1 Corinto 6

1 Nangangahas ba ang sinuman sa inyo, kung may anumang ¹kaso laban sa iba, na siya ay magpahatol sa harapan ng ²mga liko, at hindi sa harapan ng mga banal?

2 O hindi ba ninyo nalalaman na ang mga banal ang ¹magsisihatol sa sanlibutan? At kung ang sanlibutan ay hahatulan ninyo, hindi kaya dapat na ²magsihatol kayo sa mga bagay na pinakamaliit?

3 Hindi ba ninyo nalalaman na ating ¹hahatulan ang mga anghel? Gaano pa kaya ang mga bagay na nauukol sa buhay na ito?

4 Kung kayo nga ay may mga usapin sa mga bagay na nauukol sa buhay na ito, ilalagay ba ninyo upang magsihatol ang ¹mga taong hindi pinahahalagahan sa ekklesia?

5 Sinasabi ko ito upang mangahiya kayo. Ano, diyata’t wala ni isa man sa inyo ang marunong, na makapagpapayo sa kanyang mga kapatid!

6 Kundi ang kapatid ay nakikipaghablahan laban sa kapatid, at ito ay sa harapan ng mga hindi nagsisipanampalataya.

7 Ngayon nga, tunay na isang ¹pagkatalo para sa inyo ang kayu-kayo ay magkaroon ng ²mga usapin. Bakit hindi ³bagkus inyong tiisin ang mga kalikuan? Bakit hindi ³bagkus kayo ay ⁴padaya?

8 Nguni’t kayo rin ang mga nagsisigawa ng kalikuan at nangagdaraya, at ito ay sa mga kapatid ninyo.

9 O hindi ba ninyo nalalaman na ang mga liko ay hindi ¹magsisipagmana ng kaharian ng Diyos? Huwag kayong padaya: kahit ang mga mapakiapid, ni ang mga mananamba sa diyus-diyusan, ni ang mga mangangalunya, ni ang mga binabae, ni ang mga mapakiapid sa kapwa lalake o sa kapwa babae,

10 Ni ang mga magnanakaw, ni ang mga sakim, ni ang mga manlalasing, ni ang mga manlalait, ni ang mga mapangamkam ay hindi mangagmamana ng kaharian ng Diyos.

11 At ganyan ang mga ilan sa inyo noon, nguni’t ¹nangahugasan na kayo, nguni’t ¹napabanal na kayo, nguni’t ¹naaring-matuwid na kayo sa pangalan ng Panginoong Hesu-Kristo, at sa Espiritu ng ating Diyos.

12 ¹Ang lahat ng mga bagay ay ²matuwid sa akin, nguni’t hindi ang lahat ay ³kapaki-pakinabang. Ang lahat ng mga bagay ay ²matuwid sa akin, nguni’t hindi ako ⁴pasasakop sa kapangyarihan ng alinman.

13 Ang ¹mga pagkain ay para sa tiyan, at ang tiyan ay para sa mga pagkain; nguni’t ²kapwa dadalhin sa wala ng Diyos ito at ang mga yaon. Datapuwa’t ang ³katawan ay hindi para sa pakikiapid, kundi para sa Panginoon, at ang Panginoon ay para sa katawan.

14 At ibinangon ng Diyos ang Panginoon, at ¹ibabangon naman tayo sa pamamagitan ng Kanyang kapangyarihan.

15 Hindi ba ninyo nalalaman na ang inyong mga katawan ay ¹mga sangkap ni Kristo? Kukunin ko nga ba ang mga sangkap ni Kristo, at gagawin kong mga sangkap ng isang patutot? Tiyak na hindi!

16 O hindi ba ninyo nalalaman na ang nakikisama sa isang patutot ay kaisang katawan niya? Sapagka’t sinasabi Niya, Ang dalawa ay magiging ¹isang laman.

17 Nguni’t ang ¹nakaugpong sa Panginoon ay ²kaisang espiritu Niya.

18 Magsitakas kayo sa pakikiapid. Bawa’t ¹kasalanang ginagawa ng isang tao ay nasa labas ng katawan, nguni’t ang gumagawa ng pakikiapid ay nagkakasala laban sa kanyang sariling katawan.

19 O hindi ba ninyo nalalaman na ang inyong katawan ay ¹templo ng Espiritu Santo na nasa loob ninyo, na tinanggap ninyo mula sa Diyos, at hindi kayo sa inyong sarili?

20 Sapagka’t kayo ay binili sa isang ¹halaga; ²luwalhatiin nga ninyo ng inyong katawan ang Diyos.