2 Pedro 3

1 Ito nga ang ikalawang sulat, mga minamahal, na isinusulat ko sa inyo; at sa dalawang ito ay ginigising ko ang inyong tapat na kaisipan sa pamamagitan ng pagpapaalala sa inyo,

2 Upang maalala ninyo ang mga ¹salitang ipinahayag noong una ng mga banal na propeta, at ang ¹utos ng Panginoon at Tagapagligtas sa pamamagitan ng inyong mga apostol;

3 Na malaman muna ninyo ito, na sa mga ¹huling araw ay magsisiparito ang mga ²manunuya na may pagtuya, na magsisilakad ayon sa kani-kanilang masasamang pita,

4 At magsisipagsabi, Nasaan ang ¹pangako ng Kanyang ²pagparito? Sapagka’t buhat nang araw na mangatulog ang mga ³magulang, ang lahat ng bagay ay nangagpapatuloy na gaya ng kalagayan nila mula noong ang paglalang.

5 Sapagka’t dahil sa kanilang sariling pananadya, ¹ito ay ikinubli sa kanila, na sa pamamagitan ng ²salita ng Diyos ay nagkaroon ng ³sangkalangitan ⁴mula noong unang panahon, at ng ³lupang ⁵umiral mula sa tubig at sa pamamagitan ng tubig.

6 Na sa pamamagitan din ¹nito, ang ²sanlibutan ³noon, na ⁴inapawan ng tubig, ay ⁵napahamak.

7 Ngunit ang sangkalangitan at ang lupa ¹ngayon, sa pamamagitan ng ²gayon ding salita, ay ³iniingatang talaga para sa ⁴apoy, itinataan sa araw ng ⁵paghuhukom at ⁶paglipol sa mga ⁷di-makadiyos na tao.

8 Datapuwa’t huwag ninyong hayaan ang isang bagay na ito na ¹makubli sa inyo, mga minamahal, na ang ²isang araw sa Panginoon ay katulad ng isang libong taon, at ang isang libong taon ay katulad ng isang araw.

9 ¹Hindi inaantala ng Panginoon ang tungkol sa pangako, na gaya ng ²pag-aantalang ipinapalagay ng ³iba, kundi ⁴mapagpahinuhod sa inyo, na ang sinuman ay hindi Niya ibig ⁵mapahamak, kundi ang ⁶lahat ay ⁷magsipagsisi.

10 Datapuwa’t ang ¹kaarawan ng Panginoon ay ²darating na gaya ng isang magnanakaw, ³na sa araw na yaon ang ⁴sangkalangitan ay mapaparam na kasabay ng isang ⁵malaking ugong, at ang mga ⁶elemento ay ⁷mapupugnaw sa matinding init, at ang lupa at ang mga ⁸gawang nasa lupa ay pawang ⁷masusunog.

11 ¹Ang lahat ng mga bagay na ito ay mapupugnaw nang ganito, anong uri ng mga tao kayo nararapat maging ²sa banal na paraan ng pamumuhay at pagkamakadiyos,

12 Na ating ¹hinihintay at pinadadali ang ²pagdating ng ³kaarawan ng Diyos, na dahil ⁴dito ang sangkalangitan, na pinaningas, ay mapupugnaw, at ang mga elemento ay matutunaw sa matinding init?

13 ngunit ayon sa Kanyang ¹pangako ay naghihintay tayo sa ²bagong langit at sa bagong lupa, na ³tinatahanan ng ⁴katuwiran.

14 Kaya nga, mga minamahal, yamang kayo ay nagsisipaghintay sa mga bagay na ito, pagsikapan ninyong ¹masumpungan kayo sa loob ng kapayapaan, na ²walang dungis at walang kapintasan sa paningin Niya;

15 At inyong ¹ariin na ang ²pagpapahinuhod ng ating Panginoon ay ³pagliligtas, na gaya ⁴rin naman ni Pablo na ating minamahal na kapatid, ayon sa karunungang ibinigay sa kanya, ay sinulatan kayo,

16 Gayundin naman sa ¹lahat ng kanyang mga sulat, na roon ay sinasalita ang ²mga bagay na ito, na roon ay may ilang bagay na mahirap unawain, na ³pinipilipit ng mga walang pagkakaalam at ng mga walang katatagan, na gaya rin naman ng kanilang ginagawa sa ²ibang mga Kasulatan, sa ⁴ikapapahamak ng kanilang sarili.

17 Kaya nga, mga minamahal, yamang nalalaman na ninyo noong una pa ang mga bagay na ito, ¹magsipag-ingat kayo, baka kung ²matangay kayo sa pamamagitan ng kamalian ng mga ³tiwali, ay ⁴mahulog kayo mula sa inyong sariling katatagan.

18 Datapuwa’t ¹magsilago kayo sa ²biyaya at sa ³pagkakilala sa ating Panginoon at Tagapagligtas na si Hesu-Kristo. Suma ⁴Kanya nawa ang kaluwalhatian ngayon at hanggang sa araw rin ng kawalang-hanggan. Amen.