Hebreo 5

1 Sapagkat ang bawat mataas na saserdoteng kinuha mula sa mga tao ay itinalaga dahil sa mga tao sa mga bagay na nauukol sa Diyos, upang siya ay makapaghandog ng mga ¹kaloob at ng mga haing patungkol sa mga kasalanan;

2 Na ¹nakapagtitiis na may kahinahunan sa mga di-nakaaalam at mga nalilihis, yamang siya rin naman ay napaliligiran ng kahinaan;

3 At dahil dito ay nararapat siyang maghandog para sa mga kasalanan, hindi lamang para sa mga tao, bagkus para rin sa kanyang sarili.

4 At walang sinuman ang kumukuha para sa kanyang sarili ng karangalang ito, liban na kung tawagin siya ng Diyos na gaya naman ni Aaron.

5 Gayundin naman hindi ¹niluwalhati ni Kristo ang Kanyang sarili upang maging Mataas na Saserdote, kundi Yaong nagsabi sa Kanya, ²Ikaw ay Aking Anak, sa araw na ito ay ipinanganak Kita;

6 Gaya rin naman ng sinasabi Niya sa ibang dako, ¹Ikaw ay Saserdote magpakailanman ayon sa ²orden ni Melquisedec.

7 Na Siya sa mga araw ng Kanyang laman ay naghandog ng mga panalangin at mga daing na may malakas na pag-iyak at mga pagluha roon sa may kapangyarihang makapagligtas sa Kanya ¹palabas sa kamatayan, at Siya ay dininig dahil sa Kanyang ²maka-diyos-na-takot,

8 Bagamat Siya ay Anak, natutuhan Niya ang ¹pagtalima mula sa mga bagay na Kanyang tiniis;

9 At nang Siya ay ¹mapaging-sakdal, Siya ay naging ²sanhi ng ³walang hanggang kaligtasan sa lahat ng mga nagsisitalima sa Kanya,

10 ¹Pinangalanan ng Diyos na Mataas na Saserdote ayon sa orden ni Melquisedec.

11 Tungkol sa Kanya ay marami kaming sasabihin, at mahirap ipaliwanag, palibhasa ay nagsipurol kayo sa pakikinig.

12 Sapagkat nang kayo ay nararapat nang maging mga guro dahil sa kaluwatan, muli pa kayong nangangailangang kayo ay turuan ng isang tao ng mga ¹panimulang aralin ng mga ²orakulo ng Diyos, at naging tulad sa mga nangangailangan ng ³gatas at hindi ng pagkaing matigas.

13 Sapagkat bawat tumatanggap ng ¹gatas ay walang karanasan sa ¹salita ng katuwiran, sapagkat siya ay isang sanggol;

14 Ngunit ang pagkaing matigas ay para sa mga may gulang, sa mga yaong sa pamamagitan ng pagsasanay ay naensayo ang kanilang mga ¹sangkap ng pandama upang mapagkilala kapwa ang ²mabuti at ang masama.