilea;

8 At mula sa Judea, at mula sa Herusalem, at mula sa Idumea, at sa dakong ibayo ng Jordan, at sa palibut-libot ng Tiro at Sidon, ay nagsiparoon sa Kanya ang lubhang maraming tao, nang mabalitaan ang mga dakilang bagay na Kanyang ginagawa.

9 At sinabi Niya sa Kanyang mga disipulo na ihanda nang malapit sa Kanya ang isang maliit na ¹daong dahil sa maraming tao, upang Siya ay hindi nila magitgit;

10 Sapagka’t marami Siyang ¹pinagaling, kung kaya’t ²sinisiksik Siya ng lahat ng may ³mga salot upang Siya ay mahipo nila.

11 At ang mga karumal-dumal na espiritu, nang Siya ay kanilang makita, ay nagpatirapa sa harap Niya at nagsisigaw, na nangagsasabi, Ikaw ang Anak ng Diyos!

12 At sila ay ¹binalaan Niya nang maraming ulit na Siya ay huwag nilang ihayag.

13 At Siya ay umakyat sa bundok, at pinalapit Niya sa Kanya ang mga nais Niya, at ¹nagsilapit sila sa Kanya.

14 At ¹humirang Siya ng ²labindalawa, ³na tinawag Niyang mga apostol, upang sila ay makasama Niya, at nang sa gayon sila ay maisugo Niya upang ⁴magpahayag,

15 At magkaroon ng awtoridad na ¹magpalayas ng mga demonyo.

16 ¹At hinirang Niya ang labindalawa: at kay Simon ay ²idinagdag Niya ang pangalang Pedro;

17 At si Santiago na anak ni Zebedeo, at si Juan na kapatid ni Santiago, at idinagdag Niya sa kanila ang pangalang ¹Boanerges, samakatuwid ay, mga anak ng kulog;

18 At si Andres, at si Felipe, at si Bartolome, at si Mateo, at si Tomas, at si Santiago na anak ni Alfeo, at si Tadeo, at si Simon na Cananeo,

19 At si Judas Iscariote, na siya ring ¹nagkanulo sa Kanya.

20 At ¹pumasok Siya sa isang bahay; at muling nagkatipon ang mga tao, kung kaya’t ²hindi man lamang sila makakain ng tinapay.

21 At nang mabalitaan ito, ang Kanyang mga kamag-anak ay nagsilabas upang Siya ay pigilan, sapagka’t kanilang sinabi, Siya ay ¹wala sa Kanyang Sarili.

22 ¹At ang ²mga eskriba na nagsibaba mula sa Herusalem ay nagsabi, Nasa Kanya si ³Beelzebub, at sa pamamagitan ng ⁴pinuno ng mga demonyo ay nagpapalayas Siya ng mga demonyo.

23 At sila ay pinalapit Niya sa Kanya, at sinabi sa kanila sa mga talinghaga, Paanong mapalalayas ni Satanas si Satanas?

24 At kung ang isang ¹kaharian ay nahahati laban sa sarili nito, hindi makatatayo ang kahariang yaon;

25 At kung ang isang bahay ay nahahati laban sa sarili nito, ang bahay na yaon ay hindi makatatayo;

26 At kung si Satanas ay maghimagsik laban sa kanyang sarili at mahati, hindi siya makatatayo, kundi magkakaroon ng wakas.

27 Subali’t walang sinumang makapapasok sa bahay ng malakas na isa upang samsamin ang kanyang ¹mga pag-aari malibang ²gapusin muna niya ang malakas na isa, at sa panahong yaon ay masasamsaman niya ang kanyang bahay.

28 Katotohanang sinasabi Ko sa inyo, na ipatatawad sa mga anak ng mga tao ang lahat ng mga kasalanan, at mga kalapastanganan, anumang paglapastangan nila;

29 Subali’t sinumang lumalapastangan laban sa ¹Espiritu Santo ay walang kapatawaran magpakailanman, kundi mananagot ng kasalanang ²walang hanggan.

30 Sapagka’t sinabi nila, Siya ay may karumal-dumal na espiritu.

31 At dumating ang Kanyang ¹ina at ang Kanyang mga kapatid, at sila ay nakatayo sa labas at nagpasugo sila sa Kanya, na tinatawag Siya.

32 At nakaupo ang isang kalipunan ng mga tao sa palibot Niya at kanilang sinabi sa Kanya, Narito, nasa labas ang iyong ina at ang iyong mga kapatid na lalake at ang iyong mga kapatid na babae na hinahanap Ka.

33 At sila ay sinagot Niya, na nagsasabi, ¹Sino ang Aking ina at ang Aking mga kapatid?

34 At nilibot Niya ng tingin ang mga nakaupong pabilog sa palibot Niya, at Kanyang sinasabi, Narito, ang Aking ina at ang Aking mga kapatid!

35 Sapagka’t sinumang ¹gumaganap ng kalooban ng Diyos, ito ang ²Aking kapatid na lalake at kapatid na babae at ina.