1 Corinto 10

1 ¹Sapagka’t hindi ko ibig mga kapatid na ²hindi ninyo maalaman, na ang ³lahat ng ating mga magulang ay nangapasailalim ng ⁴ulap, at ang lahat ay nagsitawid sa dagat,

2 At lahat ay ¹nangabautismuhan ²tungo kay Moises ³sa ulap at sa dagat,

3 At lahat ay nagsikain ng iisang ¹espiritwal na pagkain;

4 At lahat ay nagsiinom ng iisang ¹espiritwal na inumin; sapagka’t sila ay nagsiinom sa isang ²espiritwal na bato na sumunod sa kanila, at ang batong yaon ay si Kristo.

5 Datapuwa’t ang karamihan sa kanila ay hindi nakalugod sa Diyos, sapagka’t sila ay ¹ibinuwal sa ilang.

6 Ang mga bagay na ito nga ay pawang naging mga ¹halimbawa sa ²atin, upang huwag tayong magsipagnasa ng mga bagay na masama na gaya naman nila na nagsipagnasa.

7 Ni huwag din naman kayong maging ¹mananamba ng mga diyos-diyosan, gaya niyaong ilan sa kanila; ayon sa nasusulat, Naupo ang bayan upang ¹magsikain at magsiinom, at nagsitindig upang magsipaglaro.

8 Ni huwag din naman tayong ¹makiapid, na gaya ng ilan sa kanila na nangakiapid, at ang ²nangabuwal sa isang araw ay dalawampu at tatlong libo.

9 Ni huwag din naman nating ¹tuksuhin si Kristo, na gaya ng pagtukso ng ilan sa kanila, at pinuksa ng mga ahas.

10 Ni huwag din kayong ¹mangagbulung-bulong, na gaya ng ilan sa kanila na nangagbulung-bulong, at ²nilipol ng ³mamumuksa.

11 Ang mga bagay na ito nga ay ¹nangyari sa kanila na pinakahalimbawa at pawang nangasulat sa pagpapaalaala sa atin, na mga dinatnan ng ²katapusan ng mga kapanahunan.

12 ¹Kaya’ t ang may akalang siya ay nakatayo ay mag-ingat at baka ²mabuwal.

13 ¹Hindi dumating sa inyo ang anumang ²tukso kundi yaong matitiis ng tao; datapuwa’t tapat ang Diyos, na hindi Niya ipahihintulot na kayo ay ²matukso nang higit sa inyong makakaya, kundi kalakip din ng tukso ay gagawa naman ng paraan ng pag-ilag, upang ito ay inyong matiis.

14 ¹Kaya, mga minamahal ko, magsitakas kayo sa ²pagsamba sa diyos-diyosan.

15 Ako ay nagsasalitang tulad sa mga taong may maingat na katalinuhan; hatulan ninyo ang sinasabi ko.

16 Ang saro ng pagpapala na ating pinagpapala, hindi ba ito ¹pakikipagsalamuha ng dugo ni Kristo? Ang tinapay na ating pinagpipira-piraso, hindi ba ito ¹pakikipagsalamuha ng katawan ni Kristo?

17 Bagaman tayo ay marami ay ¹iisang tinapay, iisang Katawan; sapagka’t tayong lahat ay ²nakikibahagi sa iisang tinapay na ito.

18 Tingnan ninyo ang Israel na ayon sa laman; ang mga nagsisikain ng mga hain, hindi ba sila ¹mga kasalamuha sa ²dambana?

19 Ano nga ang aking sinasabi? Na ang hain sa mga diyos-diyosan ay may kabuluhan? O ang isang diyos-diyosan ay may kabuluhan?

20 Subali’t sinasabi ko, na ang mga bagay na inihahain ng mga Hentil ay kanilang inihahain sa ¹mga demonyo at hindi sa Diyos; at hindi ko ibig na kayo ay maging mga ²kasalamuha ng mga demonyo.

21 Hindi ninyo ¹maiinuman ang saro ng Panginoon at ang saro ng mga demonyo; kayo ay hindi maaaring makisalo sa hapag ng Panginoon at sa hapag ng mga demonyo.

22 O ¹iminumungkahi ba natin sa paninibugho ang Panginoon? Tayo ba ay lalong malakas kaysa sa Kanya?

23 ¹Lahat ng mga bagay ay ²matuwid, nguni’t hindi lahat ng mga bagay ay ³kapaki-pakinabang; lahat ng mga bagay ay ²matuwid, nguni’t hindi lahat ng mga bagay ay ⁴nakapagtatayo.

24 Huwag hangarin ninuman ang sa kanyang sariling kapakinabangan, kundi ang ikabubuti ng kapwa.

25 Lahat ng ipinagbibili sa ¹pamilihan ay kanin ninyo, at huwag kayong magsipagtanong ng anuman nang dahil sa budhi;

26 Sapagka’t ang lupa ay sa Panginoon at ang kapuspusan nito.

27 Kung kayo ay aanyayahan ng isang hindi sumasampalataya, at ibig ninyong pumaroon, ang anumang ihain sa inyo ay kanin ninyo, at huwag kayong magsipagtanong ng anuman nang dahil sa budhi.

28 Datapuwa’t kung sa inyo ay may magsabi, Ito ay inihandog na hain, huwag ninyong kanin, nang dahil sa kanya na nagsabi at nang dahil sa budhi;

29 Budhi, sinasabi ko, hindi ang sa inyong sarili, kundi ang sa iba. Sapagka’t bakit hinahatulan ng budhi ng iba ang aking kalayaan?

30 Kung ¹nakikibahagi ako na may pagpapasalamat, bakit ako ay aalipustahin ng dahil sa aking ipinagpapasalamat?

31 ¹Samakatuwid ²maging kayo ay kumakain o umiinom, o anuman ang inyong ginagawa, gawin ninyo ang lahat sa ikaluluwalhati ng Diyos.

32 ¹Huwag kayong magbigay ng dahilan ng ikatitisod, sa mga ²Hudyo man, sa mga Griyego man, o sa ekklesia man ng Diyos;

33 Na gaya ko rin naman na sa lahat ng mga bagay ay ¹nagbibigay-lugod ako sa lahat ng mga tao, na hindi ko hinahangad ang aking sariling kapakinabangan, kundi ang sa marami, upang sila ay mangaligtas.