Hebreo 6

1 Kaya’t sa paglisan sa ¹salita ng ²panimulain ng Kristo, hayaang madala tayo sa ³paggulang, na hindi na muling naglalagay ng pundasyon ng pagsisisi sa mga patay na gawa at ng pananampalataya sa Diyos,

2 Ng pagtuturo tungkol sa mga ¹pagbabautismo, at ng pagpapatong ng mga kamay, ng pagkabuhay na muli ng mga patay at ng walang-hanggang paghuhukom;

3 At ating gagawin ¹ito kung ipahihintulot ng Diyos.

4 Sapagkat ¹hindi posible na ¹papagsisihing muli ²yaong mga minsan nang naliwanagan, at nakalasap ng ³makalangit na kaloob, at naging mga ⁴nakabahagi ng Espiritu Santo,

5 At nakalasap ng mabuting ¹salita ng Diyos, at ng mga gawa ng ²kapangyarihan ng darating na kapanahunan,

6 At saka ¹nahiwalay, ²ipinapapakong muli sa ganang kanilang sarili ang Anak ng Diyos, at ²inilalagay Siya sa hayag na kahihiyan.

7 Sapagkat ang lupang umiinom ng ¹ulang madalas na pumapatak dito, at ²tinutubuan ng mga halamang angkop sa mga yaong dahil sa kanila naman ito ay nilinang, ay nakikibahagi ng pagpapalang mula sa Diyos;

8 Datapuwa’t kung sinibulan ng mga ¹tinik at mga dawag, ay ²dinidisapruba at ³malapit sa sumpa, at ang kanyang kahihinatnan ay ang ⁴masunog.

9 Ngunit, mga minamahal, naniniwala kaming lubos sa lalong magagaling na bagay tungkol sa inyo, at sa mga ¹bagay na nabibilang sa ²kaligtasan, bagama’t kami ay nagsasalita nang ganito.

10 Sapagkat ang Diyos ay hindi liko upang limutin ang inyong gawa at ang pag-ibig na inyong ipinakita sa Kanyang pangalan, sa inyong ¹paglilingkod sa mga banal, at hanggang ngayon ay nagsisipaglingkod pa kayo.

11 Datapuwa’t aming pinakananasa na ang bawat isa sa inyo ay magpakita ng gayon ding sigasig sa ikalulubos ng katiyakan ng pag-asa hanggang sa katapusan;

12 Na huwag kayong maging mga ¹tamad, kundi mga tagatulad ng mga yaong sa pamamagitan ng pananampalataya at ng pagtitiis ay nagsisipagmana ng mga pangako.

13 Sapagkat ang Diyos, nang mangako kay Abraham, palibhasa ay walang nakahihigit na mapanunumpaan, ay nanumpa sa Kanyang Sarili,

14 Na sinasabi, Tiyak na sa pagpapala ay pagpapalain kita, at sa pagpaparami ay pararamihin kita;

15 At sa ganito, nang makapaghintay nang may pagtitiis, natamo niya ang pangako.

16 Sapagkat ang mga tao ay nanunumpa sa nakahihigit, at sa lahat ng kanilang mga pagtatalo ang isang sumpa ang siyang katapusan bilang pagpapatunay.

17 Sa ganito, ang Diyos, na nahahandang magpakita nang lalong sagana sa mga tagapagmana ng pangako ng kawalan ng pagbabago ng Kanyang pasiya, ay namagitan sa pamamagitan ng isang sumpa,

18 Upang sa pamamagitan ng ¹dalawang bagay na di-mababago, kung saan hindi posibleng magsinungaling ang Diyos, ay magkaroon tayo ng isang matibay na paghihikayat, tayong nagsitakas na ²nagsi ³kanlong upang manangan sa pag-asang nalalagay sa ating unahan,

19 Na taglay natin bilang ¹ankla ng kaluluwa, isang pag-asa na kapwa matibay at matatag, at ²pumapasok sa nasa loob ng tabing,

20 Na doon ang ¹Tagapagpáunáng si Hesus ay pumasok para sa atin, na naging Mataas na Saserdote magpakailanman ayon sa orden ni Melquisedec.