2 Timoteo 2

1 Ikaw nga, anak ko, ay ¹magpakalakas sa ²biyayang nasa loob ni Kristo Hesus,

2 At ang mga ¹bagay na narinig mo sa akin sa gitna ng maraming saksi ang siya mo ring ²ipagkatiwala sa mga taong ³tapat, na makapagtuturo naman sa iba.

3 Makipagtiis ka sa akin ng mga kahirapan, na gaya ng mabuting ¹kawal ni Kristo Hesus.

4 Walang sinumang naglilingkod bilang kawal ang ¹nagsasangkot ng kanyang sarili sa mga bagay ng ²buhay na ito, upang siya ay kalugdan niyaong nagtala sa kanya sa pagkakawal.

5 At kung ang sinuman ay ¹makikipaglaban naman sa mga laro, siya ay hindi ²puputungan maliban na siya ay makipaglabang matuwid.

6 Ang nagpapagal na ¹magsasaka ang siyang dapat unang makabahagi sa mga bunga.

7 Isipin mo ang sinasabi ko, sapagka’t bibigyan ka ng Panginoon ng pang-unawa sa lahat ng mga bagay.

8 Alalahanin mo si Hesu-Kristo, na ¹ibinangon mula sa mga patay, sa ²binhi ni David, ayon sa ³aking ebanghelyo;

9 Na siyang pinagtitiisan ko ng kahirapan sa mga tanikala, na tulad sa isang kriminal, nguni’t ang salita ng Diyos ay ¹hindi natatanikalaan.

10 Kaya tinitiis ko ang lahat ng mga bagay dahil sa mga ¹hinirang, upang makamtan din nila ang kaligtasang nasa loob ni Kristo Hesus ²na may walang hanggang kaluwalhatian.

11 Tapat ang salita: ¹Sapagka’t kung tayo ay ²namatay na kasama Niya, ³mabubuhay rin naman tayong kasama Niya;

12 Kung tayo ay ¹magtitiis, ²maghahari rin tayong kasama Niya; kung ikakaila natin Siya, ³ikakaila rin Niya tayo;

13 Kung tayo ay hindi mga tapat, Siya ay nananatiling ¹tapat, sapagka’t ²hindi Niya maipagkakaila ang Kanyang Sarili.

14 Paalalahanan mo sila sa mga bagay na ito, na sila ay pagbilinan nang taimtim sa paningin ng Panginoon, na huwag makipagtalo tungkol sa mga salita na hindi mapakikinabangan, sa ¹ikapapahamak ng mga nakikinig.

15 Pagsikapan mong iharap ang iyong sarili na aprubado sa Diyos, manggagawang walang dapat ikahiya, na ¹ipinaliliwanag nang matuwid ang salita ng ²katotohanan.

16 Datapuwa’t ilagan mo ang mga ¹di-banal, at walang kabuluhang usapan, sapagka’t ang mga ito ay magpapatuloy sa higit na ²di-pagkamakadiyos,

17 At ang kanilang salita ay ¹kakalat na gaya ng ²ganggrena, na sa mga ito ay kabilang si Himeneo at si Fileto,

18 Na tungkol sa ¹katotohanan ay ²nangasinsay, na nagsasabing ang pagkabuhay na muli ay ³nakaraan na, at ibinabagsak ang ⁴pananampalataya ng ilan.

19 Gayunpaman, ang matibay na ¹pundasyon ng Diyos ay nananatili na may ganitong ²tatak, Nakikilala ng Panginoon ang mga Kanya, at, Hayaang lumayo sa kalikuan ang bawa’t isa na sumasambit sa pangalan ng Panginoon.

20 ¹Datapuwa’t sa isang ²malaking bahay ay hindi lamang may mga ³sisidlang ginto at pilak, kundi mayroon din namang ⁴kahoy at lupa, at ang ilan ay sa ikapupuri, at ang ilan ay sa ikasisirang-puri;

21 Kung kaya nga ang sinumang ¹naglilinis ng kanyang sarili mula sa ²mga ito ay magiging sisidlang ³sa ikapupuri, pinabanal, kapaki-pakinabang sa may-ari, nahahanda sa lahat ng mabuting gawa.

22 Datapuwa’t layuan mo ang masasamang ¹pita ng kabataan, at habulin mo ang ²katuwiran, pananampalataya, pag-ibig, kapayapaan, kasama ng mga ³nagsisitawag sa Panginoon mula sa isang ⁴pusong dalisay.

23 Nguni’t tanggihan mo ang mga ¹hangal at ²mangmang na pagtatanong, yamang nalalaman mo na ang mga ito ay ³namumunga ng mga pagtatalo;

24 At ang isang alipin ng Panginoon ay hindi dapat makipagtalo, kundi maamo sa lahat; makapagtuturo, matiisin,

25 Na itinutuwid nang may kaamuan ang mga sumasalungat, baka sakaling sila ay pagkalooban ng Diyos ng ¹pagsisisi sa ²lubos na ikaaalam ng katotohanan,

26 At sila ay ¹makabalik sa kahinahunan ng kaisipan mula sa ²silo ng ³Diyablo, na bumihag sa kanila, ⁴tungo sa Kanyang kalooban.