2 Timoteo 1

1 Si Pablo, isang apostol ni Kristo Hesus sa pamamagitan ng kalooban ng Diyos, ayon sa ¹pangako ng buhay na nasa loob ni Kristo Hesus,

2 Kay Timoteo na aking minamahal na anak: Biyaya, ¹kaawaan, kapayapaan, mula sa Diyos Ama at kay Kristo Hesus na Panginoon natin.

3 Nagpapasalamat ako sa Diyos, na aking ¹pinaglilingkuran ²mula sa aking kanunununuan sa isang ³dalisay na budhi, kung paanong walang patid kitang inaalaala sa aking mga daing gabi’t araw,

4 Inaalaala ang iyong mga pagluha, kinasasabikang makita ka, upang ako ay mapuspos ng kagalakan;

5 Inaalaala ko ang tapat na pananampalatayang nasa iyo, na ¹namalagi muna kay Loida na iyong lola, at kay Eunice na iyong ina, at ako ay naniniwalang lubos na nasa iyo rin naman.

6 Dahil dito ay pinaaalaala ko sa iyo na ¹muling paningasin mo ang kaloob ng Diyos na nasa iyo sa pamamagitan ng ²pagpapatong ng aking mga kamay.

7 Sapagka’t hindi tayo binigyan ng Diyos ng ¹espiritu ng karuwagan, kundi ²ng kapangyarihan at ng pag-ibig at ng ³mahinahong kaisipan.

8 Kaya nga, ¹huwag mong ikahiya ang ²patotoo ng ating Panginoon, ni ako na bilanggo Niya; kundi magtiis ka ng mga kahirapan kasama ng ³ebanghelyo ⁴ayon sa kapangyarihan ng Diyos;

9 Na Siyang sa atin ay nagligtas, at sa atin ay ¹tumawag ng isang banal na pagtawag, hindi ayon sa ating mga gawa, kundi ayon sa Kanyang Sariling ²layunin at biyaya, na ibinigay sa atin sa loob ni Kristo Hesus ³bago pa ang mga panahong walang hanggan,

10 Nguni’t ngayon ay ¹nahayag sa pamamagitan ng pagpapakita ng ating Tagapagligtas na si Kristo Hesus, na Siyang ²nagpawalang-bisa sa kamatayan, at nagdala ng ³buhay at ng ⁴walang pagkasira sa liwanag sa pamamagitan ng ebanghelyo,

11 Na sa ¹bagay na ito, ako ay itinalagang ²tagapagbalita, at apostol at guro.

12 Dahil ¹dito ay nagtiis din ako ng mga bagay na ito; gayunman ay ²hindi ako nahihiya, sapagka’t nakikilala ko ³Yaong aking sinampalatayanan, at lubos akong naniniwalang maiingatan Niya ang ⁴aking ⁵ipinagkatiwala sa Kanya hanggang sa ⁶araw na yaon.

13 Ingatan mo ang ¹tularan ng ²malulusog na salitang narinig mo sa akin, sa ³pananampalataya at pag-ibig na nasa loob ni Kristo Hesus.

14 Ingatan mo ang mabuting bagay na ¹ipinagkatiwala sa iyo sa pamamagitan ng Espiritu Santo na ²nananahan sa atin.

15 Ito ay alam mo, na ang lahat ng nasa ¹Asia ay ²tumalikod sa akin, na sa mga yaon ay kabilang si ³Figello at si Hermogenes.

16 Pagkalooban nawa ng Panginoon ng kaawaan ang sambahayan ni ¹Onesiforo, sapagka’t madalas niya akong pinaginhawa, at hindi niya ikinahiya ang aking tanikala;

17 Sa halip, nang siya ay nasa Roma, hinanap niya ako nang buong sikap, at ako ay nasumpungan niya.

18 Pagkalooban nawa siya ng Panginoon na masumpungan niya ang kaawaan mula sa Panginoon sa ¹araw na yaon! At alam na alam mo kung gaano karaming bagay ang ipinaglingkod niya sa Efeso.