1 Tesalonica 3

1 Kaya’t nang hindi na kami makatiis ay minagaling naming maiwang nag-iisa sa ¹Atenas,

2 At aming isinugo si Timoteo, na aming kapatid at ¹kamanggagawa ng Diyos sa ebanghelyo ni Kristo, upang patatagin kayo at ²palakasin ang inyong loob alang-alang sa inyong pananampalataya,

3 Upang walang sinuman ang ¹mabagabag ng mga kapighatiang ito; sapagka’t kayo rin ang nangakaaalam na ²itinalaga kami sa bagay na ito;

4 Sapagka’t kahit na nang kami ay kasama ninyo, ¹sinabi namin noong una sa inyo na kami ay nangagbabata ng kapighatian; gaya nga ng nangyari, at nalalaman ninyo.

5 Dahil dito naman, nang hindi ko na matiis, ako ay nagsugo upang matalastas ko ang inyong pananampalataya, baka sa anumang paraan kayo ay natukso ng ¹manunukso, at ang aming pagpapagal ay ²mawalan ng kabuluhan.

6 Datapuwa’t si Timoteo, na kararating lamang ¹sa amin ngayon buhat sa inyo, at nagdala sa amin ng mabuting balita tungkol sa inyong pananampalataya at pag-ibig, at lagi ninyo kaming inaalaalang mabuti, na ninanasang makita kami gaya naman namin sa inyo;

7 Dahil dito ay ¹naaliw kami, mga kapatid, tungkol sa inyo, sa lahat ng aming ²pangangailangan at kapighatian, sa pamamagitan ng inyong pananampalataya;

8 Sapagka’t ngayon ay ¹nabubuhay kami, kung kayo ay ²maninindigang matibay sa Panginoon.

9 Sapagka’t ano ngang pasasalamat ang aming maibabalik sa Diyos dahil sa inyo, dahil sa buong kagalakan na aming ikinagalak dahil sa inyo sa harapan ng aming Diyos,

10 Gabi’t araw ay idinadalangin namin nang buong ningas na aming makita ang inyong mukha, at aming ¹mapasakdal kung ano ang kulang sa inyong pananampalataya?

11 Ngayon ay ¹patnubayan nawa ng ating Diyos Mismo at Ama, at ng ating Panginoong Hesus, ang aming paglalakbay sa inyo;

12 At sanhiin ng Panginoon na paramihin at pasaganahin kayo sa ¹pag-ibig sa isa’t isa, at sa lahat ng mga tao, na gaya naman ng amin sa inyo;

13 ¹Upang patatagin Niya ang inyong mga ²puso, na walang maipipintas sa ³kabanalan sa harapan ng ating Diyos at Ama, sa ⁴pagparito ng ating Panginoong Hesus kasama ang lahat ng Kanyang mga ⁵banal⁶.