1 Timoteo 1

1 ¹Si Pablo, isang apostol ni Kristo Hesus, ayon sa ²utos ng ³Diyos na ating Tagapagligtas at ni Kristo Hesus na ating ⁴pag-asa,

2 Kay ¹Timoteo na aking tunay na ²anak sa pananampalataya: biyaya, kaawaan, at kapayapaan nawang mula sa Diyos na Ama at kay Kristo Hesus na Panginoon natin.

3 Kung paanong ipinamanhik ko sa iyo, nang ¹pumaroon ako sa Macedonia, na ikaw ay manatili sa Efeso upang maipagbilin mo sa ²ilang tao na huwag magsipagturo nang ³naiiba,

4 Ni huwag silang maokupahan ng mga ¹katha-katha at mga kasaysayan ng mga walang katapusang ²salinlahi, na pinanggagalingan ng mga pagtatanong, at hindi ng ³pamamahagi ng Diyos na nasa loob ng ⁴pananampalataya.

5 Nguni’t ang layunin ng ¹pag-aatas ay ²pag-ibig na nagbubuhat sa isang ³dalisay na puso, at sa isang mabuting budhi at sa di-mapagkunwaring pananampalataya;

6 Na ¹pagkasinsay ng iba sa mga bagay na ito ay nagsibaling sa ²walang kabuluhang pananalita,

7 Na nagsisipagnasang maging mga ¹guro ng kautusan, bagaman hindi nila nauunawaan ang kanilang sinasabi, ni ang kanilang ²pinatutunayan nang buong tiwala.

8 Datapuwa’t nalalaman natin na ang kautusan ay mabuti, kung ginagamit ng tao sa matuwid,

9 Yamang nalalaman ito, na ang kautusan ay hindi ginawa para sa taong matuwid, kundi para sa walang kautusan at magugulo, para sa mga di-makadiyos at mga makasalanan, para sa mga di-banal at mga mapaglapastangan, para sa mga nagsisipatay sa ama at sa mga nagsisipatay sa ina, para sa mga mamamatay-tao,

10 Para sa mga nakikiapid, para sa mga mapakiapid sa kapwa lalake o sa kapwa babae, para sa mga kidnaper, para sa mga bulaan, para sa mga mapagsumpa ng kabulaanan, at kung mayroon pang ibang bagay laban sa ¹malusog na pagtuturo,

11 Ayon sa ¹ebanghelyo ng kaluwalhatian ng pinagpalang Diyos, na ipinagkatiwala sa akin.

12 Nagpapasalamat ako sa Kanya na ¹nagpapalakas sa akin, kay Kristo Hesus na Panginoon natin, sapagka’t ako ay inari Niyang tapat, na ako ay hinirang sa ministeryo,

13 Bagaman noong una ako ay naging ¹manlalapastangan at mang-uusig at ²mang-aalipusta; gayunpaman ay ³kinaawaan ako, sapagka’t sa ⁴di-pagkaalam gumawa ako sa ⁴kawalan ng pananampalataya.

14 At ang ¹biyaya ng ating Panginoon ay lubhang sumagana sa ²pananampalataya at pag-ibig na nasa loob ni Kristo Hesus.

15 Tapat ang salita at nararapat tanggapin ng lahat, na si Kristo Hesus ay ¹naparito sa sanlibutan upang iligtas ang mga makasalanan, na ako ang pangunahin sa mga ito.

16 Gayunman, dahil dito ay kinaawaan ako, upang sa akin, na pinakapangunahing makasalanan, ay maipakita ni Hesu-Kristo ang buong pagpapahinuhod Niya, bilang isang ¹tularan sa mga magsisisampalataya sa Kanya tungo sa ²buhay na walang hanggan.

17 ¹Ngayon sa Hari ng mga kapanahunan, walang pagkasira, di-nakikita, sa iisang Diyos, ay ang ²karangalan at kaluwalhatian magpakailanman, Amen!

18 Ang ¹pag-aatas na ito ay ipinagtatagubilin ko sa iyo, Timoteo na aking anak, ayon sa mga nangaunang ²propesiya tungkol sa iyo, upang sa pamamagitan ng mga ito ay makipagbaka ka ng ³mabuting pakikipagbaka,

19 Na ingatan mo ang ¹pananampalataya at ang isang mabuting budhi, na nang ito ay itakwil ng iba, sila ay ²nangabagbag tungkol sa ³pananampalataya;

20 Na sa mga ito ay sina ¹Himeneo at ²Alejandro, na mga ibinigay ko kay Satanas, upang sila ay ³maturuang huwag manlapastangan.