1 Corinto 2

1 At ako, nang ako ay pumariyan sa inyo, mga kapatid, ay hindi napariyan ¹na may dakilang kagalingan sa pananalita o sa karunungan, na ipinapahayag sa inyo ang ²hiwaga ng Diyos.

2 Sapagka’t ipinasiya kong huwag malaman ang anuman sa inyo, ¹maliban kay Hesu-Kristo, at ang Isang ito na ²ipinako-sa-krus.

3 At ako ay nakisama sa inyo na may ¹kahinaan at may ²pagkatakot at may lubhang panginginig;

4 At ang aking pananalita at ang aking pangangaral ay hindi sa mga ¹mapanghikayat na salita ng karunungan, kundi sa pagtatanghal ng Espiritu at ng kapangyarihan,

5 Upang ang inyong pananampalataya ay huwag masalig sa ¹karunungan ng mga tao, kundi sa kapangyarihan ng Diyos.

6 Gayunman ay nangagsasalita kami ng karunungan sa mga lumago-na-nang-lubusan, bagaman hindi ng karunungan ng kapanahunang ito, ni ng mga pinuno sa kapanahunang ito, na mga ¹nangauuwi sa wala;

7 Kundi sinasalita namin ang ¹karunungan ng Diyos sa hiwaga, yaong naikubling karunungan na itinalaga ng Diyos ²bago pa ang mga kapanahunan sa ³ikaluluwalhati natin;

8 Na hindi napagkilala ng sinumang pinuno sa kapanahunang ito; sapagka’t kung nakilala sana nila, disin sana ay hindi ipinako-sa-krus ang Panginoon ng kaluwalhatian;

9 Datapuwa’t gaya ng nasusulat, Ang mga bagay na hindi nakikita ng ¹mata at hindi naririnig ng tainga, at hindi pumapasok sa puso ng tao, gaanong karami ang inihanda ng Diyos sa kanila na ²nangagsisiibig sa Kanya.

10 Nguni’t ang mga ito ay ¹ipinahayag sa atin ng Diyos sa pamamagitan ng Espiritu; sapagka’t ²sinisiyasat ng Espiritu ang lahat ng bagay, maging ang ³mga kalaliman ng Diyos.

11 Sapagka’t sino sa mga tao ang nakakikilala ng mga bagay ng tao, kundi ang ¹espiritu ng tao na nasa kanya? Gayundin naman ang mga bagay ng Diyos ay hindi nakikilala ng sinuman, maliban ng Espiritu ng Diyos.

12 Ngayon ating ¹natanggap, hindi ang espiritu ng sanlibutan, kundi ang Espiritung mula sa Diyos, upang ating mapagkilala ang mga bagay na sa atin ay ibinigay nang walang bayad ng Diyos;

13 Na ang mga bagay na ito ay atin namang sinasalita, hindi sa mga salitang itinuro ng pantaong karunungan, kundi sa itinuro ng Espiritu, na ¹ipinababatid natin ang ²mga espirituwal na bagay sa pamamagitan ng mga espirituwal na bagay.

14 ¹Nguni’ t ang ²makakaluluwang tao ay hindi tumatanggap ng ³mga bagay ng Espiritu ng Diyos, sapagka’t ang mga ito ay kamangmangan sa kanya; at ⁴hindi niya kayang maunawaan, sapagka’t ang mga yaon ay ⁵nakikilala ayon sa ⁶espiritu.

15 Nguni’t ¹ang espirituwal ay nakakikilala ng lahat ng bagay, at siya ay hindi nakikilala ng sinuman.

16 Sapagka’t sino ang nakaalam ng kaisipan ng Panginoon? Sino ang magtuturo sa Kanya? Datapuwa’t ¹taglay natin ang kaisipan ni Kristo.