2 Timoteo 4

1 Taimtim kong ipinagbibilin sa iyo sa paningin ng Diyos at ni Kristo Hesus, na Siyang nalalapit nang ¹humatol sa mga buháy at sa mga patay, at sa pamamagitan ng ²Kanyang pagpapakita at sa pamamagitan ng Kanyang kaharian:

2 Ipahayag mo ang ¹salita; ²maging handa ka ³napapanahon man o hindi; ⁴sumawata ka, manaway ka, manghikayat ka, na may ⁵buong pagpapahinuhod at pagtuturo.

3 Sapagkat darating ang ¹panahon na hindi nila tatanggapin ang ²malusog na pagtuturo, kundi, ayon sa kanilang sariling masasamang pita ay magsisipagbunton sila sa kanilang sarili ng mga gurong ³kikiliti sa tainga,

4 At ang kanilang tainga ay ¹ilalayo sa ²katotohanan, at ibabaling sa mga ³katha-katha.

5 Subalit ikaw, maging mahinahon ka sa kaisipan sa lahat ng mga bagay, magtiis ka ng mga kahirapan, gawin mo ang gawa ng isang ebanghelista, ¹lubos na ganapin mo ang iyong ²ministeryo.

6 Sapagkat ako ay ¹ibinubuhos na, at ang panahon ng aking ²pagpanaw ay dumating na.

7 ¹Nakipagbaka na ako ng mabuting pakikipagbaka, ²natapos ko na ang aking ³takbo, naingatan ko na ang pananampalataya;

8 ¹Buhat ngayon, ²natataan sa akin ang ³putong ng katuwiran, na igagawad sa akin ng Panginoon na ⁴matuwid na Hukom sa ⁵araw na yaon; at hindi lamang sa akin, bagkus sa lahat din naman ng mga umiibig sa Kanyang ⁶pagpapakita.

9 Magsikap kang pumarito nang madali sa akin;

10 Sapagkat ako ay pinabayaan ni Demas, palibhasa ay ¹iniibig niya ang pangkasalukuyang kapanahunan, at napasa Tesalonica; si Crescente ay napasa Galacia, at si Tito ay sa ²Dalmacia.

11 Si Lucas lamang ang kasama ko. Kunin mo si Marcos, at isama mo, sapagkat siya ay napakikinabangan ko sa ministeryo.

12 Si Tiquico ay isinugo ko na sa Efeso.

13 Pagparito mo, dalhin mo ang ¹balabal na iniwan ko kay Carpo sa ²Troas, at ang mga ³balumbon, lalung-lalo na ang mga pergamino.

14 Ginawan ako ng maraming kasamaan ni Alejandro na panday-tanso; gagantihan siya ng Panginoon ayon sa kanyang mga gawa.

15 Mag-ingat ka rin naman sa kanya, sapagkat lubha niyang sinalungat ang aming mga salita.

16 Walang sumama sa akin sa una kong pagsasanggalang, bagkus pinabayaan ako ng lahat; huwag nawang ibilang ito nang laban sa kanila.

17 Datapuwa’t ang Panginoon ay tumayong kasama ko, at ako ay pinalakas, upang sa pamamagitan ko ang pagtatanyag ay maganap nang lubos, at upang mapakinggan ng lahat ng mga Hentil; at ako ay iniligtas sa ¹bibig ng leon.

18 Ako ay ililigtas ng Panginoon sa bawat gawang masama, at ako ay ililigtas Niya tungo sa Kanyang ¹makalangit na kaharian, suma Kanya nawa ang kaluwalhatian magpakailanman. Amen.

19 Batiin mo si Prisca at si Aquila at ang sambahayan ni Onesiforo.

20 Si Erasto ay nanatili sa Corinto, datapuwa’t si Trofimo ay iniwan ko sa ¹Mileto na ²may sakit.

21 Sikapin mong makaparito bago magtaglamig. Binabati ka ni Eubulo, at ni Pudente, at ni Lino, at ni Claudia, at ng lahat ng mga kapatid.

22 Nawa sumaiyong ¹espiritu ang Panginoon. Nawa sumaiyo ang ²biyaya.