2 Corinto 13

1 Ito ang ikatlong ulit na ako ay paririyan sa inyo. Sa bibig ng dalawa o tatlong saksi ay papagtitibayin ang bawa’t salita.

2 Sinabi ko na noong una at muli kong ipinagpapauna, gaya nang ako ay nahaharap nang ikalawang ulit, gayon din ngayon na ako ay wala sa harapan, sa mga nagkasala noong una, at sa mga iba pa, na kung ako ay pumariyang muli ay hindi na ako magpapatawad,

3 Yamang nagsisihanap kayo ng isang ¹katunayan na si Kristo ay ¹nagsasalita sa akin, na Siya sa inyo ay hindi mahina, kundi sa inyo ay ¹makapangyarihan.

4 Sapagka’t Siya ay ipinako sa krus ¹dahil sa ²kahinaan, gayon man ay nabubuhay Siya dahil sa kapangyarihan ng Diyos. Sapagka’t ³kami naman sa Kanya ay mahihina, nguni’t kami ay mabubuhay na kasama Niya ¹sa pamamagitan ng kapangyarihan ng Diyos sa inyo.

5 Siyasatin ninyo ang inyong mga sarili, kung kayo ay nangasa ¹pananampalataya; ²subukin ninyo ang inyong mga sarili; hindi ba ninyo nalalaman sa ganang inyong mga sarili, na si ³Hesu-Kristo ay nasa loob ninyo, maliban na nga kung kayo ay ⁴disaprobado?

6 Nguni’t inaasahan ko na inyong mangakikilala na ¹kami ay hindi disaprobado.

7 Ngayon ay idinadalangin namin sa Diyos na kayo ay huwag magsigawa ng masama, ¹hindi upang kami ay lumabas na aprubado, kundi upang gawin ninyo ang mabuti, kahit kami ay maging gaya ng disaprobado.

8 ¹Sapagka’t kami ay walang anumang magagawang laban sa ²katotohanan, kundi para sa katotohanan.

9 Sapagka’t kami ay nangagagalak kung kami ay ¹mahihina at kayo ay malalakas; at ito naman ay idinadalangin namin, samakatuwid ay ang inyong ²pagpapasakdal.

10 Dahil dito ay isinusulat ko ang mga bagay na ito samantalang ako ay wala sa harapan, upang kung nasa harapan ay huwag akong gumamit ng kabagsikan, ayon sa awtoridad na ibinigay sa akin ng Panginoon sa ikatatayo at hindi sa ikagigiba.

11 Sa katapus-tapusan, mga kapatid, ¹mangagsigalak kayo! ²Mangagpakasakdal kayo, ³mangagsilakas ang loob ninyo; ⁴mangagkaisa kayo ng pag-iisip, ⁵mangabuhay kayo sa kapayapaan, at ang Diyos ng ⁶pag-ibig at ng kapayapaan ay sasainyo.

12 Mangagbatian ang isa’t isa sa inyo ng ¹banal na halik.

13 Binabati kayo ng lahat ng mga banal.

14 Ang ¹biyaya ng Panginoong Hesu-Kristo, at ang pag-ibig ng Diyos, at ang pakikipagsalamuha ng Espiritu Santo ay sumainyo nawang lahat.