Santiago 4

1 Saan nagbubuhat ang mga pakikipagbaka at ang mga pag-aaway sa inyo? Hindi ba nagbubuhat dito, sa inyong mga ¹kalayawan na nakikipagbaka sa inyong mga sangkap?

2 Kayo ay ¹nagnanasa at hindi ninyo makamtan; kayo ay nagsisipatay at nangaiinggit, at hindi ninyo kayang makuha; kayo ay nakikipag-away at nakikipagbaka. Kayo ay wala sapagkat hindi kayo nagsisihingi.

3 Kayo ay nagsisihingi at hindi kayo nagsisitanggap, sapagkat nagsisihingi kayo nang masama, upang gugulin ¹sa inyong mga kalayawan.

4 Kayong mga ¹mangangalunyang-babae, hindi ba ninyo nalalaman na ang ²pakikipagkaibigan sa ³sanlibutan ay pakikipag-away sa Diyos? Samakatwid, sinumang magpasiyang maging kaibigan ng sanlibutan ay ⁴nagiging ⁵kaaway ng Diyos.

5 O iniisip ba ninyo na ang Kasulatan ay nagsasalita ng walang kabuluhan: Ang ¹Espiritu na ²nananahan sa atin ay nagnanais managhili?

6 Ngunit Siya ay nagbibigay ng lalong biyaya; kaya’t ¹ito ay nagsasabi, ²Sinasalansang ng Diyos ang mga ³palalo, datapuwa’t binibigyan Niya ng biyaya ang mga mapagpakumbaba.

7 ¹Pasakop nga kayo sa Diyos; datapuwa’t ²salansangin ninyo ang ³Diyablo, at tatakas siya sa inyo.

8 Magsilapit kayo sa Diyos, at Siya ay lalapit sa inyo. Maglinis kayo ng inyong mga kamay, kayong mga makasalanan, at dalisayin ninyo ang inyong mga puso, kayong mga may ¹dalawang-kaluluwa!

9 ¹Kayo ay mapighati at magdalamhati at magsitangis. Palitan ninyo ang inyong pagtawa ng pagdadalamhati, at ang inyong kagalakan ng kalumbayan.

10 ¹Magpakababa kayo sa harapan ng Panginoon, at kayo ay itataas Niya.

11 Huwag kayong magsalita laban sa isa’t isa, mga kapatid. Ang nagsasalita laban sa kapatid o humahatol sa kanyang kapatid ay nagsasalita laban sa kautusan at humahatol sa kautusan. Datapuwa’t kung ikaw ay humahatol sa kautusan, hindi ka isang ¹tagatupad ng kautusan, kundi isang hukom.

12 Iisa ang Tagapagbigay ng kautusan at Hukom, na may kakayahang magligtas at magwasak. Datapuwa’t sino ka na humahatol sa iyong kapwa?

13 Magsiparito ngayon, kayong nagsisipagsabi, Ngayon o bukas ay ¹magsisiparoon kami sa ganito o gayong lunsod at titira kami roon nang isang taon, at mangangalakal at magtutubo

14 Kayo ngang hindi nakaaalam ng mangyayari sa inyong buhay bukas; kayo nga ay isang ¹singaw na sa sandaling panahon ay lumilitaw, at kapagdaka ay naglalaho

15 Sa halip na sabihin ninyong, Kung loloobin ng Panginoon ay mabubuhay kami at gagawin namin ito o yaon.

16 Datapuwa’t ngayon ay nagmamapuri kayo sa inyong mga ¹pagpapalalo; ang lahat ng ganitong pagmamapuri ay masama.

17 ¹Samakatwid sa nakaalam ng paggawa ng mabuti at hindi ito ginagawa, ito ay kasalanan sa kanya.