Hebreo 3

1 Kaya, mga ¹banal na kapatid, mga ²may bahagi sa ³makalangit na pagtawag, isaalang-alang ninyo ang ⁴Apostol at Mataas na Saserdoteng ating kinikilala, si Hesus,

2 Na tapat sa nagtalaga sa Kanya, gaya rin naman ni Moises sa buong sambahayan Niya.

3 Sapagka’t Siya ay inaring karapat-dapat sa higit na ¹kaluwalhatian kaysa kay Moises, higit, tulad ng ang ²Nagtayo ng bahay ay may higit na karangalan kaysa sa bahay.

4 Sapagka’t ang bawa’t bahay ay may isang nagtayo, datapuwa’t ang Nagtayo ng lahat ng mga bagay ay ang Diyos.

5 At si Moises ay tunay na tapat sa Kanyang buong sambahayan bilang isang ¹lingkod, upang maging ²patotoo sa mga bagay na sasabihin sa hinaharap;

6 Subali’t si Kristo, bilang Anak na namamahala sa Kanyang sambahayan, na ang ¹bahay Niya ay tayo, kung ating pakaiingatan ang kalakasangloob at ang pagmamapuri sa pag-asa nang matibay hanggang sa katapusan.

7 ¹Kaya nga, gaya ng sinasabi ng Espiritu Santo, Ngayon kung marinig ninyo ang Kanyang tinig,

8 Huwag ninyong papagmatigasin ang inyong mga puso, na gaya ng sa pagmumungkahi sa galit, sa araw ng pagtukso sa ilang,

9 Kung saan Ako tinukso ng inyong mga magulang sa pamamagitan ng pagsubok sa Akin, at apatnapung taong nakita ang Aking mga gawa.

10 Dahil dito ay ¹nawalan Ako ng gana sa henerasyong ito, at Aking sinabi, Sila ay laging ²nagkakamali sa kanilang puso; at hindi nila nakikilala ang Aking mga ³pamamaraan;

11 Ano pa’t Aking isinumpa sa Aking kapootan, ¹Kung sila ay magsisipasok sa Aking kapahingahan!

12 Magsipag-ingat kayo, mga kapatid, baka sakaling mayroon sa kaninuman sa inyo ng isang pusong masama na walang pananampalataya, na ¹naghihiwalay sa inyo sa Diyos na buháy.

13 Nguni’t kayo ay magpangaralan sa isa’t isa araw-araw, habang ang panahon ay matatawag pang ngayon, baka papagmatigasin ang sinuman sa inyo ng daya ng kasalanan.

14 Sapagka’t tayo ay nagiging mga ¹kasama ni Kristo, kung tunay ngang ating pinakaiingatan ang pasimula ng katiyakan nang matibay hanggang sa katapusan;

15 Samantalang sinasabi, Ngayon, kung marinig ninyo ang Kanyang tinig, huwag ninyong papagmatigasin ang inyong mga puso, na gaya ng sa panahon ng pagmumungkahi sa galit.

16 Sapagka’t sinu-sino, na pagkarinig, ay nagmungkahi sa galit? Hindi ba yaong lahat na nagsilabas sa Ehipto sa pamamagitan ni ¹Moises?

17 At sa kani-kanino Siya nawalan ng gana sa apatnapung taon? Hindi ba sa mga yaong nangagkasala, na ang kanilang mga ¹katawan ay nangabuwal sa ilang?

18 At sa kani-kanino Niya isinumpa na sila ay hindi makapapasok sa Kanyang kapahingahan, kundi sa yaong mga ¹nagsisuway?

19 At nakikita natin na sila ay hindi nakapasok dahil sa kawalan ng pananampalataya.