2 Corinto 9

1 Sapagka’t tungkol sa pagtutustos sa mga banal, kalabisan na sa akin ang isulat ko pa;

2 Sapagka’t nakikilala ko ang inyong pagiging handa, na aking ipinagmamapuri tungkol sa inyo sa mga taga-Macedonia, na ang ¹Acaya ay nahahanda noong isang taon pa, at ang inyong kasigasigan ay nakapanghikayat sa lubhang marami sa kanila.

3 Datapuwa’t isinugo ko ang mga kapatid, upang ang aming pagmamapuri dahil sa inyo ay huwag mawalan ng kabuluhan sa bagay na ito; na, ayon sa aking sinabi, kayo ay mangakapaghanda;

4 Baka sakaling sa anumang paraan kung magsirating na kasama ko ang ilang taga-Macedonia at kayo ay maratnang hindi nangahahanda, kami (huwag nang sabihing kayo) ay mangapahiya sa ¹pagtitiwalang ito.

5 Iniisip ko ngang kailangang ipamanhik sa mga kapatid, na mangaunang pumariyan sa inyo, at ihanda agad ang inyong ipinangakong ¹pagpapala nang una pa upang ito ay maihanda ²bilang isang pagpapala sa mga tatanggap at hindi ²bilang isang pag-iimbot sa mga nagbibigay.

6 Datapuwa’t sinasabi ko, ¹Ang naghahasik ng kakaunti ay mag-aani naman nang kakaunti; at ang naghahasik ²ng may mga ³pagpapala ay mag-aani naman ²ng may mga ⁴pagpapala;

7 Magbigay ang bawa’t isa ayon sa ipinasiya ng kanyang puso, huwag mabigat sa loob o dahil sa kailangan, sapagka’t ¹iniibig ng Diyos ang nagbibigay nang ²masaya.

8 At mapananagana ng Diyos ang ¹lahat ng biyaya sa inyo, upang kayo, na sapat sa lahat ng bagay, ay magsipanagana sa bawa’t mabuting gawa;

9 Gaya ng nasusulat, Siya ay ¹nagsabog, siya ay nagbigay sa mga ²dukha, ang kanyang ³katuwiran ay nananatili magpakailanman.

10 ¹At ang masaganang nagtutustos ng binhi sa naghahasik at ng tinapay na makakain ay magtutustos at magpaparami ng inyong binhi upang ihasik, at sasanhiin ang mga bunga ng inyong katuwiran na lumago;

11 Yamang kayo ay pinayaman sa lahat ng mga bagay tungo sa lubos na ¹pagbubukas-palad, na nagsisigawa sa pamamagitan namin ng pagpapasalamat sa Diyos;

12 Sapagka’t ang pagtutustos ng ¹paglilingkod na ito ay hindi lamang pumupuno sa kakulangan ng mga banal, kundi umaapaw rin naman sa pamamagitan ng maraming pagpapasalamat sa Diyos;

13 Sila, sa pamamagitan ng ¹pagiging aprubado ng pagtutustos na ito, ay nagbibigay-luwalhati sa Diyos dahil sa pagtalima ng inyong pagpapahayag tungo sa ebanghelyo ni Kristo, at dahil sa pagiging ²bukas-palad ng inyong ³pakikisalamuha sa kanila at sa lahat;

14 Samantalang sila rin naman, sa panalanging patungkol sa inyo, ay nananabik sa inyo dahil sa ¹lubhang saganang ²biyaya ng Diyos sa inyo.

15 Salamat sa Diyos dahil sa Kanyang ¹di-kayang-mailarawang ²kaloob!